Յունուար 12-ին Վալանսի «Արմէնիա» միութիւնը «Jean Moulin» սրահին մէջ կազմակերպած է «Cuisine d’Arménie» («Հայաստանի խոհանոցը») գիրքին շնորհահանդէսը մասնակցութեամբ հատորի հեղինակներ՝ քոյր եւ եղբայր Գորին եւ Ռիշար Զարզաւաթճեանի։ Այս մասին կը հաղորդէ Ֆրանսայի «Նոր Յառաջ»-ը։
Գիրքը կ’ընդգրկէ հայկական շուրջ 100 ճաշատեսակ՝ լուսանկարներով եւ բաղադրատոմսերով։
Նախաբանը ստորագրած է երաժիշտ Անտրէ Մանուկեան։
Ձեռնարկին, աւելի քան 80 ներկաներու կարգին, եղած են շրջանի հայկական միութիւններու ներկայացուցիչներ եւ քաղաքապետարանի անդամներ։
Լրագրող ծաղրանկարիչ Գրիգոր Ամիրզայեանի բարի գալուստի խօսքէն ետք հեղինակները ներկայացուցած են հատորը եւ պատասխանած իրենց ուղղուած հարցումներուն։ Աւարտին, ներկաները ճաշակած են հայկական համադամներ եւ գինի։
Յաջորդող օրերուն, «Հայաստանի խոհանոցը» ներկայացուած է նաեւ Վիէնի եւ Լիոնի մէջ։