Գյումրու «Մարիամ և Երանուհի Ասլամազյան քույրերի պատկերասրահ»-ում սեպտեմբերի 9-ին «Մեկ նկարի ցուցադրություն» ձևաչափով իրականացվող ցուցահանդեսների շարքի շրջանակում տեղի ունեցավ հայտնի քանդակագործ Նիկողայոս Նիկողոսյանի որդու՝ Դավիթ Նիկողոսյանի կողմից Գյումրու Մարիամ և Երանուհի Ասլամազյան քույրերի պատկերասրահին նվիրատված Մարիամ Ասլամազյանի կողմից վրձնած Դավիթ Նիկողոսյանի դիմանկարի ցուցադրություն-շնորհանդեսը:
2017 թվականն առանձնահատուկ է Ասլամազյան պատկերասրահի համար, քանի որ նշվում է «Մարիամ և Երանուհի Ասլամազյան քույրերի պատկերասրահ»-ի հիմնադրման 30 և Մարիամ Ասլամազյանի ծննդյան 110-ամյակը և ամբողջ տարվա ընթացքում պատկերասրահը ունեցել և ունենալու է տարբեր նախագծեր ու ցուցահանդեսներ:
«Այս շնորհանդեսն աննախադեպ է, քանզի պատկերասրահի 30-ամյա պատմության մեջ առաջին անգամ մենք կարողացանք Ասլամազյանների նոր ստեղծագործությունով համալրել պատկերասրահը: Թանգարանի կարևոր գործառույթներից է ֆոնդային նմուշների հետազոտական և հավաքական աշխատանքները և արդեն երկու տարի է մենք կարողացել ենք համալրել նաև Ասլամազյանների կյանքին, ստեղծագործությունների վերաբերող բազմաթիվ գիտաօժանդակ նյութեր»,- «Արմենպրես»-ին տեղեկացրեց պատկերասրահի տնօրեն Վահագ Ղուկասյանը:
Դավիթ Նիկողոսյանի դիմանկարը նկարել է Մարիամ Ասլամազյանը 1968 թվականին Մոսկվայում:
Արմենուհի Մխոյան