Հայկական գորգագործութիւնը կը վերադառնայ եկեղեցիներ: Նախ Արցախի, ապա Սիւնիքի եկեղեցիներու խորհրդային արհեստագիտական գորգերը շուտով պիտի փոխարինուին ազգային գորգերով:
Բարերարը, որ գաղափարին հեղինակն է ու ֆինանսաւորողը, առայժմ կը ցանկայ անանուն մնալ, կը հաղորդէ «Armeniatv.am»:
Կը նշուի, որ Մէգերեան կարպետի գործարանին մէջ առայժմ կը գործուի 5 գորգ` 3-ը Գանձասարի եկեղեցւոյ համար, երկուքը` Արցախի նախագահական նստավայրի: Գծագիրները պատրաստ են նաեւ Ղազանչեցոցի, Ամարասի, Դադիվանքի եկեղեցիներուն համար: Բոլորն ալ եզակի են իրենց տեսակին մէջ: Նախշազարդերու նոր յօրինուածքով ու նոյնիսկ աւանդական գորգէն խիստ տարբեր նոր կառուցուածքով:
Աղբիւրին հաղորդմամբ, Գանձասարի եկեղեցւոյ ուղեգորգը, խորանի, նախախորանի գորգերը, Արցախի նախագահի նստավայրի աշխատասենեակի ու նախասրահի գորգերը պատրաստ են ուղարկուելու Արցախ: