Երեւանի մէջ Արցախի Հանրապետութենէն շուրջ 110 երեխայ մասնակցած է շնորհալիներու «Իզապէլ» կեդրոնի 12-րդ հանրապետական փառատօն-մրցոյթին:
Այս մասին, ըստ «Artsakhpress.am»-ի ըսած է Արցախի արուեստի վաստակաւոր գործիչ, Ստեփանակերտի մանկապատանեկան ստեղծագործական կեդրոնի (ՄՊՍԿ) պարուսոյց, մրցոյթին մասնակից սաներու ուսուցիչ Կարի Աւանեսեանը` տեղեկացնելով, որ մրցոյթի մասնակիցներուն ընդհանուր թիւը կը հասնէր 400-ի:
«Մրցոյթ-փառատօնին կը մասնակցին ԱՀ 10-20 տարեկան պատանիներ եւ աղջիկներ, որոնք կը ներկայանան հետեւեալ ժանրերով` երգ (ժողովրդական, դասական, ազգագրական, էսդրատային), երաժշտական գործիքներ (դասական, ժողովրդական), պար (դասական, ժողովրդական, ժամանակակից), ստեղծագործական արուեստ` (երաժշտութիւն, բանաստեղծութիւն, ասմունք, նկարչութիւն),-ըսած է Կ. Աւանեսեանը եւ աւելցուցած,-Այս մրցոյթին առաջին անգամ մասնակցած ենք 1998 թուականին` գրաւելով առաջին մրցանակային տեղը եւ արժանացած ոսկէ մետալի: Այս անգամ ՄՊՍ կեդրոնի 10-11 տարիքային խումբի աղջիկները եւ տղաները ներկայացուցած են դասական եւ ազգագրական պարեր եւ արժանացած «Գրան պրի» մրցանակի: Համոզուած եմ, որ տարուէ տարի պիտի աւելնայ մրցոյթի մասնակիցներուն թիւը, քանի որ Արցախի մէջ տաղանդաւոր եւ շնորհալի շատ երեխաներ կան»:
«Շնորհալիներ-2017» փառատօն-մրցոյթի առաջին մրցանակային տեղ գրաւած Մարտունիի Արամ Խաչատրեանի անուան արուեստի դպրոցի վոքալ բաժինի 6-րդ դասարանի սան Արսէն Պետրոսեանը, իր կարգին, ըսած է, որ ինքը առաջին անգամ է, որ կը մասնակցի նման մրցոյթի:
«Ներկայացած եմ Սասուն Պասկեւիչեանի «Մայրս» երգով եւ երգեցողութիւն անուանակարգով գրաւած եմ առաջին մրցանակային տեղը: Ուրախ եմ, որ կը կազմակերպուին նման մրցոյթներ, եւ մենք հնարաւորութիւն կ’ունենանք մեր սորվածով հանդէս գալ տարբեր մրցոյթներու մէջ: Յետայսու եւս պիտի մասնակցիմ նման մրցոյթներու. յոյս ունիմ, որ միշտ ալ պիտի կարենամ մրցանակային տեղեր գրաւել` բարձր պահելով իմ դպրոցի եւ ուսուցիչներու անունն ու պատիւը»,- աւելցուցած է Ա. Պետրոսեանը:
Նշենք, որ «Շնորհալիներ-2017» մրցոյթ-փառատօնին նպատակն է` յայտնաբերել նոր շնորհալի երեխաներ, աջակցիլ անոնց, տեսագրել, ձայնագրել, կազմակերպել մրցոյթ-փառատօնի դափնեկիրներու համերգներ, յայտնաբերուած նոր շնորհալիներ ներկայացնելու Հայաստանի, Արցախի եւ արտերկրի մէջ: