30 տարի անց բաց երկնքի տակ
Ձախ Յարութի երևանեան համերգի մասին
ՆՈՐ ՕՐ, ԼՈՍ ԱՆՃԵԼԸՍ.- ՀՀ վաստակաւոր արտիստ, սիրուած երգիչ Յարութ Փամպուքճեանը՝ Ձախ Յարութը, Յունիսի 30-ին «Հրազդան» մարզադաշտում կը ներկայանայ բացառիկ համերգով: «30 տարի անց «Հրազդան» մարզադաշտում» խորագիրը կրող համերգային երեկոյին արտիստը կը ներկայացնի ինքնատիպ համարներ: Համերգն այս խորհրդանշական մարզադաշտում անցկացնելու գաղափարը միջոցառման կազմակերպիչ Yeghoyan Production-ի ղեկավար, արտիստի ընկեր Խաչիկ Եղոյեանինն է, ով մանրամասներ է ներկայացրել համերգից:
– Պարոն Եղոյեան, խնդրում ենք, նախ ներկայացրէք համերգի գաղափարը, ինչպէ՞ս այն առաջացաւ։
– Դեռ երկու տարի առաջ, երբ մայիսեան յաղթանակների կապակցութեամբ Յարութ Փամպուքճեանի «Իմ կեանքը» խորագրով մենահամերգը կազմակերպեցի Մարզահամերգային համալիրում, արդէն ծնուել էր այն գաղափարը, որ յաջորդ համերգը պէտք է կազմակերպուի «Հրազդան» մարզադաշտում: Դէ, այն ժամանակ դեռ երկու տարի կար, բայց ահա արդէն փաստի առաջ ենք:
– «Հրազդան» մարզադաշտը շատ խորհրդանշական վայր է համերգի անցկացման համար։
– «Հրազդան» մարզադաշտը պատահական չեմ ընտրել: Այդ մարզադաշտը 30 տարի առաջ տեղաւորում էր 75,000 հանդիսատես: Ձախ Յարութը 6 օր շարունակ 100,000 հանդիսատեսով լեփ-լեցուն համերգներ է անցկացրել, ողջ հասոյթն էլ տրամադրել է աղէտի գօտուն: Այդ համերգներին մասնակցած սերունդները դրանք մինչ օրս մեծ սիրով ու ջերմութեամբ են յիշում:
Կարծում եմ, որ սա պատմական քայլ է, և այն չնշելը պարզապէս նման իրադարձութիւնն անտեսել կը լինէր: Մարդկութեան ամենամեծ թշնամին անտարբերութիւնն է, մենք պիտի ուշադիր լինենք միմեանց նկատմամբ և յիշենք մեր մեծերին: 30 տարի առաջ արած այս քայլը հայրենասիրական մեծ նշանակութիւն ունէր, այն մեծ տօն էր հայ ազգի համար, և մեզնից մէկը պարտաւոր էր յիշել այդ մասին: Այնպէս ստացուեց, որ ինձ վիճակուեց այդ բախտը:
– Ի՞նչ երգեր է կատարելու Ձախ Յարութը համերգին, արդեօք կը լինե՞ն պրեմիէրաներ և անակնկալներ։
– Ձախ Յարութի բոլոր երգերը՝ թէ՛ հները, թէ՛ նորերը, շատ սիրուած են: Վստահեցնում եմ, որ ծրագիրը լինելու է ինքնատիպ, արթնացնելու է ջերմ և գեղեցիկ յուշեր և լի է լինելու պատմութիւն կերտող պահերով: Սպասւում են բազում անակնկալներ, որոնք դեռ չենք բացայայտի:
– Համերգին հանդէս են գալու նաև Ձախ Յարութի ընկերները։ Ի՞նչ երգեր են նրանք կատարելու, արդեօք կը լինե՞ն զուգերգեր։
– Յունիսի 30-ին «Հրազդան» մարզադաշտում կայանալիք համերգին կը մասնակցեն նաև երգչի ընկերները՝ Լիլիթ Յովհաննիսեանը, Անդին, Արման Յովհաննիսեանը, Արմենչիկը, Ռազմիկ Ամեանը: Մեր ամենասիրուած և ճանաչուած էստրադային աստղերը բազմիցս են հանդէս եկել վարպետի հետ նոյն բեմահարթակում: Նրանք ցանկացան ներկայ գտնուել այս իրադարձութեանը և սիրուած արտիստի կողքին լինել: Կը լինեն զուգերգեր, կը լինեն հետաքրքիր ու ինքնատիպ համարներ, որոնք անտարբեր չեն թողնի հանդիսատեսին:
– Ինչպէ՞ս են ընթանում համերգի կազմակերպչական աշխատանքները։
– Համերգի կազմակերպչական աշխատանքները շատ լաւ են ընթանում, ամէն ինչ ընթանում է ծրագրուածի պէս: Յուսամ՝ ամէն ինչ կ՚անցնի բարձր մակարդակով:
– Ի՞նչ սպասելիքներ ունի Ձախ Յարութը, ինչպէ՞ս է պատրաստւում համերգին։
– Ձախ Յարութը նոյնիսկ ամենասովորական կորպորատիւ և անձնական երեկոներին է լուրջ կերպով պատրաստւում: Նա նոյնիսկ տարիներ շարունակ իր կատարած երգացանկն է իւրաքանչիւր իրադարձութիւնից առաջ մի քանի օր փորձում: Պատկերացրէք՝ թէ ինչ պատասխանատուութեամբ է նա պատրաստւում այս համերգին: Մի քանի օրից Ձախ Յարութն արդէն կը լինի Հայաստանում՝ պատրաստուելու է համերգին, մասնակցելու է փորձերին և կազմակերպչական աշխատանքներին, որպէսզի գեղեցիկ և անմոռանալի համերգ նուիրի իր երկրպագուներին:
Արմէնփրէս