Մեծարգոյ Նախագահ Արցախի Հանրապետութեան,
Համագումարի յարգարժան մասնակիցներ,
Մայր Աթոռ Սուրբ Էջմիածնից սիրով ողջունում ենք ամէնքիդ Մայիսեան հերոսամարտերի եւ Հայաստանի Հանրապետութեան 100-րդ տարեդարձին նուիրուած համաժողովի գումարման առիթով:
Առանձնակի գոհունակութեամբ ենք անդրադառնում, որ մեր հոգեւոր եղբօր՝ Արամ Ա. Մեծի Տանն Կիլիկիոյ Կաթողիկոսի նախանձախնդրութեամբ այսօր մէկտեղուել էք Անթիլիասի մայրավանքում` քննարկելու եւ արժեւորելու հայրենի պետականութեան վերակերտման պատմական յիշատակները: Մայր հայրենիքում եւ սփիւռքում այս նշանակալի իրադարձութեան 100-ամեակին նուիրուած բոլոր տօնախմբութիւնները գալիս են մեզ յիշեցնելու, որ, հակառակ դժուարին պատմական անցեալի, մեր ժողովուրդը երբեք չի դադարել պայքարել ազատութեան համար, որը մարդկանց տրուած աստուածային շնորհ է:
100-ամեակ առաջ մեր անկախ պետականութիւնը վերահաստատուեց այնպիսի դժուարին մի ժամանակահատուածում, երբ աշխարհը փոթորկած Առաջին աշխարհամարտի պայմաններում Օսմանեան Թուրքիայում իրականացւում էր հայոց ցեղասպանութիւնը, իսկ Արեւելեան Հայաստան ներխուժած թուրքական զօրքերը սպառնում էին մեր ժողովրդի գոյութեանը: Օրհասական պահին ոտքի կանգնեց ժողովուրդը, զինուորական, գիւղացի, հոգեւորական մահն անտեսելով մարտի դաշտ էին գնում անդադար հնչող զանգերի ներքոյ եկեղեցիների եւ իրենց հաւատաւոր հոգիներում հայրենիքը պաշտպանելու կոչը Գէորգ Ե. Սուրէնեանց Կաթողիկոսի: Մայիսեան հերոսամարտերը վկայութիւնը եղան մեր ժողովրդի քաջարի ոգու եւ միասնութեան, որ մի կողմ դնելով կուսակցական ու քաղաքական տարաձայնութիւնները, բռունցքուեց յանուն նոր ծնուելիք Հայաստանի անկախ Հանրապետութեան: Ազգային պետականութիւնը իբրեւ մեր ժողովրդի նուիրական ձգտումների իրագործում, օրհնուեց Մայր Աթոռ Սուրբ Էջմիածնում Հանրապետութեան դրօշի եւ բանակի օրհնութեամբ, որն աղօթալի խօսքով այսպէս է բնորոշել Գէորգ Ե. Հայրապետը. «Ի սրտէ փափաքող իմ սիրեցեալ ազգիս երջանկութեան եւ իմ պանծալի հայրենիքի եւ պետութեան բարգաւաճման եւ յարատեւութեան համար…Հայոց Մայր Աթոռի հնադարեան Ս. Էջմիածնի տաճարում անձամբ մատուցեցի Ս. Պատարագ, օրհնեցի եւ սրբագործեցի Անկախ, Միացեալ եւ Մեծ Հայաստանի տօնը…»:
Պետականութեան վերականգնումը դարձաւ մղիչ ու ոգեւորիչ ուժ, վստահութիւն ներշնչեց մեր ժողովրդին իր գալիքի հանդէպ: Այն եղաւ նաեւ վկայութիւն մեր ժողովրդի նուիրական ու վեհ ձգտումների` կառուցելու ժողովրդավարական, իրաւական ու ընկերային պետութիւն, ազատ ու արդար հասարակական կեանք: Այս աւանդները, հայրենիքի հանդէպ սէրը առաջնորդեցին մեր ժողովրդին 1991 թուականին հռչակելու ազգային պետականութեան անկախութիւնը, սատարելու արցախահայութեան ազատ ապրելու իրաւունքի իրացմանը, պաշտպանելու մեր հայրենիքի սահմանները թշնամեաց ոտնձգութիւններից:
Մայիսեան հերոսամարտերի եւ Հայաստանի Առաջին Հանրապետութեան հռչակման յոբելեաններն այսօր ոգեշնչման առիթ ու հրաւէր են աշխարհսփիւռ մեր ժողովրդին՝ միասնական ջանքեր բերելու հայրենի մեր պետականութեան զօրացման, Արցախեան խնդրի խաղաղ ու արդարացի կարգաւորման, մեր Արդար Դատի պաշտպանութեան նուիրական գործին: Ինչպէս անցեալում, այնպէս եւ այսօր եւ վաղը բազմաթիւ խնդիրների լուծումը առաւել դիւրին պիտի լինի մեր ժողովրդի հնարաւորութիւնների մէկտեղման շնորհիւ: Մեր միասնութեան առանցքը հայրենի մեր երկիրն ու Առաքելական մեր Սուրբ Եկեղեցին են, որոնց շուրջ համախմբուած՝ մեր զաւակների համար պիտի կառուցենք ապահով, բարօր ու երջանիկ երկիր, պիտի զօրացնենք սփիւռքի համայնքները, հետամուտ լինենք ազգային մեր իղձերի իրականացմանը:
Աղօթում ենք առ Աստուած, որ Երկնաւոր Տէրը խաղաղութեան մէջ պահի մեր երկիրը եւ անսասան` հայրենի մեր պետականութիւնը, հաւատքի մէջ հաստատուն եւ իր տեսիլքներին հաւատարիմ պահպանի մեր ժողովրդին` ի Հայաստան, յԱրցախ եւ ի Սփիւռս:
Շնորհ, սէր եւ խաղաղութիւն Տեառն մերոյ Յիսուսի Քրիստոսի եղիցին ընդ ձեզ եւ ընդ ամենեսեան. ամէն: