ԱՄՆ-էն Հայաստան Ժամանած Պաշտօնեաները Պիտի Աջակցին Հայ-ամերիկեան Տնտեսական Կապերու Խթանման

     Հայ-ամերիկեան առեւտրային պալատը եւ Հայաստանի մէջ ԱՄՆ-ի դեսպանութիւնը համախմբած են գործարար համայնքի ներկայացուցիչները` առաւել մանրամասն ներկայացնելու արտօնեալ եղանակով հայաստանեան ապրանքներու ԱՄՆ արտահանման հնարաւորութիւնները՝ Արտօնութիւններու ընդհանրացուած համակարգ (GSP) միջոցով:

     Համաժողովին՝ բացման խօսքով ելոյթ ունեցած է Հայաստանի մէջ Ամերիկեան առեւտրային պալատի (AmCham)-ի նախագահ Արա Յովսէփեանը, ընդգծելով որ Ամերիկեան առեւտրային պալատը մշտապէս սատարած է հայաստանեան գործարար համայնքը՝ այս համակարգէն օգտուելու հարցով:

     «Այս համակարգը կը նպաստէ տնտեսական աճին` ապահովելով արտօնեալ վարչաձեւով ապրանքներու մուտքը 129 երկիրներէ դէպի Միացեալ Նահանգներ: Հայաստանը այդ  երկիրներու շարքին է, 500-էն աւելի հայկական ապրանքատեսակ, ա՛յս եղանակով կրնայ մուտք գործել ԱՄՆ, առանց  մաքսային վճարներու: Հայկական ընկերութիւնները կ’օգտուին այս համակարգէն, եւ թէ ինչքան յաջող է, չեմ կրնար ըսել, բայց դրական շարժ կայ, գործընթացը լաւ է, ատիկա ակնյայտ է: Միացեալ Նահանգներ ու գործակալութիւնը կ’ուզէ աւելի լուրջ մակարդակի բարձրացնել համագործակցութիւնը եւ խթանել տնտեսական կապերը: Մեր կողմէն կրնամ ըսել, որ ամէն ինչ կը կատարուի, որպէսզի հայ գործարարներուն ներկայացուին այդ բոլոր հնարաւորութիւնները»,- ըսած է ան:

    Հայաստանի մէջ ԱՄՆ դեսպան Ռիչըրտ Միլս, իր հերթին նշած է, որ Հայաստանի գործարարներու եւ պաշտօնատար անձերու հետ քննարկումներ ունենալու, համակարգի հնարաւորութիւնները աւելի ընդլայնուած կերպով ներկայացնելու, Հայաստանէն ԱՄՆ արտահանման ներուժի ընդլայնման նպաստելու համար՝ յատուկ Հայաստան ժամանած է ԱՄՆ Առեւտուրի ներկայացուցիչի առեւտրային քաղաքականութեան ու տնտեսութեան գծով տեղակալ Էտ Կրիսըրը:  

   «Իբրեւ դեսպան՝ ինծի համար թիւ մէկ գերակայութիւնը Հայաստանի մէջ հայամերիկեան գործարար եւ առեւտրային կապերու խորացումն է, եւ, այդ իսկ պատճառով՝ այսօրուան հանդիպումը շատ մեծ կարեւորութիւն ունի: Հայաստանի մէջ, շատ առումներով առաջընթաց եղած է, սակայն, այս ծրագիրը իսկապէս կարեւոր է հայաստանեան գործարար համայնքին համար, որ կրնայ էապէս մեծցնել մեր երկիրներուն միջեւ առեւտրաշրջանառութեան ծաւալը: Հայաստանի արտահանումներու 60 տոկոսը կը մտնէ Միացեալ Նահանգներ՝ GSP ծրագիրին միջոցով: Այդ ապրանքներէն են ոսկերչական իրերը, անուշը եւ այլ արտադրատեսակներ»,- ըսած է դեսպանը:

     Ասիկա երկրորդ համաժողովն է Հայաստանի մէջ, որ կ’անդրադառնայ GSP արտօնեալ առեւտրային վարչաձեւին հետ կապուած հարցերուն` շարունակելով այն քննարկումները, որ 2016-ին՝ թեմային շուրջ սկսած էր GSP ծրագիրի տնօրէն Այմի Լարսէնը: Արտօնեալ առեւտրային վարչաձեւի GSP ծրագիրը սահմանուած է Առեւտուրի մասին 1974-ի օրէնքով եւ նպատակ ունի խթանելու տնտեսական աճը՝ զարգացող երկիրներու մէջ: Ծրագիրին ներքոյ, 3451 ապրանքատեսակ 129 շահառու երկիրներէ ու տարածքներէ, ներառեալ` Հայաստանէն, կրնայ ԱՄՆ ներմուծուիլ արտօնեալ պայմաններով` առանց մաքսային վճարներու: Քանի որ Հայաստանը ծրագիրի շահառու է, հայաստանեան ապրանքներու գերակշիռ մասը 2012-2016 ԱՄՆ մուտք գործած են GSP արտօնեալ եղանակով: Ներկայիս, GSP-ի ծիրէն ներս, Հայաստանէն ԱՄՆ արտահանուող ապրանքներուն ծաւալը կը գնահատուի 25 միլիոն ԱՄՆ տոլարի սահմաններուն մէջ:

 

 

Leave a Reply

Your email address will not be published. Required fields are marked *