Մշակույթի ոլորտի ավելի քան քառասուն մասնագետ ԱՊՀ տարբեր երկրներից ժամանել է Հայաստան մասնակցելու «Ազգային ոճը։ Ժողովրդական ավանդույթից դեպի պրոֆեսիոնալ արվեստ» խորագրով միջազգային գիտաժողովին: Եռօրյա գիտաժողովի շրջանակում մասնակիցներն ընթերցելու են 38 զեկույց` փորձելով ներկայացնել, թե ինչպես է ժողովրդական, ավանդական մշակույթն ազդեցություն թողել պրոֆեսիոնալ արվեստի զարգացման վրա:
«Արմենպրես»-ի հաղորդմամբ` գիտաժողովը, որն անցկացվում է «Համագործակցության ժառանգությունը: Ավանդույթներն ապագայի համար» երկարամյա միջպետական ծրագրի շրջանակում, մեկնարկեց հոկտեմբերի 29-ին Արամ Խաչատրյանի տուն-թանգարանում:
Երևանի Ռուսական արվեստի թանգարանի տնօրեն Մարինե Մկրտչյանը նշեց, որ շատ հետաքրքիր է իմանալ, թե ինչպես է ավանդական մշակույթը դարձել օրինակ Ղրղզստանի, Ուզբեկստանի և այլ ԱՊՀ երկրների պրոֆեսիոնալ արվեստի հիմք: «Հայաստանից Համլետ Պետրոսյանը գիտաժողովին խոսելու է խաչքարային արվեստի մասին, Հասմիկ Ղազարյանը` հայկական կարպետի մասին: Կարծում եմ` նման նախաձեռնությունները փորձի փոխանակման լավ հարթակ են և թանգարանների, մասնագետների միջև համագործակցության ուղիներ են բացում»,- ասաց նա:
Մկրտչյանը տեղեկացրեց, որ մասնակիցներ կան Մոլդովայից, Բելառուսից, Ղազախստանից, Ուզբեկստանից, Ղրղզստանից, Ռուսաստանից և մի շարք այլ ԱՊՀ երկրներից: Մասնագետներ կան նաև Ուկրաինայից:
Մարինե Մկրտչյանի խոսքով` ծրագրի շրջանակում հյուրերն այցելելու են Հայոց ազգագրության և ազատագրական պայքարի պատմության «Սարդարապատ» ազգային թանգարան, որտեղ Կոմիտասի 150-ամյակին նվիրված համերգ է կազմակերպվելու, լինելու են «Արարատ» թանգարանում, «Զվարթնոց» պատմամշակութային արգելոց-թանգարանում, որտեղ նույնպես մասնակցելու են համերգային ծրագրի: Հյուրերը հնարավորություն կունենան ավտոբուսով շրջել ամբողջ Երևանով` ծանոթանալով քաղաքի տեսարժան վայրերին:
Մկրտչյանը շնորհակալություն հայտնեց բոլոր թանգարանների տնօրեններին իրենց պատրաստակամ ընդունելու համար: Նա շնորհակալություն հայտնեց Արամ Խաչատրյանի տուն-թանգարանի տնօրինությանը գիտաժողովն այնտեղ կազմակերպելու համար, ինչպես նաև «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ին:
Ծրագրի շրջանակում գիտաժողովին ընդառաջ Ռուսական արվեստի թանգարանում հոկտեմբերի 28-ին բացվել է «Ինչպես է ծնվում գլուխգործոցը» ցուցահանդեսը: Նախաձեռնողը և հեղինակը Դեկորատիվ-կիրառական և ժողովրդական արվեստի համառուսաստանյան թանգարանն է։ Ըստ «Համագործակցության ժառանգությունը: Ավանդույթներն ապագայի համար» երկարամյա միջպետական ծրագրի հայեցակարգի՝ յուրաքանչյուր տարի փոխվում է գործընկեր-երկիրը, որն ընդունում է ցուցահանդեսը և միջազգային գիտաժողովը` ԱՊՀ երկրների առաջատար մասնագետների մասնակցությամբ։
Ծրագիրն արդեն իրականացվել է ԱՊՀ մի շարք երկրներում։
2019 թվականին հյուրընկալող երկիր է ընտրվել Հայաստանի Հանրապետությունը` Երևանի Ռուսական արվեստի թանգարանը (պրոֆ. Ա. Աբրահամյանի հավաքածու)։
Ծրագրի կազմակերպիչներն են Դեկորատիվ-կիրառական և ժողովրդական արվեստի համառուսաստանյան թանգարանը, Ռուսական արվեստի թանգարանը (պրոֆ. Ա. Աբրահամյանի հավաքածու):
Աջակիցներն են ՀՀ կրթության, գիտության, մշակույթի և սպորտի նախարարությունը, Ռուսաստանի Դաշնության մշակույթի նախարարությունը: Նախաձեռնությունն իրականացվում է Հումանիտար համագործակցության միջպետական հիմնադրամի շրջանակում։