«ԶԱՐԹՕՆՔ», ՊԷՅՐՈՒԹ – Հանրապետութեան նախագահ Արմէն Սարգսեան Մարտ 15-ին ընդունած է Համաշխարհային դրամատան Եւրոպայի եւ Կեդրոնական Ասիոյ տարածաշրջանի փոխնախագահ Սիրիլ Միւլլերի գլխաւորած պատուիրակութիւնը:
Ինչպէս կը հաղորդեն Հայաստանի Հանրապետութեան նախագահի աշխատակազմի հասարակայնութեան հետ կապերու վարչութենէն, նշելով, որ Համաշխարհային դրամատունը եւ Հայաստանը ունին գործընկերութեան հարուստ պատմութիւն՝ ՀԴ-ի փոխնախագահ Միւլլերը յիշած է Արմէն Սարգսեանի հետ իրենց հանդիպումը դեռ 1996 թուականին: Այդ ժամանակ ինքը Հայաստանի տնտեսութեան զարգացումի ռազմավարական ուղղութիւններուն վերաբերեալ Համաշխարհային դրամատան առաջին փաստաթուղթը ներկայացուցած է Հայաստանի ատենի վարչապետ Արմէն Սարգսեանին:
Հանրապետութեան նախագահը կարեւորած է Համաշխարհային դրամատան հետ Հայաստանի գործընկերութիւնը տարբեր ոլորտներուն մէջ եւ յոյս յայտնած, որ ձեւաւորուած գործակցութիւնը յառաջիկային եւս պիտի շարունակուի արդիւնաւէտօրէն:
Զրուցակիցները անդրադարձած են իրականացուող ընթացիկ ծրագիրներուն, ինչպէս նաեւ Համաշխարհային դրամատան եւ Հայաստանի յառաջիկայ չորս տարուան գործակցութեան առաջնահերթութիւնները սահմանող «Երկրի գործընկերութեան շրջանակ» ռազմավարական փաստաթուղթին:
Երկուստեք համակարծիք եղած են, որ բարձր արհեստագիտութիւններու, կրթության, զբօսաշրջութեան, գիւղատնտեսութեան ոլորտներուն մէջ կան գործակցութեան մեծ ներուժ եւ համատեղ տարածաշրջանային ծրագիրներ իրականացնելու հնարաւորութիւններ: