Ինչպէս նախապէս հաղորդած էինք, 4 Յուլիս 2017-ի առաւօտեան ժամը 10:00-ին, ՀՀ Սփիւռքի նախարար Հրանոյշ Յակոբեան ընդունեց Թէքէեան Մշակութային Միութեան հիմնադրութեան 70-ամեակը նշելու ծիրէն ներս Հայաստան գտնուող ԹՄՄ Լիբանանի Տեղական Վարչութեան անդամները, լիբանանցի պատանի երաժիշտներ, ինչպէս նաեւ լիբանանահայ արուեստագէտներու ընտանիք մը: Խումբին կ՛ընկերանար նաեւ, այս առիթով Երեւան գտնուող, «Զարթօնք» օրաթերթի գլխաւոր խմբագիր Սեւակ Յակոբեանը:
Այս առիթով ՀՀ Սփիւռքի Նախարար Հրանոյշ Յակոբեան հետեւեալ խօսքը ուղղեց իր հիւրերուն.
Մեծարգո՛յ Պարոն Վիգէն Ասիլեան,
«Զարթօնք» օրաթերթի յարգելի՛ գլխաւոր խմբագիր Սեւակ Յակոբեան,
Յարգելի՛ հիւրեր,
Բարով էք եկել Հայաստան` լիբանանահայերի համար` Մայր Հայրենիք, իսկ մեր արաբ բարեկամների համար` հիւրընկալ օճախ:
Սիրելի՛ լիբանանցիներ,
Բոլորիդ է յայտնի, որ հայ-լիբանանեան բարեկամութիւնը դարերի պատմութիւն ունի, եւ այդ դարերի ընթացքում 2 ժողովուրդների մտերմութիւնը եւ բարեկամութիւնը աւելի է խորացել: Հայ ժողովուրդը երախտագէտ ժողովուրդ է եւ միշտ էլ դրսեւորել է անսահման շնորհակալ վերաբերմունք Լիբանանի ժողովրդի հանդէպ: Մեր ժողովուրդների բաերկամութիւնը յատկապէս խորացաւ Հայոց ցեղասպանութիւնից յետոյ, երբ Լիբանանի հիւրընկալ մարդիկ իրենց սրտի դռները լայնօրէն բացեցին ցեղասպանութիւնից մազապուրծ մեր հայրենակիցների առջեւ եւ հնարաւոր բոլոր պայմանները ստեղծեցին` ապրելու, աշխատելու, կայանալու եւ զարգանալու համար: Եւ պատահական չեմ համարում, որ այսօր Լիբանանում ապրող մեր հայրենակիցները դարձել են Լիբանանի լաւագոյն քաղաքացիներ եւ ուս-ուսի իրենց արաբ բարեկամների հետ կառուցում եւ գեղեցկացնում են այն գեղեցիկ Լիբանանը, որը մենք տեսնում ենք այսօր:
Յայտնի է, որ ժողովուրդների բարեկամութիւնը կամրջող լաւագոյն գործիքը մշակոյթն է: Ուրախալի է, որ հայերի եւ լիբանանցիների մշակութային կապերը միշտ առաջընթաց են ապրում, հզօրանում եւ զարգանում: Ասուածի վառ ապացոյցը Թէքէեան Մշակութային Միութեան 70-ամեայ արդիւնաւէտ գործունէութիւնն է եւ այն եղբայրական համագործակցութիւնը, որ միութեան ջանքերով ստեղծուել է արաբ երաժիշտների եւ մասնագէտների հետ:
Մենք հպարտութեամբ ենք նշում Թէքէեան Մշակութային Միութեան 70-ամեայ յոբելեանը, որն այսօր յատկապէս իմաստաւորւում է մեր սիրելի ընկեր Վիգէն Ասիլեանի ակտիւ, համարձակ, ճիշդ եւ նպատակասլաց գործունէութեամբ: Ինչպէս ասում են, սա այն դէպքն է, որ երբ ոչ թէ աթոռն է գեղեցկացնում մարդուն, այլ հակառակը` մարդն է գեղեցկացնում այն: Վիգէնի մարդկային նկարագիրը լաւագոյնս է ծանօթ մեզ եւ մեր աշխատակիցներին, քանի որ մեր աշխատակիցների` Լիբանանում սովորելու օրերին Վիգէնը դրսեւորել է իսկական հայրական, եղբայրական հոգատարութիւն նրանց հանդէպ:
Ուզում եմ դրուատանքի խօսքեր ասել նաեւ «Զարթօնք» օրաթերթի գլխաւոր խմբագիր, սիրելի Սեւակ Յակոբեանին` նրա արհեստավարժ, սրտացաւ եւ հայրենիքի հանդէպ անթաքոյց սիրով դրսեւորուող նրա կատարած աշխատանքի համար: Կարծում եմ, որ «Զարթօնք» օրաթերթը Սեւակի խմբագրութեամբ էլ աւելի մեծ զարթօնք ապրեց:
Սիրով ողջունում եմ նաեւ, մեր լիբանանցի արաբ երաժիշտներին` հայկական երաժշտութիւնը սիրելու, իրենցը համարելու եւ սրտի թելադրանքով այն կատարելու համար: Այս իրողութեան մէջ խորը իմաստ կայ թաքնուած. լիբանանցի մեր երաժիշտները իրենց կատարումներով բացայայտում են իրենց սիրառատ ու ջերմ վերաբերմունքը ոչ միայն հայկական երաժշտութեան, այլեւ հայութեան նկատմամբ առհասարակ: Այս գեղեցիկ տղաներն ու աղջիկները Մեծն Կոմիտասի, Արամ Խաչատրեանի, Առնօ Բաբաջանեանի ստեղծագործութիւնների կատարումով իրենց ազգակիցներին եւս ներարկում են ջերմ ու սրտալի վերաբերմունք Հայաստանի եւ հայութեան հանդէպ:
Այս համերգը իր նշանակութեամբ բարձր է սովորական համերգային ծրագրից, քանի որ Երեւանի պատմութեան թանգարանում կազմակերպուող «4 Սերունդներ. Վճռականութեան Ոգին» խորագրով նկարչական ցուցահանդէսը այս համերգի հետ միասին կարելի է համարել Լիբանանեան օրերի անցկացում Հայաստանում: Լենա Այտընեանի եւ նրա ընտանիքի 4 սերունդների նկարները, բացի հետաքրքիր ցուցադրութիւն լինելուց, նաեւ հայ-արաբական եղբայրական ջերմ յարաբերութիւնների արտացոլումն է:
Ուզում եմ իմ շնորհակալութիւնը յայտնել նաեւ արաբ երաժիշտների ծողներին, որոնք սիրով համաձայնել են իրենց երեխաների` հայկական երաժշտութեան կատարման գաղափարին եւ այս կարեւոր բարեկամական ձեռնարկին աջակցելու համար:
Բարի երթ Լիբանանեան օրերին Հայաստանում…