ՀՀ կառավարութիւնը ներկայացուցած է 3,2 միլիառ տոլարի ներդրումային ծրագիր, որուն աղբիւրը, ոլորտները ամբողջութեամբ յստակեցուած են: 830 միլիոն տոլարի ծրագիրները կը նախատեսուին սկսիլ 2017 թուականին: Այս մասին Սիսիանի մէջ յայտարարած է Հայաստանի վարչապետ Կարէն Կարապետեան:
«830 միլիոնէն 55 միլիոն տոլարի ծրագիրները կ՛առնչուին Սիւնիքի մարզին: Յստակ գիտենք, թէ այդ միջոցները որ ուղղութեամբ պէտք է ներդրուին: Սիւնիքի հետ կապուած շեշտը պիտի դրուի հանքարդիւնաբերութեան, անասնապահութեան, գիւղատնտեսութեան միւս ճիւղերուն, ինչպէս նաեւ գործարարութիւնը իրանական շուկայ ուղղելու վրայ: Այս պահուն կը բանակցինք Իրանի հետ Մեղրիի մէջ ազատ տնտեսական գօտի ստեղծելու ուղղութեամբ, որ պիտի ըլլայ պետութիւն-մասնաւոր հատուած համագործակցութեամբ»,- «Արմենփրես»-ի հաղորդմամբ` ըսած է վարչապետը:
Կարէն Կարապետեանի տեղեկացմամբ, իրանական գործընկերներու հետ պիտի ստեղծուի նաեւ արտահանող ընկերութիւն, որ հայկական շուկայէն պիտի գնէ ապրանքը եւ արտահանէ Իրան: Ապրանքներու որակաւորման խնդրի լուծման նպատակով Հայաստան պիտի ներգրաւուի իրանական «Հալալ»-ի հիմնարկը: «Մենք յստակ կը հասկնանք, թէ ուր պիտի երթանք»,- ընդգծած է Կարէն Կարապետեան: