Ամերիկեան հեղինակաւոր «Forbes» հանդէսը հրապարակած է 2018-ի միլիառատէրերու վարկանիշային աղիւսակը, ուր ընդգրկուած աշխարհի ամենահարուստ մարդոց շարքին կան նաեւ հայեր, կը հաղորդէ «Թերթ»-ը:
Մեծահարուստներու ցանկի 606-րդ տեղը յայտնուած է «Տաշիր» ընկերութիւններու խումբի հիմնադիր եւ նախագահ Սամուէլ Կարապետեանը: Անոր կարողութիւնը ամսագիրը գնահատած է 3.7 միլիառ տոլար:
Ռուսաստանաբնակ հայ գործարար Սերկէյ Գալիցկին (Յարութիւնեան), որուն կը պատկանի «Մագնիտ» խանութներու ցանցը, յայտնուած է ցուցակի 550-րդ տեղը` 4 միլիառ տոլար կարողութեամբ:
Մէկ այլ յայտնի հայ գործարար Էտուարտօ Էռնեկեանը, որ կը բնակի Արժանթին, ընդգրկուած է «Forbes»-ի ցանկի 887-րդ տեղը: Անոր կարողութիւնը կը գնահատուի 2.7 միլիառ տոլար:
«Միլիառատէրեր 2018» վարկանշային աղիւսակի առաջատարը Amazon-ի հիմնադիր, ամերիկացի գործարար Ճեֆ Պեզոսն է, որուն կարողութիւնը կը գնահատուի 112 միլիառ տոլար: Անոր կը յաջորդէ Microsoft-ի հիմնադիր Պիլ Կէյթսը` 90 միլիառ տոլարով։