Category: Լուրեր

Բասկետբոլի Հայաստանի կանոնավոր առաջնության «Լիգա Ա»-ի առաջին տուրն արդեն պատմություն է: Վերջապես Հայաստանում էլ կանցկացվի բասկետբոլի կանոնավոր առաջնություն: Մինչ այս ֆեդերացիան սկսել էր նաև 16 տարեկանների առաջնությունը: Բայց մինչ առաջնությունը սկսի հունի մեջ ընկնել ու, գուցե և, կարող է դիտարժան դառնալ, ինչը չես ասի առաջին տուրի խաղերի մասին, «Լիգա Ա»-ի կազմակերպիչները շատ անելիքներ ունեն:

Իսկ «Լիգա Ա»-ին չի ՞ «սպառնում» «Ուրարտու»-ի ճակատագիրը…

Միանշանակ պատասխանել այս հարցին դժվար է: Ինչպես «Ուրարտու»-ի դեպքում, «Լիգա Ա»-ն ևս մեծ ներդրումներ է պահանջում: Ֆեդերացիան այժմ  օգնության ձեռք է մեկնում այն թիմերին, որոնք չունեն մարզահագուստ և մարզագույք: Բայց, 7 թիմերից, որոնք մասնակցում են առաջնությանը, մի քանիսն են «լուսավոր ապագա»  խոստանում: «Լիգա Ա»-ի խնդիրներից  է մրցավարների՝ միջազգային կարգին չհամապատասխանելը: Հայաստանում կա 12 բասկետբոլային մրցավար, սակայն ոչ մեկը միջազգային կարգ չունի:

Դահլիճները և դիտարժանությունը…

Առաջնության խաղերը անցկացվում են մի քանի դահլիճներում, որոնք հիմնականում նախատեսված չեն երկրպագուների համար: Օլիմպավանի դահլիճը բարձրակարգ է, նորագույն կահույքով, բայց այն նախատեսված է մարզումների համար:  Իհարկե, կան երկրպագուների համար նախատեսված հատվածներ, որոնք սակայն քիչ են, և  օրինակի համար, առաջնության առաջին տուրում բասկետբոլիստների համար նախատեսված նստարաններին նստել էին երկրպագուները: Կամ,  «Արթիկ»-«Արցախ» հանդիպումն անցկացվեց Արթիկի մարզադպրոցի մարզադահլիճում, որը Խորհրդային Հայաստանից մնացած «ժառանգություն է», և գտնվում է անմխիթար վիճակում: «Արցախ»-ն էլ իր հանդիպումները կանցկացնի Ստեփանակերտում, որտեղ հնարավոր է մոտ ապագայում 1300 երկրպագուների համար նախատեսված հատուկ մարզադահլիճ կկառուցվի: Առաջնությանը, սակայն կարող ենք հետևել նաև համացանցի միջոցով: Vsport կհեռարձակի տուրի խաղերը:

Թիմերը…

Ինչպես  նշեցինք, Հայաստանի առաջնությանը մասնակցում են 7 թիմեր և յուրաքանչյուր տուրում մեկ թիմ չի խաղում: Առաջին տուրում չկար «Գրանդ Սպորտ»-ը:

«Ուրարտու».

Սա այն նույն թիմն է, որ խաղում էր ռուսական Սուպերլիգայում, սակայն թիմում հին կազմից մնացել են միայն 4 բասկետբոլիստներ՝ Նիկիտա Զախարովը, Էդգար Բաբայանը, Միքայել Պողոսյանը և Կարեն Հայրապետյանը: «Ուրարտու»-ն համալրում ունի նաև հավաքականից՝ կենտրոնական Արարատ Քոչինյանը: Բացի նրանից, Եվրոպայի մինչև 16 տարեկանների C դիվիզիոնի հաղթողներից երևանյան ակումբում խաղում են նաև Լևոն Վաթյանը, Հովհաննես Պողոսյանը և Դավիթ Քարամյանը:

ՖԻՄԱ

Ֆիզիկական կուլտուրայի հայկական պետական ինստիտուտի թիմն ամենաերիտասարդներից մեկն է: Բայց ակումբի հիմնական խաղացողները միմյանց հետ խաղալու փորձ ունեն, իսկ համալրումները մինչև 18 տարեկանների հավաքականից (Արման Դանիելյան, Վլադ Հարությունյան) կարող են ՖԻՄԱ-ին դարձնել առաջնության ֆավորիտ թիմերից մեկը:

«Շիրակ»

 Գյումրեցիներն առաջիններից էին, ովքեր դրական արձագանքեցին «Լիգա Ա»-ում իրենց թիմն ունենալուն: «Շիրակ»-ը դեռևս ձևավորման փուլում է, բայց տուրի առաջին խաղում ունեցած հաղթանակից («Ինժեներ»-ի նկատմամբ) չես կարող հաստատ պատկերացում կազմել «Շիրակ»-ի ապագայի հարցում:

«Արցախ»

Ստեփանակերտը ներկայացնող թիմի կազմը թույլ է տալիս «Արցախ»-ին ֆավորիտների շարքին դասել: «Արցախցիների» կազմում հանդես է գալիս Հայաստանի Մ18 տարեկանների ավագը՝ Գեորգի Պոդկոլզինը: Խաղային յուրահատուկ տեմպ և որակ «Արցախ»-ի խաղին կհաղորդեն նաև Ալեքս Սիմոնովիչը, Դանիելո Դուկը: Խոսակցությունների համաձայն «Արցախ»-ը շարունակելու է համալրել կազմը առաջնության ընթացքում ևս:

«Գրանդ Սպորտ»

Այս ակումբում հանդես են գալիս «Գրանդ Սպորտ»-ի սաները, ովքեր ևս երիտասարդ կազմ ունեն, բայց միմյանց գիտեն դաշտում: Այս ակումբի «հաղթաթղթերից» կարող են դառնալ հայր և որդի Խաչատրյանները:

«Ինժեներ»

Այս ակումբն համալրված է հայկական բասկետբոլի վետերաններով: Սակայն «Ինժեներ»-ին առաջնության մրցանակային տեղերի համար պայքարելու  ֆավորիտ չես համարի, դա հաստատ է:

«Արթիկ»

Շիրակի մարզը ներկայացնող երկրորդ թիմը կարող է պայքարել փլեյ-օֆֆի 4 ուղեգրերից մեկի համար: «Արթիկ»-ում են խաղում կենտրոնական Արման Հակոբյանը և պաշտպան Արտավազդ Ղռաթյանը:

 

 

Հայաստանի առաջնությունը նոր է սկսվել, և թե որքան «ջրեր կհոսեն», ցույց կտա ժամանակը, բայց լավ հեռանկարի համար պետք է լավ հիմք դնել, այսինքն՝ անհրաժեշտ է առաջնությունը   զարգացնել  հետևողական աշխատանքով: 

Վարվառա Հայրապետյան

Լուսանկարները՝ Բասկետբոլի ֆեդերացիայի

 

ՀՀ քննչական կոմիտեի Տավուշի մարզային քննչական վարչության Դիլիջանի քննչական բաժնում ձեռնարկված ակտիվ  քննչական և դատավարական այլ գործողությունների արդյունքում  պարզվել են «Դիլիջան ազգային պարկ»-ի տարածքում պահնորդական ծառայություն իրականացնող ընկերության անշարժ հենակետ հանդիսացող վագոն-տնակը հրկիզած անձանց ինքնությունը։ Այս մասին «Արմենպրես»-ին տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից:

Ավելի վաղ տեղեկացրել ենք, որ 2017 թվականի հոկտեմբերի 13-ին՝ ժամը 20:50-ի սահմաններում, մի խումբ անձինք հարձակվել են «Դիլիջան ազգային պարկ» ՊՈԱԿ-ի Շամախյան տեղամասում «Պանտերա  սիքյուրիթի» ՍՊ ընկերության պահնորդական ծառայություն իրականացնող երկու աշխատակիցների վրա, հրկիզել ընկերության հսկիչ անցագրային հենակետ հանդիսացող վագոն-տնակը և դիմել փախուստի:

Կատարված մեծածավալ քննչական գործողությունների արդյունքում փաստական տվյալներ են ձեռք բերվել, որ հրկիզմանն անմիջական մասնակցություն է ունեցել երկու անձ, պարզվել է նրանց ինքնությունը, որոնցից մեկն այսօր ձերբակալվել է՝ հրկիզելու եղանակով ուրիշի գույքը դիտավորյալ ոչնչացնելու կասկածանքով, իսկ մյուսին հայտնաբերելու և վարույթն իրականացնող մարմնին ներայացնելու վերաբերյալ հանձնարարություն է տրվել ոստիկանության համապատասխան ստորաբաժանումներին։

Բացի այդ, ևս մեկ անձ ձերբակալվել է՝ ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված արարք կատարելու կասկածանքով (խուլիգանություն, որը կատարվել է մի խումբ անձանց կամ կազմակերպված խմբի կողմից): Եվս մեկին հոկտեմբերի 19-ին էր մեղադրանք առաջադրվել՝ ՀՀ  քրեական օրենսգրքի 258-րդ հոդվածի 3-րդ մասի 1-ին կետով, և նրա նկատմամբ որպես խափանման միջոց էր ընտրվել կալանավորումը:

Նախաքննությունը շարունակվում է։ Քննություն է տարվում՝ դեպքին մասնակից բոլոր անձանց ինքնությունը պարզելու, նրանցից յուրաքանչյուրի գործողություններն անհատականացնելու  ուղղությամբ։ 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Բարև ձեզ, «Արմենպրես» պետական լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:

Հայաստանն ու Խորվաթիան զարգացնում ու ակտիվացնում են տնտեսական և արդյունաբերական համագործակցությունը: Այսօր՝ հոկտեմբերի 26-ին, կայանալիք ՀՀ կառավարության նիստին գործադիրը կքննարկի «Հայաստանի և Խորվաթիայի կառավարությունների միջև տնտեսական համագործակցության մասին» համաձայնագրի կնքման առաջարկությունը:Այս և 2 տասնյակ այլ հարցեր ներառված են նիստի օրակարգում:

Այսօր խորհրդարանը կշարունակի իր աշխատանքները: Պատգամավորների օրակարգում կլինի «Պաշտպանության մասին» օրենքի նախագիծը, որն առաջին ընթերցմամբ քննարկման է ներկայացրել ՀՀ պաշտպանության նախարար Վիգեն Սարգսյանը:

Հայաստանում են ռուս գործարարները, մասնավորապես, Ռուսաստանի Կուրգանի, Վլադիմիրի և Տամբովի մարզերից ժամանած ընկերությունների  ներկայացուցիչները: Երևանում կազմակերպվող Հայ-ռուսական բիզնես ֆորումի շրջանակում գործընկերներ կփնտրեն Հայաստանի և Ռուսաստանի գործարարները: Բիզնես ֆորումն անցկացվում է Երևանի առևտրաարդյունաբերական պալատի և «ԻՎԵՆՍԵՆԹՐ» միջոցառումների սպասարկման կենտրոնի կողմից:

Միջազգային և անվտանգության հարցերի հայկական ինստիտուտում տեղի կունենա «Հայաստան-ԵՄ. ի՞նչ կա Հայաստան-ԵՄ համաձայնագրում (ՀԸԳԳ) ու դրա ստորագրումից անդին» խորագրով փորձագիտական քննարկում: Այն կընթանա փորձագիտական ճեպազրույցի ձևաչափով՝ առանց գլխավոր բանախոսների: Քննարկման մասնակիցները կանդրադառնան Հայաստանի և ԵՄ-ի միջև նոյեմբերի 24-ին Բրյուսելում ստորագրվելիք Համապարփակ և ընդլայնված գործընկերության համաձայնագրի տարբեր բաժիններում ամրագրված համագործակցության ու գործընկերության նպատակներին ու գործողությունների ծրագրին:

Այսօր նախատեսված Երևան-Աստանա-Բիշքեկ-Մինսկ տեսակամուրջի շրջանակում կամփոփվեն Եվրասիական միջկառավարական խորհրդի նիստի արդյունքները: Հոկտեմբերի 25-ին Երևանում կայացել է Եվրասիական միջկառավարական խորհրդի նիստը Եվրասիական տնտեսական միության անդամ երկրների կառավարությունների ղեկավարների մասնակցությամբ:

Ավետիք Իսահակյանի անվան կենտրոնական գրադարանում տեղի կունենա «Նռան հատիկ» փառատոնի մեկնարկային ասուլիսը։ Կմասնակցեն «Նախաբեմ» կրթամշակութային ասոցիացիա» ՀԿ նախագահը, «Նռան հատիկ» հանրապետական մանկապատանեկան թատերական փառատոնի պատվավոր նախագահ և Իսահակյանի անվան գրադարանի տնօրենը և այլք:

Հոկտեմբերի 26-ից-նոյեմբերի 3-ըկանցկացվի «Yerevan Jazz Fest 2017»-ը  փառատոնը: «Yerevan Jazz Fest 2017»-ը նվիրված է հայտնի Zildjian բրենդի հիմնադիր Ավեդիս Զիլիդջյանին, ով սկիզբ է դրել համաշխարհային ճանաչում ունեցող հարվածային գործիքների ծնծղաների արտադրությանը: Փառատոնն անցկացվում է ՀՀ վարչապետ Կարեն Կարապետյանի հովանու ներքո: Մինչ փառատոնը հրավիրված ասուլիսին հանրահայտ կոմպոզիտոր, գործիքավորող, երաժիշտ Մարկուս Միլլերը, Լևոն Մալխասյանը, Արտո Թունջբոյաջյանը և այլք կներկայացնեն մանրամասներ:

Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:

Ճանապարհային ոստիկանությունը տեղեկացնում է, որ 2017թ. հոկտեմբերի 30-ից Երևան քաղաքի Տիգրան Մեծ փողոցի 9-րդ հասցեի դիմաց կգործարկվի հեռակառավարվող տեսախցիկ: Ինչպես «Արմենպրես»-ին տեղեկացրին ոստիկանության լրատվության եւ հասարակայնության հետ կապերի բաժնից, տեսախցիկի միջոցով հսկողություն կիրականացվի տվյալ հատվածում երթևեկության կանոնների պահպանման ուղղությամբ, մասնավորապես՝ կանգառի կանոնների խախտումների նկատմամբ:
Ճանապարհային ոստիկանությունը հորդորում է վարորդներին պահպանել ճանապարհային երթևեկության կանոնները:

ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում քննվող քրեական գործով միջոցներ են ձեռնարկվում՝ պարզելու հագուստի խանութից  քաղաքացու բջջային հեռախոսը հափշտակած անձի ինքնությունը։ Այս մասին «Արմենպրես»-ին տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից:

Նախնական տվյալներով՝ 2017թ. սեպտեմբերի 27-ին՝ ժամը 17:00-ի սահմաններում, ենթադրյալ հանցագործություն կատարած անձը, Երևանում գործող հագուստի խանութներից մեկից գաղտնի հափշտակել է քաղաքացու «ՀՏՍ» տեսակի բջջային հեռախոսը:

Դեպքի առթիվ հարուցվել է քրեական գործ՝ ՀՀ քրեական օրենսգրքի 177-րդ հոդվածի 1-ին մասի հատկանիշներով, որով նախաքննությունն իրականացվում է Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում:

Նախաքննության ընթացքում ստացվել են հագուստի խանութի անվտանգության տեսախցիկների՝ տվյալ օրվա տեսագրությունները, ենթարկվել զննության: Տեսանյութի մեջ երեւում է, թե ինչպես է երիտասարդ մի կին վերցնում հագուստների մոտ դրված հեռախոսը եւ հեռանում։

Քրեական գործով բազմակողմանի, օբյեկտիվ և լրիվ քննությունն ապահովելու նպատակով միջոցներ են ձեռնարկվում՝ տեսանյութում պատկերված կնոջը հայտնաբերելու ուղղությամբ։

Խնդրում ենք նշված անձին ներկայանալ վարույթն իրականացնող մարմնին կամ ովքեր ճանաչում են նրան, որևէ տեղեկություն ունեն նրա ինքնության կամ գտնվելու վայրի մասին, հայտնեն ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժին:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Հ գլխավոր դատախազ Արթուր Դավթյանը դիմել է ՀՀ առողջապահության նախարար Լևոն Ալթունյանին՝ տնային մահացությունների դեպքերում մարդու կյանքի դեմ ուղղված ոտնձգությունների չհայտնաբերման կամ ոչ լիարժեք բացահայտման հանգեցնող գործոնների վերացման նպատակով փոփոխություններ կատարել դատաբժշկական փորձաքննությունների և ախտաբանաանատոմիական հերձումների կազմակերպման գործընթացում: Այս մասին «Արմենպրես»-ին տեղեկացրին ՀՀ դատախազության հանրային կապերի բաժնից:

ՀՀ դատախազությունն ուսումնասիրություն է կատարել Հայաստանում տնային մահացությունների ոլորտում՝ հանգելով այն եզրակացության, որ քրեական վարույթի շրջանակներում ստուգում պահանջող որոշ դեպքեր դուրս են մնում իրավապահ մարմինների տեսադաշտից: 

Ախտաբանաանատոմիական հաստատությունում դիահերձումն իրականացնող  լիցենզավորված մասնագետները դատաբժշկական բնագավառի մասնագետներ չեն հանդիսանում և չեն կարող դիահերձման արդյունքում անհրաժեշտ արդյունավետությամբ հայտնաբերել ենթադրյալ հանցագործության մասին վկայող հետքեր: Չնայած ՀՀ կառավարության համապատասխան որոշմամբ հաստատված ախտաբանաանատոմիական հերձումների անցկացման կարգով որոշակի առումով նախատեսված է հերձման ընթացքում առերևույթ հանցագործության հետքեր հայտնաբերելիս համապատասխան միջոցների ձեռնարկման ընթացակարգ, սակայն ոլորտը կարգավորող նորմերի կիրառումը լիարժեք չի ապահովում դիահերձման ընթացքում հանցագործությունների հետքերի հայտնաբերման անհրաժեշտ պայմաններ: 

Ավելին, ուսումնասիրությամբ պարզվել է, որ ՀՀ ոչ բոլոր տարածքներում  են ապահովված ախտաբանաանատոմիական հերձումների համար անհրաժեշտ պայմաններ: Բացի այդ, թեև տվյալ կարգը չի նախատեսում հերձումից մասնակի հրաժարման հնարավորություն, սակայն գործնականում պարզվել են նման դեպքեր: Մասնավորապես՝ արձանագրվել է դեպք, երբ հարազատի դիմումի հիման վրա չի հերձվել դիակի գլուխը, ինչը հետագայում խոչընդոտ է առաջացրել քրեական վարույթի ընթացքում դեպքի իրական հանգամանքները պարզելու հարցում: Արդյունքում ձեռք չի բերվել գործի համար կարևոր նշանակություն ունեցող ապացույցը, առանց որի չի կարող հաստատված համարվել մահվան պատճառը, առողջությանը հասցված վնասի ծանրության աստիճանը և պատճառման մեխանիզմը: Ներկայիս կարգավորման պայմաններում մահվան փաստը հաստատող հաստատությունը կամ դիակային բրիգադը ՀՀ ոչ բոլոր տարածքներում են հագեցված համապատասխան ձեռնահաս մասնագետով և սարքավորումներով: 

Ելնելով ուսումնասիրությամբ ի հայտ բերված այս հիմնահարցերից  և հաշվի առնելով ընտանեկան բռնությունների լատենտայնության հավանականությունը՝ ՀՀ գլխավոր դատախազը մի քանի գործնական առաջարկ է ներկայացրել ՀՀ առողջապահության նախարարին: 

Մասնավորապես՝ առաջարկվել է միջոցներ ձեռնարկել տանը, ստացիոնար պայմաններում մահվան, բուժհաստատություն դիակ տեղափոխելու դեպքերում մահվան հաստատումը միայն համապատասխան մասնագետների կողմից իրականացնելու ուղղությամբ, մշակել մարդու մահվան փաստի հավաստման արձանագրության միասնական՝ համապատասխան բժշկական և անհրաժեշտ այլ տվյալներ ներառող ձև, արգելել առանց այդ արձանագրության լրացման դիակի ախտաբանաանատոմիական հետազոտության իրականացումը և/կամ մահվան վերաբերյալ բժշկական վկայագիր տալը: Իսկ տնային մահացությունների այն դեպքերում, երբ ախտորոշումը հայտնի չէ և չկան վերջին մեկ ամսվա ընթացքում տվյալ անձի հետազոտման, բուժման կամ ախտորոշման վերաբերյալ բժշկական փաստաթղթեր, ինչպես նաև երբ դիակի վրա առկա են մարմնական վնասվածքների տեսանելի հետքեր, պարտավորեցնել համապատասխան բուժաշխատողին՝ ահազանգել իրավապահ մարմիններին: Առաջարկվել է նաև սահմանել դիակի գտնվելու վայրում բուժզննումն իրականացնող բուժաշխատակցի կողմից դիակի հերձման ուղեգրման գործողությունների հաջորդական քայլերի վերաբերյալ հստակ չափանիշներ՝  ներառյալ սահմանելով, թե տնային և ստացիոնար պայմաններում մահերի ո՞ր դեպքերում կարող է դիակը չենթարկվել դիահերձման, ո՞ր դեպքերում պետք է իրականացնել ախտաբանաանատոմիական և ո՞ր դեպքերում՝ դատաբժշկական հետազոտություն /հերձում/: Իսկ էլեկտրոնային բժշկության ներդրման դեպքում սահմանել շտապօգնության բրիգադի կամ տեղամասային բժշկի կողմից համապատասխան բուժհաստատության միջոցով էլեկտրոնային բազայից մահացածի վերաբերյալ բժշկական լիարժեք տեղեկատվություն ստանալու կարգ: 

Հաշվի առնելով խնդրի բացառիկ կարևորությունը և իրավաչափ լուծումների անհետաձգելիությունը՝ ՀՀ դատախազությունը պատրաստակամություն է հայտնել ակտիվորեն մասնակցելու նշված առաջարկությունների շահագրգիռ, բազմակողմ քննարկումներին և ներգրավվելու համապատասխան իրավական ակտերի մշակման աշխատանքներում: