• London

  • Beirut

  • Moscow

  • Los Angeles

  • Paris

  • Sydney

  • Toronto

Մահագրական. Ընկ. Համբարձում Շէհրանեանի Յիշատակին

27.10.2018   01:13

Սրտի խոր կսկիծով իմացանք մահուան գոյժը իրաքահայ վաստակաշատ ընկ. Համբարձում Շէհրանեանի, որ վերջերս իր մահկանացուն կնքած է Ամմանի մէջ:

Համբարձում Շէհրանեանի ծնած է Իրաքի Մուսուլ քաղաքին մէջ 1948ին: Ան իր նախնական ուսումը ստացած է տեղւոյն ազգային նախակրթարանին մէջ: Աւարտելէ  ետք, կանուխ տարիքին իր ծնողքին հետ հաստատուած է Պաղտատ, ուր իր երկրորդական ուսումը շարունակած է մայրաքաղաքի «Էլ Շարքիա» վարժարանին մէջ: Ապա Ընկ. Շէհրանեան իր բարձրագոյն ուսումը ստացած է Պաղտատի համալսարանին մէջ, ուրկէ վկայուած է որպէս ճարտարագէտ:

Շրջան մը շարունակած է ընտանեկան առեւտուրի գործը, ապա հիմնած է իր անձնական տպարանը:

Պատանի տարիքէն ընկ. Շէհրանեան անդամակցած է ՀԲԸՄին եւ եղած է անոր գործունեայ եւ եռանդուն անդամը: Եղած է ՀԲԸՄի պարախումբի անդամ, ապա պարուսոյց: Աւելի ուշ, ստանձնած  է պարախումբի գեղարուեստական յանձնախումբի պատասխանատուութիւնը: Պաղտատի ՀԲԸՄի մէջ վարած է վարչական պաշտօններ: 1990ին ստանձնած է Պաղտատի ՀԲԸՄի փոխատենապետի պաշտօնը եւ ձեռնհասօրէն ղեկավարած է տեղւոյն մասնաճիւղը մինչեւ իր Ամման տեղափոխուիլը:
Համբարձում Շէհրանեան համախոհներու հետ եղած է Պաղտատի մէջ ՌԱԿի շրջանակի հիմնադիրը ու երկար տարիներ հաւատարմօրէն ծառայած է իր սիրած կուսակցութեան:
Հանգուցեալը իր կեանքի ընթացքին եղած է իրաքահայ համայնքի հանրածանօթ ազգայիններէն: Ան իր ազգին եւ եկեղեցիին ծառայած է նաեւ Իրաքի Ազգային կեդրոնական վարչութեան միջոցով:

Համեստ եւ հեզահամբոյր բնաւորութեամբ ընկ. Շէհրանեանի իր շրջապատի յարգանքն ու համակրանքը վայելած է:

Յարգանք ու պատիւ իր անթառամ յիշատակին:

Համբերութիւն ու մխիթարութիւն իր ընտանեկան պարագաներու,  հարազատներուն ու գաղափարի եւ միութենական ընկերներուն:

Կը խոնարհինք իր վաստակին առջեւ:   

«Զ.» 

Share Button

Leave a Reply

Your email address will not be published. Required fields are marked *

Լրատուութեան գործընկեր