Մայր Աթոռ Ս. Էջմիածնում կատարուեց կրթութեան մշակների օրհնութեան կարգ

Օգոստոսի 31-ին` նոր ուսումնական տարեշրջանի նախօրէին, Մայր Աթոռ Ս. Էջմիածնում հանդիսապետութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի կատարուեց կրթութեան մշակների օրհնութեան կարգ:

Աւանդական դարձած այս արարողութեանը ներկայ էին ՀՀ կրթութեան եւ գիտութեան նախարար Արմէն Աշոտեանը, պետական եւ մասնաւոր բարձրագոյն ուսումնական հասատութիւնների ռեկտորներ, ԱԺ գիտութեան, կրթութեան, մշակոյթի, երիտասարդութեան եւ սպորտի մշտական յանձնաժողովի նախագահ Արտակ Դաւթեանը եւ անդամները, կրթական պետական կառոյցների ներկայացուցիչներ, տարբեր մարզերից Մայր Աթոռ ժամանած հանրակրթական դպրոցների ու մանկապարտէզների տնօրէններ եւ մանկավարժներ:

Արարողութիւնը սկսուեց Մայր Աթոռի Քրիստոնէական դաստիարակութեան կենտրոնի տնօրէն Գերաշնորհ Տ. Վարդան եպիսկոպոս Նաւասարդեանի ողջոյնի խօսքով: Սրբազանը ներկաներին մաղթեց, որ նրանց գիտակցութեան մէջ միշտ թարմ մնա թարգմանչաց ոսկեդարեան շրջանի Ս. Սահակ եւ Ս. Մեսրոպ եռամեծար վարդապետների ոգին: «Նրանք իրենց աշխատանքին ու գործին լծուեցին պատասխանատուութեան բարձր եւ վեհ գիտակցութեամբ. պատասխանատու էին իրենց հայրերի Աստծու առջեւ, պատասխանատու էին իրենց ժողովրդի առջեւ եւ իրենց Եկեղեցու առջեւ: Այս պատասխանատուութեան զգացումն ենք մաղթում ամէնքիդ այս 2015-2016 ուսումնական տարեշրջանի համար, բայց երբեք չբաւարարուելու պատասխանատուութեան զգացումով, այլ այն վերածելու յանձնառութեան…` երբեք չվախենալով մեր զաւակների կրթութեան ու դաստիարակութեան գործը ձեր ուսերին առնելու», – նշեց Վարդան Սրբազանը:

Այնուհետեւ նախագահութեամբ Մայր Աթոռի Արտաքին յարաբերութիւնների եւ արարողակարգի բաժնի տնօրէն Գերաշնորհ Տ. Նաթան արքեպիսկոպոս Յովհաննիսեանի կատարուեց օրհնութեան կարգը, որի աւարտին կրթութեան ոլորտի պատասխանատուներին եւ մշակներին իր հայրապետական պատգամն ու օրհնութիւնը բերեց Նորին Սրբութիւն Գարեգին Բ Ամենայն Հայոց Կաթողիկոսը:

Գիտելիքի օրուայ եւ նոր 2015-2016 ուսումնական տարուայ մեկնարկի առիթով իր օրհնութիւնը բերելով կրթութեան ոլորտի ներկայացուցիչներին` Նորին Սրբութիւնը մաղթեց, որ հայ ազգի զաւակները նրանց խնամքի ու դաստիարակութեան շնորհիւ աճեն ու հասակ առնեն որպէս Հայաստանի արժանաւոր քաղաքացիներ եւ Հայոց Եկեղեցու արժանաւոր զաւակներ, դառնան Հայրենիքի յոյսը, ժողովրդի բարօր ու պայծառ օրուայ կերտողները:

Իր խօսքում Ամենայն Հայոց Հայրապետը մասնաւորապէս անդրադարձաւ արարողութեան ժամանակ ընթերցուած սերմնացանի աւետարանական առակին եւ մանկավարժի կերպարին: «Կրթութեան դաշտում սերմնացանները կրթութեան ոլորտի մշակներդ էք. դուք ձեր աշխատանքով կարող էք մեր զաւակների հոգիները վերածել եւբ այրուած ժայռերի, եւբ չոր ճանապարհների, եւբ մոլախոտերով, փուշ ու տատասկով ծածկուած անդաստանների: Ձեր աշխատանքով դուք նաեւ կարող էք մեր զաւակների հոգիները դարձնել բերրի արտեր, եթէ հոգածութեամբ ու խնամքով, նախանձախնդրութեամբ եւ պատասխանատուութեան զգացումով իրականացնէք ձեր աշխատանքը…», – նշեց Գարեգին Բ Հայրապետը` մաղթելով, որ նրանց ներդրած ջանքերը շարունակ արդիւնաւորուեն, իսկ վաստակը միշտ արժանաւորապէս գնահատուի ինչպէս ուսանողների, այնպէս եւ մեր ժողովրդի բոլոր զաւակների կողմից:

Վերջում Նորին Սրբութիւնը հայցեց, որ Տիրոջ օրհնութիւնը միշտ ուղեկից լինի ներկաներին եւ առաջնորդի մանկավարժի պատուական ծառայութեան մէջ: