• London

  • Beirut

  • Moscow

  • Los Angeles

  • Paris

  • Sydney

  • Toronto

Վրաստանի Խորհրդարանը Հրաժարեցաւ Յանցաւոր Յայտարարել Սահաքաշվիլիի Ռեժիմը

23.02.2019   02:40

«ԶԱՐԹՕՆՔ», ՊԷՅՐՈՒԹ – Վրաստանի խորհրդարանը լիագումար նիստին չէ պաշտպանած 2004-էն մինչեւ 2012 թուականը երկիրը ղեկավարած նախկին նախագահ Միխէիլ Սահաքաշվիլիի ռեժիմը յանցաւոր յայտարարելու բանաձեւի նախագիծը, որ պատրաստած էին ընդդիմադիրները: Այդ մասին, ինչպէս կը հաղորդէ «Արմէնփրես»-ը, ըսուած է օրէնսդիր մարմինի յայտարարութեան մէջ:

Բանաձեւի նախագիծը պատրաստած էր «Հայրենասէրներու դաշինք» ընդդիմադիր կուսակցութիւնը: Բացատրական գրութեան մէջ կը նշուի, որ բանաձեւի նպատակը «Միասնական ազգային շարժում»-ի կառավարման տարիներուն Վրաստան հաստատուած ռեժիմը «յանցաւոր ու անձնիշխանական» ճանչնալն է, ինչպէս նաեւ արդարութեան վերականգնումը, յանցագործութիւններու հետաքննումը եւ մեղաւորները պատժելը: Նախագիծին համաձայն՝ դատախազութեան կը յանձնարարուէր վեց ամսուան ընթացքին աւարտին հասցնել նախկին իշխանութեան ղեկավարներուն դէմ յարուցուած բոլոր քրէական գործերը:

Փետրուար 21-ին տեղի ունեցած քուէարկութեան բանաձեւը պաշտպանած է 45 խորհրդարանական, դէմ քուէարկած են 16-ը: Խորհրդարանը ընդամէնը ունի 150 պատգամաւոր:

«Մենք, ընդհանուր առմամբ, կը պաշտպանենք բանաձեւի բովանդակութիւնը, ինչպէս նաեւ այն կարծիքը, որ 2004-2012 թուականներու ռեժիմը յանցաւոր էր: Սակայն մենք դիտողութիւններ ունինք բանաձեււի իրաւական մասին վերաբերեալ: Եթէ այդ մասը վերանայուի, ապա մենք պատրաստ ենք վերստին քննարկելու նման բանաձեւի ընդունումը»,- յայտարարած է խորհրդարանի խօսնակ Իրաքլի Քոպախիձէն, որուն խօսքը մէջբերուած է օրէնսդիր մարմինի կայքին վրայ զետեղուած յայտարարութեան մէջ, հաղորդած է «ՌԻԱ նովոսթի»-ն:

Share Button

Leave a Reply

Your email address will not be published. Required fields are marked *

Լրատուութեան գործընկեր