Category: Լուրեր Սփիւռքէն

Կազմակերպութեամբ Մեծի Տանն Կիլիկիոյ կաթողիկոսութեան Երիտասարդական բաժանմունքին եւ գործակցութեամբ Լիբանանի հայոց թեմին, Շաբաթ, 21 Նոյեմբեր 2015-ի երեկոյեան ժամը 5:00-էն սկսեալ, Ազգային Եղիշէ Մանուկեան քոլեճի «Սիրան Մանուկեան» սրահին մէջ տեղի ունեցաւ, Լիբանանի Հայոց թեմի միջդպրաց դասերու միօրեայ երիտասարդական սեմինար մը` «Կամաւոր աշխատանքը եւ եկեղեցին» նիւթով:

Սեմինարին նպատակն էր համախմբել Լիբանանի հայոց թեմի կամաւոր ծառայող երիտասարդները, լսել անոնց փորձառութիւնները, բաժնեկցիլ անոնց կարծիքներն ու մտահոգութիւնները, ինչպէս նաեւ այլ երիտասարդներ կամաւոր ծառայութեան մղելու կերպեր ու միջոցներ որդեգրել:

 

Բացման խօսքը ուղղեց Երիտասարդական բաժանմունքի հոգեւոր խորհրդատու Նշան վրդ. Լախոյեան, որ իր կարգին բարի գալուստի խօսքեր արտասանելէ ետք, հակիրճ տողերու մէջ ներկայացուց Երիտասարդական բաժանմունքի գործունէութիւնը, ինչպէս նաեւ օրուան պատգամն ու յայտագիրը ներկայացուց երիտասարդներուն:

Սեմինարին առաջին զեկուցաբերն էր Թորգոմ վրդ. Տօնոյեան, որ ներկայացուց «Կամաւոր ծառայութեան արժէքը Աստուածաշունչին եւ եկեղեցւոյ դիտանկիւնէն»: Հայր սուրբը նշեց, որ կամաւոր ծառայութիւնը քրիստոնէական եկեղեցւոյ ծառայութեան մարզին ամէնէն կարեւոր դաշտը կը հանդիսանայ եւ ընդգծեց, որ անցեալին եկեղեցին լայն աճ ապրած է  եւ հաւատքը գործնականացած է շնորհիւ կամաւոր ծառայութեան: «Բոլոր ժամանակներու օրինակելի մեծագոյն ծառան Յիսուս Քրիստոսն է, որուն ուսուցած վարդապետութեամբ եւ անձին օրինակով, Ան մարդկային ընկերութեան առաջին ծառան դարձաւ», շեշտեց հայր Թորգոմ:

Զեկուցումին աւարտին հարցում-պատասխաններու ընդմէջէն յաւելեալ քննարկում տեղի ունեցաւ եւ անիկա ստացաւ կլոր սեղանի բնոյթ, որուն ընթացքին Երիտասարդական բաժանմունքի անդամները իրենց մասնակցութիւնը բերելով՝ ներկաներուն փոխանցեցին կամաւոր ծառայութեան իրենց անձնական փորձառութիւնները զանազան մարզերու մէջ, ինչպէս եկեղեցական, ազգային, համայնքային եւ այլն:

Սեմինարին երկրորդ բաժինով Երիտասարդական բաժանմունքի անդամներէն Քրիստին Արզումանեան-Ղազարեան կազմակերպեց աշխատանոց մը, որուն նպատակն էր մասնակիցները մղել գործունեայ ըլլալու եւ ա՛լ աւելի առողջ ու ինքնաբաւ կեանք մը վարելու: Աշխատանոցին ընթացքին Արզումանեան-Ղազարեան ներկայացուց բարօրութեան հիմնական 5 քայլեր, որոնք կը նպաստեն թէ՛ անձին առօրեայ եւ թէ՛ համայնքային կեանքի բարելաւման: Աշխատանոցին մասնակիցները առիթ ունեցան մտածելու իրենց անձնական փորձառութիւններուն մասին եւ զանոնք կապելով բարօրութեան 5 քայլերուն` զրուցեցին եկեղեցւոյ մէջ կամաւոր ծառայութիւնը ա՛լ աւելի ազդեցիկ ու ինքնաբուխ ձեւով կատարելու շուրջ: Իսկ աւարտին տեղի ունեցաւ մշակում Ս. Ծնունդին առիթով ծրագիրներու, զորս կը մտադրուի կազմակերպել Լիբանանի զանազան շրջաններու մէջ:

Սեմինարի մթնոլորտին յաջորդեց ընկերային ընթրիքն ու Քարաոքէի երեկոն: Ներկաները իրենք ճոխացուցին մթնոլորտը հայերէն, արաբերէն, անգլերէն եւ ֆրանսերէն երգերով:

 

Հայ Տարեցներու Տան ՔԱՀԼ-ի Տնօրէնութեան եւ Տիկնանց Օժանդակ Յանձնախումբին տարեկան ծրագիրներուն մէջ, կարեւոր տեղ կը գրաւէ «Ուրախացի’ր, Ուրախացո’ւր» ձեռնարկը:

Տօնավաճառին բացումը կատարուեցաւ Հինգշաբթի՝ 26 Նոյեմբեր 2015-ին, առաւօտեան ժամը 11.00-ին:

Բարի գալուստի խօսք ուղղեց ՔԱՀԼ-ի տնօրէն Պատ. Սեպուհ Թէրզեան: Ան նախ տեղեկութիւն տուաւ ձեռնարկին մասին եւ ապա շնորհակալական խօսք ուղղեց հաստատութեանս Խնամակալութեան, անոր Տիկնանց Օժանդակ Յանձնախումբին, ՔԱՀԼ-ի անձնակազմին եւ յատկապէս խոհանոցի խոհարարներուն, ինչպէս նաեւ յատուկ շնորհակալութեան խօսք ուղղեց այս ձեռնարկը հովանաւորող Տիկ. Փօլին Գրոզեան-Քէչէճեանին՝ մաղթելով անոր առողջութիւն եւ յաջողութիւն ապագայ ծրագիրներուն համար: Նոյնպէս խօսքը ուղղեց Պուրճ Համուտի քաղաքապետ Պրն. Անդրանիկ Մսըրլեանին եւ շնորհակալութիւն յայտնեց, որովհետեւ միշտ նեցուկ եղած են հաստատութեանս: Ապա Պատուելին տեղեկութիւն տուաւ Հայ Տարեցներու Տան «Ծիրանի» խոհանոցի ծրագիրներուն մասին, եւ քաջալերական խօսքերով սրտապնդեց հոն աշխատող փորձառու խոհարարները:

Պատ. Թէրզեան յիշեց թէ այս բոլոր աշխատանքներուն մէջ մեր խորին եւ մեծագոյն շնորհակալութիւնը ու փառքը կու տանք Աստուծոյ: Ապա Վեր. Մսըրլեան աղօթք մատուց:

Տօնավաճառը իրենց ներկայութեամբ քաջալերեցին ՔԱՀԼ-ի Խնամակալութեան ատենապետ Վեր. Րաֆֆի Մսըրլեան, Վեր. Սողոմոն Քիլաղապեան, Պրն. Ֆարիտ Ճպրան եւ Պրն. Ֆատի Ղազալ:

Բացումի ժապաւէնը կտրեցին օրուան հովանաւոր Տիկ. Փօլին Գրոզեան-Քէչէճեան եւ Պուրճ Համուտի քաղաքապետ Պրն. Անդրանիկ Մսըրլեան:

Ձեռնարկը կը բաղկանար տօնավաճառէ (պազար): Տօնավաճառին ներկայացուած տոհմիկ եւ համադամ ճաշերը, խմորեղէններն ու անուշեղէնները պատրաստուած էին ՔԱՀԼ-ի «Ծիրանի» խոհանոցին մէջ, փորձառու եւ երիտասարդ խոհարարներուն կողմէ: Ինչպէս նաեւ սեղաններու վրայ զետեղուած էին հայկական ընտիր գինի եւ այլ արտադրութիւններ, տուրմերու տեսակներ, տօնական զարդեղէններ եւ ձեռային աշխատանքով պատրաստուած առարկաներ:

Այս ձեռնարկը մտերմիկ եւ ուրախ ժամեր կը պարգեւէ ներկաներուն, որոնք մօտէն կը ծանօթանան հաստատութեանս գործունէութեան եւ նոյն պահուն կ’այցելէն սպասող հայ տարեցները՝ անոնց պարգեւելով յոյս եւ ուրախութիւն:

Վարձքը կատար բոլոր բաժին բերողներուն, որոնց աշխատանքը բարձր գնահատուեցաւ մեծաթիւ այցելուներու կողմէ:

Կ’ուզենք հանրութեան ուշադրութեան յանձնել, թէ Հայ Տարեցներու Տան «Ծիրանի» խոհանոցը պատրաստ է ընդառաջելու՝ հայորդիներու ճաշի բոլոր տեսակի ապսպրանքներուն:

Աւանդական եւ Համադամ ճաշեր պատրաստուած փորձառու – խոհարարներու կողմէ (ըստ ապսպրանքի)

01-266822
08-646655
Armenian Traditional Dishes
(upon order)

Ոսկերչութիւն, արծաթագործութիւն, սնունդի արդիւնաբերութիւն, վարսայարդարութիւն, կարի եւ կօշիկի արտադրութիւն, ինքնաշարժի նորոգութիւն, տպագրութիւն, տեսանկարահանում, օճառագործութիւն. ասոնք այն հիմնական ոլորտներ են, ուր սուրիահայերը ձեռնարկատիրական գործունէութիւն կը ծաւալեն:

«Ազդարար» լրատուականը իր անդրադարձին մէջ կը նշէ, որ 2012 թուականէն առ այսօր ՓՄՁ-ներու զարգացման ազգային կեդրոնը մօտ 500 սուրիահայ գործարարի տարբեր տեսակի օգնութիւն  ցուցաբերած է, 106-ը ստացած են ֆինանսական աջակցութիւն` միջինը 4,5 միլիոն դրամի չափով եւ 5 տարի ժամկէտով: Արձանագրուած է 75 նոր գործարարութիւն, բացուած 112 աշխատատեղ:

«Այսօր սուրիահայերը աւելի զգօն  դարձած են, գործ սկսելէ առաջ երկար կը մտածեն: Զգուշաւորութեան եւ խոր վերլուծութեան շնորհիւ՝  վերջին շրջանին յաջողած ձեռնարկատիրութեանց թիւը սուրիահայերու մօտ 20 տոկոսով աւելցած է», կը նշէ ՓՄՁ զարգացման ազգային կեդրոնի գործադիր տնօրէն Գեղամ Պետրոսեան:

Հայկական Կարմիր խաչի ընկերութիւնը` Դանիական Կարմիր խաչի հետ համագործակցութեամբ 2015 թուականի Օգոստոսէն կ’իրականացնէ՝ «Սուրիահայ երախաներու կայուն զարգացումը Հայաստանի մէջ» ծրագիրը, որ պիտի տեւէ մէկ տարի: Այս մասին կը հաղորդէ «Հայերն Այսօր»ը:

Ծրագիրը մշակուած է Կարմիր խաչի (Կարմիր մահիկի Ազգային ընկերութիւններու ֆետերասիոնի) (ԿԽՄՖ) եւ «Սէյվ տը Չիլտըրըն» հիմնադրամին կողմէ՝ համատեղ մշակուած մեթոտի հիման վրայ: Ծրագիրին նպատակն է աջակցիլ Հայաստանի մէջ սուրիահայ երախաներու ընդելուզման գործընթացին եւ կայուն զարգացման:

Կազմակերպչական ծաւալուն աշխատանքներէն յետոյ` 2014 թուականի Նոյեմբերէն, Երեւանի  13 դպրոցներու մէջ` ինչպէս նաեւ մեր դպրոցին մէջ, կը կազմակերպուին ծրագիրով նախատեսուած պատկերաւոր դասընթացքներ` սուրիահայ եւ տեղացի երախաներու մասնակցութեամբ:

Երախաները դասընթացքներուն կը մասնակցին մինչեւ 18 անձէ բաղկացած խումբերով եւ ոչ պաշտօնական մեթոտներով` դերախաղեր, քննարկումներ, նկարչութիւն, պար եւ այլն, անդրադառնալով այնպիսի խնդիրներու, ինչպիսին են վախի եւ ճնշումի յաղթահարում, շրջակայ միջավայրի ճանաչում, ապագայի կառուցում եւ այլն: Դասընթացներէն բացի կազմակերպուած են շրջագայութիւններ, ամառնային ճամբար եւ ծառատունկ դպրոցին մէջ:

 

Սուրիայէն հազարաւոր փախստականներ յառաջիկայ շաբաթներուն պիտի ժամանեն Գանատա եւ կառավարութեան պարզեցուած ծրագիրով պիտի ապաստանին Մոնրէալի ու Թորոնթոյի մէջ:

Ըստ News.am-ի՝ The  Globe and Mail պարբերականը կը հաղորդէ, որ Մոնրէալ տեղափոխուող փախստականներուն երկու երրորդը սուրիահայեր են: Անոնց ֆինանսաւորումը իր վրայ վերցուցած է տեղի հայ համայնքը:

«Փախստականներէն շատերուն մենք նոյնիսկ չենք հանդիպիր: Անոնց ժամանումէն անմիջապէս ետք ֆինանսաւորող խումբերը կը դիմաւորեն զանոնք օդակայանին մէջ եւ անկէ ետք կ՛անհետանան մեր տեսադաշտէն», պարբերականին ըսած է գաղթականութեան հարցերով զբաղող գանատացի պաշտօնեան:

Ըստ պարբերականին նախապէս կազմուած ցուցակներով՝ Գանատա ժամանող սուրիացի փախստականներուն շատ փոքր տոկոսը կը ֆինանսաւորուի կառավարութենէն: Փախստականներուն ֆինանսական կարիքները սովորաբար կը հոգան տեղի համայնքները:

Հայոց Ցեղասպանութեան 100րդ տարելիցի ոգեկոչման ձեռնարկներու ծիրէն ներս, Նոյեմբեր 22ին Մոնաքոյի Սուրբ Նիքոլա Տէ Ֆոնտուիէ եկեղեցւոյ մէջ տեղի ունեցած է Սուրբ պատարագ, Ֆրանսայի թեմի առաջնորդ Վահան եպիսկոպոս Յովհաննիսեանի մատուցմամբ: Այս մասին կը հաղորդէ «Հայերն Այսօր»ը։

Պատարագին ներկայ եղած են Ֆրանսայի  եւ Մոնաքոյի մէջ ՀՀ դեսպան Վիգէն Չիտեչեան, Մոնաքոյի արքեպիսկոպոս Պերնարտ Պարսին, Մոնաքոյի արքայազն Ալպերթ II-ի պետական քարտուղար Ժաք Պուասոն, Մարսէյլի մէջ Հայաստանի Հանրապետութեան հիւպատոս Սամուէլ Լալայեան, Ալպ Մարիտիմի, Վարի եւ Մոնաքոյի Հայ Առաքելական եկեղեցւոյ հոգեւոր հայր Գրիգոր աբեղայ Խաչատրեան, Մոնաքոյի հայերու միութեան նախագահ Սերժ Ֆերմանեան, միութեան հիմնադիր տնօրէն Արեւ Մարտիրոսեան եւ հայ համայնքի ներկայացուցչներ:

Արցախի Հանրապետութեան վարչապետ Արայիկ Յարութիւնեան Նոյեմբեր 23ին այցելած է Լոս Անճելոսի մէջ գործող հայկական վարժարաններ, ինչպէս նաեւ հանդիպում ունեցած է խումբ մը բարերարներու հետ, կը հաղորդէ «Արցախփրես»ը:

Արայիկ Յարութիւնեան եղած է Սրբոց Նահատակաց Ֆերահեան Երկրորդական եւ ՀԲԸՄ Մանուկեան-Տեմիրճեան վարժարաններ, ծանօթացած է դպրոցներու պայմաններուն եւ պատմութեան: Վարչապետը ներկայ գտնուած է աշակերտներու կողմէ կազմակերպուած ձեռնարկներուն` բարձր գնահատելով վարժարաններու դերակատարութիւնը Սփիւռքի մէջ հայապահպանութեան գործին:

Վարչապետ Յարութիւնեան այնուհետեւ Հայ Առաքելական եկեղեցւոյ ԱՄՆ Արեւմտեան ափի առաջնորդարանին մէջ, կազմակերպուած ընդունելութեան ժամանակ հանդիպած է խումբ մը բարերարներու, որոնց ներկայացուցած է Արցախի զարգացման հեռանկարներն ու պայմանները: Ան ներկաներուն հետ քննարկած է համագործակցութեան հնարաւորութիւնները, ձեռք բերած է յստակ պայմանաւորուածութիւններ:

Հանդիպումին վարչապետը յորդորած է բարերարներուն աշխոյժօրէն աջակցելու Նոյեմբեր 26ին նախատեսուած հեռուստամարաթոնին, որուն ժամանակ հաւաքուած գումարները «Հայաստան» համահայկական հիմնադրամի միջոցով պիտի ուղղուին Հայրենիքի զարգացման գործին:

 

 

 

 

 

 

Նոր Ջուղայի Հայոց ազգային Կրթահամալիրի «Քանանեան» աղջ. եւ «Կատարինեան» տղ. ուղեցոյց-միջնակարգ դպրոցներու տնօրինութիւններու, Ծնողական խորհուրդներու եւ գրադարանավարուհիի համատեղ նախաձեռնութեամբ`  Նոյեմբեր 20-27   կրթահամալիրի    դահլիճին մէջ  հերթական անգամ կազմակերպուած է   գիրքի ցուցահանդէս-վաճառք: Այս մասին ըստ «Հայերն Այսօր»ի, Նոր Ջուղայէն կը յայտնէ Երանուշ Թահմազեան:

Ցուցահանդէսի բացումը  Նոյեմբեր 20ի երեկոյեան,  ներկայութեամբ հրաւիրեալներու կատարեց Սպահանի Հայոց թեմի առաջնորդ Տ. Բաբգէն արք. Չարեան:  Ներկաներուն ողջունեց զոյգ դպրոցներու  գրդարանավարուհի Կարին Տէր-Մարտիրոսեան, որմէ յետոյ հիւրերուն հրաւիրեց  շրջելու  ցուցահանդէսի  տաղաւարները եւ ծանօթանալու ցուցահանդէսի բովանդակութեան:

Այնուհետեւ  ներկաները  ունկնդրեցին կրթահամալիրի մանկապարտէզ-նախակրթարան բաժինի տեսչուհի եւ վաստակաւոր  ուսուցչուհի Քարոլին Տիլանչեանի ելոյթը` նոր  հրատարակած դասագիրքերու մասին: Ք. Տիլանչեան նախ ներկայացուց իր եւ   կրթահամալիրի «Քանանեան» դպրոցի փոխտեսուչ եւ վաստակաւոր ուսուցչուհի Ռիմա Սիմոնեանի  եւ ուսուցչուհի  Սեդա   Տիլանչեանի  միջոցով կազմուած ու Սպահանի Հայոց թեմի   Կրթական խորհուրդներու միջոցով հրատարակուած 7րդ դասարանի  հայոց լեզուի ու գրականութեան նոր դասագիրքը  եւ անոր կից աշխատատետրը, որուն խմբագրութիւնը  կատարած է  հայաստանաբնակ անուանի լեզուաբան Դաւիթ Գուրջինեան, որ  առաջարկած եւ իր աջակցութիւնը  ցուցաբերած է նաեւ աշխատատետրի պատրաստման, իսկ  նկարազարդումը կատարած է Սուսաննա Այվազեան, համակարգչային ձեւաւորումը  ստանձնած է Վերգինէ Միրզախանեան:

Ք. Տիլանչեան յայտնեց, որ  պատրաստման ընթացքի մէջ են նաեւ 8րդ եւ 9րդ դասարաններու դասագիրքերը ու խօսեցաւ  տարրական բաժինի առաջին, երկրորդ եւ երրորդ դասարաններու համար հրատարակուած կրօնի նոր դասագիրքերու մասին, որոնց  պատրաստումը կատարուած է  թեմակալ առաջնորդ Սրբազան հօր հովանաւորութեամբ եւ անմիջական հսկողութեամբ:

Յաջորդիւ ամպիոնի մօտ հրաւիրուեցաւ Թեհրանէն հրաւիրուած  թարգմանիչ Յարութիւն Եղնազարեան, որ  ներկայացուց Հայոց Ցեղասպանութեան 100րդ տարելիցին նուիրուած իր թարգմանած  Նոէլ Պարպըրի «Lords of the Golden Horn» (Ոսկեղջիւրի Տիրակալները) գիրքը, բայց մինչ այդ  Կարին Տէր-Մարտիրոսեան հակիրճ տողերով ներկայացուց պրն.  Եղնազարեանը:

Վերջաւորութեան  թեմակալ առաջնորդ Սրբազան հօր ձեռամբ,  զոյգ դպրոցներու տնօրինութեան եւ անձնակազմի  անունէն յուշանուէր յանձնուեցաւ  պրն. Եղնազարեանին: Գիրքի շաբթուան  առթիւ գնահատագիրներով պարգեւատրուեցան համայնքէն ներս գործող գրադարաններու պատասխանատուներ` Հայոց ազգ. «Քանանեան» աղջ. եւ «Կատարինեան» տղ. դպրոցներու գրադարանի վարիչ Կարին Տէր-Մարտիրոսեան, Ս. Ամենափրկիչ Վանքի «Ն. Շնորհալի» գրադարանի վարիչ Վերգինէ Միրզախանեան,  Հայոց ազգ. «Արմէն» երկսեռ կրթահամալիրի գրադարանի վարիչ Այտա Ալեքսանդրեան եւ Նոր Ջուղայի Հայ  մարզա-մշակութային  «Արարատ» միութեան  Մ. Նալպանտեան գրադարանի վարիչ Երանուշ Թահմազեան:

« زیر باران باید رفت (Զիր է պարան պայատ ռաֆթ)» նշանաբանի ներքոյ կազմակերպուած   եւ 7 օր տեւողութեամբ ցուցահանդէսը կը յատկանշուի նաեւ անով, որ   ցուցահանդէսի ծիրէն ներս գնահատելի աշխատանք կը կատարուի զոյգ դպրոցներու  աշակերտութեան  եւ պատասխանատուներուն միջոցով, ուր  ամէնօրեայ կարգով աշակերտութեան ներկայացուցիչներուն միջոցով  կը ներկայացուին նոր հրատարակութիւններ եւ տեղի կ’ունենան   անուանի  դէմքերու հետ ծանօթացում:  Կարեւոր է նշել  նաեւ ծնողական խորհուրդի  ամէնօրեայ ներկայութեան  ու  անշահախնդիր համագործակցութեան մասին, որոնք կը հսկեն ցուցահանդէսը եւ կը մասնակցին վաճառքի աշխատանքին: Ցուցահանդէսի գեղեցիկ որմազդը  սիրայօժար կերպով պատրաստած էր  ճարտարապետ Նայիրի Այվազեան:

Յ.Գ. «  زیر باران باید رفت (Զիր է պարան պայատ ռաֆթ)»   թարգմանաբար  կը նշանակէ  «Պէտք է երթալ անձրեւի տակ» եւ իր  մէջ կը պարունակէ  թարմացման  խորհուրդ: