• London

  • Beirut

  • Moscow

  • Los Angeles

  • Paris

  • Sydney

  • Toronto

Լիբանանի Մօտ ՀՀ Արտակարգ Եւ Լիազօր Դեսպան Աշոտ Քոչարեանի Ուղերձը Հայաստանի Հանրապետութեան 24րդ Տարեդարձին Առիթով

21.09.2015   22:42

Սիրելի՛ հայրենակիցներ,

Սրտանց շնորհաւորում եմ Հայաստանի անկախութեան 24-րդ տարեդարձի կապակցութեամբ: Հայաստանի Հանրապետութիւնն իր բոլոր քաղաքացիների եւ համայն հայութեան իղձերի մարմնաւորումն է եւ բոլորիս երազանքների իրականացման գրաւականը:

Անկախութիւնը մեր հզօր ուժն է, հպարտութիւնը, մեր պատասխանատուութիւնը, զէնքն ու իրաւունքը: Անցանք տարաբնոյթ ճգնաժամեր ու փորձութիւններ: Ունեցանք կորուստներ եւ բացթողումներ, ձեռքբերումներ, յաջողութիւններ եւ յաղթանակներ: Այսօր մենք ունենք ամրացած հայոց պետութիւն, հզօր Հայոց բանակ, որ մեր գոյութեան ու անվտանգ ընթացքի անսասան երաշխիքն է, բաց զանազանեցուած տնտեսութիւն, կանգուն հասարակական կ’առոյցներ, իր իրաւունքներին իրազեկուած բնակչութիւն: Հայաստանի Հանրապետութիւնն այդ ամէնին հասել է համեստ ռեսուրսների, Թուրքիայի եւ Ազրպէյճանի կողմից շարունակուող անօրինական շրջափակման պայմաններում:

Մեր նորանկախ պետութիւնն իր ստեղծման օրուանից դիմակայելով բազմաթիւ մարտահրաւէրների հետեւանքներին, աստիճանաբար ոտքի է կանգնել, որդեգրել ժողովրդավարութեան իտէալները եւ ձեւաւորել անկախ պետականութեան կարեւորագոյն կ’առոյցներ: Աստիճանաբար յաղթահարւում են լրջագոյն մարտահրաւէրները, ստեղծւում են նոր աշխատատեղեր, ակնառու յաջողութիւններ են գրանցւում տեղեկատուական տեխնոլոգիաների, գիւղատնտեսութեան, փոքր եւ միջին ձեռնարկութիւններին օժանդակութեան, մշակոյթի եւ սփորթի բնագաւառներում, զարգանում է զբօսաշրջութիւնը: Մեծ պատասխանատուութիւն է դրուած անկախութեան սերնդի վրայ, որը պէտք է լինի հայրենասէր, կրթուած, աւելի ազատ ու առաջադէմ, նուիրուած եւ նպատակասլաց:

Միջազգային ասպարէզում այսօր Հայաստանը կայուն, կանխատեսելի եւ յուսալի գործընկեր է: Հայաստանն աքթիւօրէն ներգրաւուած է կարեւոր գործընթացներում եւ շարունակում է   ընդլայնել դիւանագիտութեան աշխարհագրութիւնը: Հայաստանի արտաքին քաղաքականութիւնը կառուցուած է փոխվստահութեան, փոխադարձ շահերի ու պարտաւորութիւնների, ինչպէս նաեւ համատեղ պատասխանատուութեան հիման վրայ, որոնք միտուած են տարածաշրջանում քաղաքական կայունութեան, անվտանգութեան, համերաշխութեան եւ տնտեսական զարգացման միջավայրի ստեղծմանը:

Մեր արտաքին քաղաքական թիւ մէկ մարտահրաւէրը շարունակում է մնալ արցախեան հիմնահարցի խաղաղ կարգաւորումը: Լեռնային Ղարաբաղի հակամարտութեան կարգաւորման հիմք պէտք է հանդիսանայ Արցախի ժողովրդի ինքնորոշման իրաւունքի իրականացման ճանաչումը:

2015թ. Հայոց Ցեղասպանութեան 100-րդ տարելիցի տարին է: Ոգեկոչելով մեր 1.5 միլիոն անմեղ նահատակների սուրբ յիշատակը, միաժամանակ նշում ենք կեանքի յաղթանակը մահուան հանդէպ` ընդգծելով մեր ժողովրդի անցած հերոսական ու փառահեղ ուղին: Ընդգծում ենք վերապրելու, վերածնուելու եւ ստեղծագործելու այն կամքն ու ջանքերը, որ դրսեւորեց մեր ժողովուրդը: Սա հայ ժողովրդի եւ միջազգային հանրութեան համար կարեւոր տարելից է՝ ոչ միայն յետադարձ հայեացք գցելու եւ պատմական փաստերը վերաիմաստաւորելու, այլեւ նմանօրինակ յանցագործութիւններին «այլեւս երբեք» ասելու համար: Սեպտեմբերի 11-ին ՄԱԿ-ի Գլխաւոր ասամպլէայի 69-րդ նստաշրջանի 103-րդ լիագումար նիստում, կոնսենսուսով ընդունուեց Հայաստանի ներկայացրած «Ցեղասպանութեան յանցագործութեան զոհերի յիշատակի եւ արժանապատուութեան եւ այդ յանցագործութեան կանխարգելման միջազգային օր» խորագրով բանաձեւը:

Հայաստանը գրաւիչ է դառել աշխարհասփիւռ մեր հայրենակիցների եւ օտարերկրեայ զբօսարշջիկների համար: Հայաստանում անց են կացւում կարեւոր միջազգային գագաթաժողովներ ու համաժողովներ, կինօ եւ երգի փառատօններ, սփորթային մրցաշարեր, համաշխարհային եւ Համահայկական կարեւորութիւն ունեցող միջոցառումներ: Օրէցօր խորանում է Հայաստան-Սփիւռք գործակցութիւնը: Այսօր հպարտանում ենք աշխարհասփիւռ մեր իւրաքանչիւր հայրենակցով, որի միջոցով ձեւաւորւում է պատկերացում Հայաստանի եւ հայի մասին աշխարհի տարբեր ծայրերում:

Այս տօնական օրը ցանկանում եմ լաւագոյն բարեմաղթնանքներս յղել լիբանանահայութեանը: Այսօր լիբանանահայութիւնն իր ուրոյն դերակատարութեամբ եւ ներուժով հանդիսանում է երկու բարեկամ երկրները` Հայաստանը եւ Լիբանանը միացնող ամուր եւ յուսալի կամուրջ: Աշխատասիրութեան, նուիրուածութեան եւ տաղանդի շնորհիւ լիբանանահայութիւնը շարունակում է ազգանուէր եւ հայապահպան գործունէութիւնը` պահպանելով հարուստ ազգային մշակոյթն ու արժէքները:

Կրկին շնորհաւորում եմ բոլորիս Հայաստանի անկախութեան հռչակման 24-րդ տարեդարձի առթիւ: Այսօր մեծ տօն է մեր երկրում, մեծ տօն է նաեւ աշխարհի բոլոր հայերի համար:

Համոզուած եմ, որ բոլոր մարտահրաւէրները կարող ենք յաղթահարել Հայաստանի, Արցախի եւ Սփիւռքի միասնականութեամբ ու նուիրումով, այն միասնութեամբ, որի ծնունդն է անկախութիւնը:

Կեցցէ՛ Հայաստանի Հանրապետութիւնը:

Փա՛ռք հայ ժողովրդին:

Share Button

Leave a Reply

Your email address will not be published. Required fields are marked *

Լրատուութեան գործընկեր