• London

  • Beirut

  • Moscow

  • Los Angeles

  • Paris

  • Sydney

  • Toronto

Արցախցի Երեք Ուսուցիչներու Վերապատրաստման Ծրագիր Ս. Խաչ-Հարպոյեան Վարժարանին Մէջ

19.04.2017   18:29

Հայաստանի Հանրապետութեան սփիւռքի նախարարութեան «Դուն ի՞նչ կ’ընես Արցախի համար» համահայկական շարժման ծիրէն ներս, Ս. Խաչ-Հարպոյեան վարժարանի իրականացնելիք ծրագիրով` Պէյրութ ժամանեցին Մարտակերտի Վարդան Մինասեանի անուան թիւ 2 հիմնական դպրոցի տնօրէն Մելսիդա Քարդումեանը, ուսուցիչներ Լուսինէ Սաիյեանը եւ Ռուզաննա Աւետիսեանը, մասնակցելու ներառական կրթութեան մէկշաբաթեայ դասընթացքին:

Արդէն 3 տարիէ ի վեր, Ս. Խաչ-Հարպոյեան Վարժարանին մէջ ընթացք առած է ուսումնական դժուարութիւններ ունեցող աշակերտներու բաժանմունքը. հետեւաբար, մեր ծրագիրը կ’ընդգրկէր մեր վարժարանէն ներս գործող մասնագէտներու՝ ուղղախօսական (speech therapy), հոգեշարժական (psychomotor therapy), հոգեբանական եւ խորհրդատուական բնագաւառներու մէջ փորձառութիւնը փոխանցել մեր արցախցի հայրենակիցներուն:

Դպրոցի շրջափակին մէջ

Դպրոցի շրջափակին մէջ

Արդարեւ, Երեքշաբթի, 4 Ապրիլ 2017-ի յետմիջօրէին, արցախցի հիւրերը հասան Ս. Խաչ-Հարպոյեան Վարժարան, ուր իրենց դիմաւորեցին դպրոցի տնօրէնուհի Տիկ. Ռիթա Պոյաճեանը, Տանն Կիլիկիոյ Կաթողիկէ հայոց ամենապատիւ եւ գերերջանիկ Տէր Գրիգոր-Պետրոս Ի. կաթողիկոս պատրիարքի օգնական եպիսկոպոս արհիապատիւ Հայր Գէորգ Ասատուրեանը, Ս. Խաչ եկեղեցւոյ ժողովրդապետ գերյարգելի Հայր Եղիա Ծ. Վրդ. Եղիայեանը եւ Պատրիարքութեան վարժարաններու Ուսումնական Խորհուրդի ներկայացուցիչ Պրն. Գրիգոր Թերզեանը:

Տնօրէնութեան գրասենեակին մէջ պաշտօնական ընդունելութեան ընթացքին՝ Տիկ. Պոյաճեան բարի գալուստ մաղթեց հիւրերուն եւ յոյս յայտնեց, որ վերապատրաստման այս ծրագիրը լաւագոյն կերպով հասնի իր նպատակին: Այնուհետեւ, բարձրացան սրահ, ուր ներկայ էր  վարժարանի անձնակազմէն խմբակ մը: Տնօրէնուհի Տիկ. Պոյաճեան խօսեցաւ 30-ամեայ Ս. Խաչ-Հարպոյեան վարժարանին պատմականին մասին, ապա ներկայացուց ուսումնական դժուարութիւններ ունեցող աշակերտներու բաժանմունքի անդամները, գլխաւորութեամբ՝ բաժնի պատասխանատու Պրն. Սեւակ Յակոբեանի: Վերջինս՝ սահիկներու ցուցադրութեամբ՝ ներկայացուց վերոնշեալ բաժանմունքին աշխատանքներն ու գործելակերպը:

Հանդիպման աւարտին՝ Ասատուրեան եպիսկոպոսը իր օրհնութիւնը փոխանցեց, որպէսզի այս ծրագիրը ընթանայ հեզասահ եւ ըլլայ յաջողակ երկու կողմերուն համար, «որովհետեւ մենք երկուքս, հայրենիքի թէ սփիւռքի մէջ, իրար կ’ամբողջացնենք», ըսաւ ան:

Տիկ. Քարդումեան՝ իր կարգին՝ ողջոյններ փոխանցեց հայրենիքէն, հերոսութիւն որակեց սփիւռքի ափերուն այսքա՛ն հայաշունչ դարբնոց մը պահպանելը, ինչպէս նաեւ Արցախէն իրենց հետ նուէր բերած նռնենիներ տրամադրեց՝ ցանելու համար մեր վարժարանի շրջափակին մէջ: Ան նաեւ ձեռակերտ փայտեայ ժամացոյց մը նուիրեց տնօրէնութեան:

Արցախցի երեք ուսուցիչներու Լիբանան այցը շարունակուեցաւ աշխատանքային հանդիպումներով եւ զանազան այցելութիւններով:

 

Աշխատանքային Հանդիպումներ.

«ABA» զեկոյց

Աշխատանքային հանդիպումներու ծիրէն ներս՝ ուսուցչուհիները դիտարկում կատարեցին ուղղախօսութեան, հոգեշարժութեան եւ հոգեբանական բուժումներու նիստերու, ինչպէս նաեւ անգլերէնի ու հայոց լեզուի, եւ ուսողութեան նիւթերու ուժեղացման դասապահերու: Ապա, ներկայ գտնուեցան վերոնշեալ բուժումներու մասնագէտներ՝ Օրդ. Ճենիֆըր Ապէթեանի, Օրդ. Նաթալի Աւէսեանի եւ Տիկ. Շաղիկ Չամիչեանի, եւ Օրդ. Լարա Գուտուսեանի ներկայացուցած վերապատրաստման դասընթացքներու:

Պէյրութի «Քրաուն Փլազա» պանդոկին մէջ, անոնք ներկայ գտնուեցան պզտիկներուն մօտ կեդրոնացումի պակասի եւ գերշարժողութեան խնդիրներու (ADHD) նուիրուած համաժողովին, որուն բանախօսներն էին բժիշկներ ու հոգեբաններ:

Անոնք մասնակցեցան հոգեբան Քրիսթին Տէր Սարգիսեանի ներկայացուցած «Applied Behavior Analysis» թեմայով զեկոյցին:

 

Այցելութիւններ.

Հայր անդրանիկ Կռանեանի հետ

Հայր անդրանիկ Կռանեանի հետ

Արցախցի ուսուցչուհիները կատարեցին նաեւ շարք մը այցելութիւններ:

Զմմառու Սուրբ Տիրամօր վանք այցելութեան ընթացքին, անոնք տեսակցեցան հրապարակագիր, խմբագիր, դաստիարակ եւ հաւատաւոր եկեղեցական գերյարգելի Հայր Անդրանիկ Ծ. Վրդ. Կռանեանի հետ, որուն հետ արծարծեցին հայրենական եւ ազգային հարցեր: Հիւրերը ծանօթացան վանքին պատմականին, շրջեցան անոր զոյգ թանգարանները եւ գինեմարանը:

Ժըպէյլի մէջ գտնուող Հայոց Ցեղասպանութեան որբերու «Արամ Պէզիքեան» Թանգարանին մէջ, անոնց դիմաւորեց թանգարանի տնօրէն Պսակ աբղ. Թեփիրճեանը, որ խօսեցաւ որբերու թանգարան մը կառուցելու մտայղացման մասին եւ բացատրութիւններ փոխանցեց թանգարանին բաժանումներուն ու հոն ներկայացուող փաստերուն վերաբերեալ: Արցախցի ուսուցչուհիները՝ խոր յուզումով՝ հաղորդակից դարձան բազմաչարչար որբերու տխուր կեանքին: Այնուհետեւ, անոնք շրջեցան պատմական Պիպլոսի գեղատեսիլ փողոցներով:

«Արամ Պէզիքեան» թանգարան

«Արամ Պէզիքեան» թանգարան

Մեծի Տանն Կիլիկիոյ Կաթողիկոսութեան Մայրավանքին մէջ գտնուող Սրբոց Նահատակաց մատուռ կատարուած այցելութիւնը՝ մեր հայրենակիցներուն մօտ առթեց սրտայոյզ աննակարագրելի զգացումներ:

Սրբավայրերու այցելութիւնները ընդգրկեց նաեւ Հարիսայի Աստուածամօր բարձրադիր արձանը:

Haydostian

Հայկազեան Համալսարանին մէջ, անոնք հանդիպում ունեցան համալսարանի նախագահ վերապատուելի Դոկտ. Փոլ Հայտոսթեանի հետ: Հանդիպման ընթացքին՝ վեր. Հայտոսթեան ներկայացուց համալսարանին պատմականը եւ ներկայ վիճակը: Երկրորդ հանդիպումը կատարուեցաւ համալսարանի Հայկական Սփիւռքի Ուսումնասիրութեան Կեդրոնի տնօրէն Դոկտ. Անդրանիկ Տագէսեանի հետ:

Անթիլիասի Նահատակաց մատուռ

Անթիլիասի Նահատակաց մատուռ

Ուսուցչուհիները, վարժարանիս տնօրէնուհի Տիկ. Ռիթա Պոյաճեանի եւ Ուսման Դժուարութիւններ Ունեցող Բաժանմունքի պատասխանատու Պրն. Սեւակ Յակոբեանի ընկերակցութեամբ,  այցելեցին նաեւ «Ազդակ», «Արարատ» եւ «Զարթօնք» օրաթերթերու խմբագրատուները, ուր խօսեցան իրենց կատարած դիտարկումներուն եւ ձեռք բերուած փորձառութեան մասին, ինչպէս նաեւ արծարծեցին ազգային, մշակութային եւ կրթական գործունէութեանց վերաբերեալ նիւթեր: Անոնք նաեւ հարցազրոյցներ ունեցան «Վանայ Ձայն» եւ «Սեւան» ռատիոկայաններուն մէջ:

Հայկական Սփիւռքի ուսումնասիրութեան Կեդրոնի տնօրէնին հետ

Հայկական Սփիւռքի ուսումնասիրութեան Կեդրոնի տնօրէնին հետ

Հայ մշակութային կեանքի լուսաւոր եւ իւրայատուկ երեւոյթներէն համարուող ԳՈՀԱՐ Համոյթի  տնօրէնութեան գրասենեակ կատարուած այցելութեան ընթացքին, ուր իրենց դիմաւորեց պարոն Յարութ Խաչատուրեան, հիւրերը ծանօթացան նաեւ «ԳՈՀԱՐ» գրադարանին:

 

Դպրոցէն ներս.

DSCN9532

Արցախցի ուսուցչուհիները՝ մասնայատուկ արարողութեամբ մը՝ այցելեցին վարժարանիս մանկապարտէզի բաժինը, ուր ընդունուեցան նուռով ու գինիով, հայկական դրօշ ծածանող, հայկական տարազ հագած աշակերտներով: Բարի գալուստի հակիրճ խօսքէն ետք, ուսուցչուհիները շրջեցան դասարանները եւ շփում ունեցան մանկապարտէզի մանուկներուն հետ, որոնք իրենց ձեւով ողջունեցին հայրենի հիւրերը: Մանկապարտէզի բաժնի այցելութիւնը վերջ գտաւ Արցախէն նուէր բերուած նռենիները ցանելու արարողութեամբ՝ մաղթելով, որ այդ ծառերը աճին ու տան բազմաթիւ հատիկներ:

DSCN9551

Անոնք ներկայ գտնուեցան նաեւ վարժարանիս աշակերտներուն ներկայացուցած տաղանդներու օրուան յայտագրին:

DSCN9395

Մեր հայրենակիցներուն Լիբանան այցելութեան փակումը կատարուեցաւ՝ անձնակազմի անդամներուն ընկերակցութեամբ տեղի ունեցած՝ ընթրիքով:

* * *

Շնորհակալութիւն կը յայտնենք վարժարանիս ծնողական յանձնախումբի անդամուհիներէն Տիկ. Լիզա Հատտաճեանին եւ «Զարթօնք» օրաթերթի խմբագրութեան, որոնք իրենց գնահատելի ներդրումը ունեցան՝ Արցախէն ժամանած ուսուցչուհիներու Լիբանան այցելութեան յաջողութեան մէջ:

 

 

 

 

Share Button

Deja un comentario

Tu dirección de correo electrónico no será publicada. Los campos obligatorios están marcados con *

Media Partner