• London

  • Beirut

  • Moscow

  • Los Angeles

  • Paris

  • Sydney

  • Toronto

ՀԲԸՄ-ՀԵԸ «Վահրամ Փափազեան» թատերախումբը Նոր Կատակերգութիւն Մը Կը Ներկայացնէ Լիբանանահայ Թատերասէր Հասարակութեան

21.03.2017   08:44

Թատրոնը  ՀԲԸՄ-ՀԵԸ «Վահրամ Փափազեան»  թատերախումբին համար  եղած է առաքելութիւն: Այս համոզումով է, որ ՀԲԸՄ-ՀԵԸ  «Վահրամ  Փափազեան»  թատերախումբը   աւելի քան  յիսուն տարի, անշեղօրէն կը ծառայէ հայ գիրին ու մշակոյթին:

Յաջորդական երկու շաբաթավերջ, Ուրբաթ 17, Շաբաթ,18, Կիրակի, 19, ինչպէս նաեւ Ուրբաթ, 24, Շաբաթ, 25 եւ Կիրակի, 26 Մարտ  2017-ին, լիբանանահայ թատերասէր հասարակութիւնը Յակոբ Տէր Մելքոնեան թատերասրահին մէջ պիտի  դիտէ  «Սառնարան, Դրամ, Փախլաւա» կատակերգութիւնը, բեմադրութեամբ Վարդան Մկրտիչեանի:

Բեմադրութիւնը «Վահրամ Փափազեան» թատերախումբի հիմնադրութենէն ի վեր՝ 1959, անոր  56-րդն է:

Երկու արարներու բաժնուած այս կատակերգութեան առանցքը կը  կազմէ  անգլիացի  գրող-թատերագիր  Ռոպերթ  Սքոթի «Acording to Rumour»  մութ կատակերգութիւնը: Վարդան Մկրտիչեան վերամշակած է Սքոթի ստեղծագործութիւնը, զայն պատշաճեցնելով  բեմի եւ դերասանական կազմի պայմաններուն:

Ներկայացումին առանցքը սովորական ընտանիք մըն է, բնակարան մը, ուր խորհրդաւոր պատահարի մը հետեւանքով, թիւրիմացութիւններ զիրար կը խաչաձեւեն անոնց փոխյարաբերութիւններուն մէջ, խառնարանի վերածելով  ընտանիքի անդամներուն առօրեան: Ընտանիքի իւրաքանչիւր անդամ  հնարամտութիւն մը գործի կը դնէ տիրանալու սառնարանին մէջ յայտնաբերուած հարիւր հազար տոլար պարունակող պայուսակին: Անվստահութեան, սադրանքի եւ ատելութեան  մթնոլորտ  մը կը ստեղծուի  ընտանիքի անդամներուն միջեւ:  Ո՞վ  պիտի  տիրանայ «երազային» այդ գումարին…:

Շնորհիւ  դերասանական  կազմին  փայլուն խաղարկութեան, հանդիսատեսը  անմիջապէս  պիտի  կլանուի  ներկայացումին զարգացումներուն, դառնալով հետաքրքրաշարժ խարդաւանքներու, զաւեշտային դրուագներու ականատեսը: Նոյնիսկ, բարեպաշտ զաւակներ դաստիարակած  ըլլալու գոհունակութեամբ  յոխորտացող մայրը  պիտի ափսոսայ անոնց ընթացքէն…: Սակայն, միւս  կողմէ, ինք եւս  պիտի փորձէ իւրացնել գումարը, զոհ դառնալով մարդկային թուլութեան…:

DSC_1132

«Սառնարան, Դրամ, Փախլաւա» կատակերգութիւնը անուղղակիօրէն կը ձաղկէ նիւթի եւ  փառքի հանդէպ մարդկային նկարագիրը:

Ներկայացումին զարգացումները  գլխաւորաբար  բնակարանի մը մէջ ըլլալու պատճառով, բեմայարդարումը մնաց անփոփոխ: Առանձնապէս  լուսաւորման ազդերցութիւններէ զերծ էր  ներկայացումը: Զգեստներու ընտրութիւնը կատարած էր բեմադրիչ Վարդան Մկրտիչեանը:

Արփի  Բարդիեան -Աւետիքեան, Յարութ Թորոսեան, Վարդան Մկրտիչեան անգամ մը եւս ապացուցեցին, թէ կը մնան  լիբանանահայ թատրոնի սիւներէն: Նոյնքան եւ համոզիչ էր  Եղիկ  Աւետիքեանի, Հուրի Պապահեքեանի,Էմմա Քէշիշեանի, Յարութ Սամոյեանի, Դալար եւ Լիլա Փամպուքեանի, Յարութ Մանուկեանի խաղարկութիւնը:  Բեմադրիչ Վարդան Մկրտիչեան իր տրամադրութեան տակ ունէր շնորհալի տարրերէ բաղկացած դերասանական կազմ, որոնք առաւելագոյնս եւ յաջողութեամբ  թափանցած էին իրենց կերպարներուն մէջ:

Գնահատանքի խօսք՝ բեմադրիչ,  ներկայացումին  պատշաճեցումը, բեմայարդարումը, որմազդը, երաժշտական ձեւաւորումը յղացող Վարդան Մկրտիչեանին,  որմազդի լուսանկարը պատրաստող  «Սթիւտիօ Սեւակ»-ին, բեմայարդարումը իրագործող Մատթէոս  Աւագեանին, բեմավար  Յակոբ  Զարմէնեանին, լուսաւորումի եւ երաժշտութեան  պատասխանատու  Գէորգ Նոխուտեանին, յատուկ շնորհակալութիւն՝  ՀԲԸՄ-ՀԵԸ «Վահրամ Փափազեան» թատերախումբի վարչութեան, ՀԵԸ-ի Կեդրոնական Վարչութեան, որոնք ի գին ամէն զոհողութեան  վառ կը պահեն  «Վահրամ Փափազեան» թատերախումբի  բարի աւանդութիւնը:

                                                        ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ  ԳՐԱՍԵՆԵԱԿ

Share Button

Deja un comentario

Tu dirección de correo electrónico no será publicada. Los campos obligatorios están marcados con *

Media Partner