Գլխաւոր | | ՌԱԿ-ի Կեդրոնական Վարչութեան Պատուիրակութիւնը Ընդունուեցաւ ՀՀ Պաշտպանութեան Նախարար Սէյրան Օհանեանի Կողմէ

ՌԱԿ-ի Կեդրոնական Վարչութեան Պատուիրակութիւնը Ընդունուեցաւ ՀՀ Պաշտպանութեան Նախարար Սէյրան Օհանեանի Կողմէ

22.06.2016 07:36

Երեքշաբթի, 21 Յունիս 2016-ին ՀՀ պաշտպանութեան նախարար Սէյրան Օհանեան ընդունեց՝ Ռամկավար Ազատական Կուսակցութեան Կեդրոնական Վարչութեան պատուիրակութիւնը, գլխաւորութեամբ Վարչութեան ատենապետ ընկ. Սերխիօ Նահապետեանի:

Հանդիպումի ընթացքին քննարկուեցան Հայրենիք-Սփիւռք կապերու ամրապնդման տարբեր ծրագիրներու իրականացման հնարաւորութիւնները՝ նախանշելով յառաջիկայի կատարելիքները: Ընկեր Սերխիօ Նահապետեան նախարարին ներկայացուց ՌԱԿ-ի յառաջիկայ ծրագիրները եւ նպատակները՝ նշելով, որ կուսակցութիւնը իր գործունէութիւնը ուղղած է հայապահպանութեան, Սփիւռքի կազմակերպումի եւ Հայաստանի հետ կապերու ամրապնդման խնդիրներուն:

ՀՀ պաշտպանութեան նախարարը անդրադարձաւ բանակի մէջ իրականացող բարեփոխումներուն, բանակ-հասարակութիւն կապերու շրջագիծէն ներս՝ Սփիւռքի տարբեր կառոյցներու հետ համագործակցութեան ծրագիրներուն: Նախարար Սէյրան Օհանեան ՌԱԿ-ի պատուիրակութեան ներկայացուց նաեւ՝ Լեռնային Ղարաբաղի շուրջ ստեղծուած իրավիճակը:

Կողմերը կարեւոր նկատեցին ջանքերու կեդրոնացումը Հայաստանի մէջ, Արցախի եւ Սփիւռքի ազգային համախմբումը, երիտասարդութեան մօտ հայրենասիրութեան սերմանումը եւ բանակ-հասարակութիւն կապերու ամրապնդումը:

ՌԱԿ Կեդրոնական Մամլոյ Դիւան