Հզօր Հայրենիք Ունենալու Համար Սփիւռքը Եւ Հայաստանը Պէտք Է Միասին Աշխատին.Սերխիօ Նահապետեան

*Գէորգ  Չիչեան*

Մայիս 30-ին Ռամկավար ազատական կուսակցութեան (ՌԱԿ)  վարչութեան նորընտիր անդամները` վարչութեան նորընտիր ատենապետ Սերխիօ Նահապետեանի գլխաւորութեամբ ՀՀ սփիւռքի նախարարութեան մէջ ընդունեց ՀՀ սփիւռքի նախարար Հրանոյշ Յակոբեան:

«Հայերն այսօր»-ի փոխանցմամբ` վարչութեան ատենապետը իր ողջոյնի խօսքը  յղած է ներկաներուն եւ շնորհակալութիւն յայտնած ՀՀ սփիւռքի նախարար Հրանոյշ Յակոբեանին` պատգամաւորական ժողովի բացման մասնակցելուն եւ ՀՀ Նախագահի ուղերձը ներկայացնելուն համար:  «Ռամկավար ազատական կուսակցութիւնը իր պատմութեան մէջ միշտ հայ ժողովուրդի կողքին  եղած է: Մենք մեզ «Թէքէեանական» կը  կոչենք եւ Վահան Թէքէեանի պատգամն է, որ մեզ աշխատանքի հանդէպ սիրով, հայրենասիրութեամբ կը լեցնէ: Կը հաւաստիացնեմ, որ կուսակցական ըլլալը ամէնօրեայ քրտնաջան աշխատանք  կ’ենթադրէ: Մենք համախմբուած աշխատելու կարիքը ունինք, պէտք է նաեւ համագործակցինք սփիւռքի այլ կազմակերպութիւններու հետ` համահայկական նշանակութեան հիմնախնդիրները լուծելու նպատակով: Երիտասարդական Ռամկավար ազատական կուսակցութեան (ԵՌԱԿ) ներկայացուցիչները այսօր կը գործեն շատ խանդավառ, որ մեծապէս կ’ոգեւորէ աւանդական հայ կուսակցութեան տարեց սերունդը:

Սփիւռքի մէջ նոյն հպարտութեամբ, ազգային վառ ապրումներով կ’աշխատինք` ի շահ Հայաստան-Արցախ-Սփիւռք եռամիասնութեան: Աշխարհի բոլոր երկիրներուն մէջ ներկայացուցիչներ ունինք, որոնք հայապահպանութեան ուղղուած տարբեր ծրագիրներ  կ’իրականացնեն: Կը վստահեցնենք, որ հզօր Հայրենիք ունենալու համար Սփիւռքը եւ Հայաստանը պէտք է միասին աշխատին:

Կուսակցական կարեւոր առաքելութիւններէն է Հայոց ցեղասպանութեան դատապարտման, Լեռնային Ղարաբաղի ճանաչման ուղղութեամբ տարուող աշխատանքները: Ի հարկէ, մեր ուշադրութեան կեդրոնին մէջ են նաեւ սուրիահայերու հիմնախնդիրները:

Թո՛ղ Աստուած ուժ եւ կարողութիւն տայ` յետագայ ծրագիրները կեանքի կոչելու համար: Մենք հայաստանակեդրոն ու միշտ Հայրենիքի կողքին ենք», -«Հայերն այսօր»-ի փոխանցմամբ` ըսած է Սերիխիօ Նահապետեան:

Աւելցնենք, որ Ռամկավար ազատական կուսակցութիւնը Մայիս 26-27 Երեւանի` Թէքէեան կեդրոնին մէջ, գումարած է հերթական` 27-րդ Ընդհանուր պատգամաւորական ժողովը: Օրէնսդիր գերագոյն ժողովին մասնակցած են ՌԱԿ-ի 16 շրջաններէ ընտրուած լիազօր ներկայացուցիչներ: Ժողովի աւարտին ընտրուած է կուսակցութեան նոր կեդրոնական վարչութիւնը` ատենապետ Սերխիօ Նահապետեանի  (Արժանթին) գլխաւորութեամբ: