Category: Մշակութային Լուրեր

ՀՀ մշակոյթի նախարար Արմէն Ամիրեան եւ «Փիւնիկ» հիմնադրամի նախագահ Գաբրիէլ Չէմպէրճեան ստորագրած են 73 միլիոն դրամի համագործակցութեան յուշագիր:

«Մեր «Մշակութային կանգառ» ծրագրի, թոյլ տուէք ասել` «մշակութային ինտերուենցիա»-ի (մշակութային միջնորդութիւն-ԵՌԳ․), յայտարարումից յետոյ միանգամից արձագանգեցին մեր բարեկամները, մասնաւորապէս, «Փիւնիկ» հիմնադրամը: Սա, իսկապէս, աննախադէպ միջոցառում է. 426 մշակութային այց, մօտ 200 կինոցուցադրում` հիմնադրամի տրամադրած շարժական կինոթատրոններով, ընդհանուր առմամբ, աւելի քան 600 մշակութային միջոցառում` չհաշուած փառատօնային այցելութիւնները: Եւ այս ամէնին իր սիրայօժար աջակցութիւնն է բերում «Փիւնիկ» հիմնադրամը»,- յուշագիրի ստորագրումէն ետք ըսած է նախարար Արմէն Ամիրեան:

Նախարարութեան ֆէյսպուքեան էջէն կը տեղեկանանք, որ նախարարութեան նախաձեռնած «Մշակութային կանգառ» ծրագիրով Հայաստանի պետական բոլոր երաժշտական եւ թատերական խումբերը հիւրախաղերով ելոյթ պիտի ունենան Հայաստանի մարզերուն եւ Արցախի մէջ:

«Մենք սիրով արձագանգեցինք, քանի որ մեր սրտին խօսող բան մըն է: Նախարարը մեզի ուրախ լուր տուաւ 2017-ի համար»,- նշած է «Փիւնիկ» համահայկական հիմնադրամի նախագահ Գաբրիէլ Չէմպէրճեան:

Նախարար Ամիրեան նաեւ ըսած է, որ ծրագիրը միաժամանակ մարզերուն մէջ  ունեցած մշակութային հարթակները հաշուառելու, մարդկային մշակութային ներուժը գնահատելու եւ յետագային նախարարութեան օժանդակութիւնը ճիշդ կազմակերպելու հնարաւորութիւն է:

 

«Իսկ արդիւնքը գնահատելիս կ’առաջնորդուենք վաճառուած տոմսերի քանակով: Խնդիրը շատ կամ թանկ տոմս վաճառելը չէ: Դրանց գինն ընդամէնը 300 դրամ ենք սահմանել. մեր խնդիրն է նաեւ մարզերում, համայնքներում ստեղծել մշակութային միջոցառումների կազմակերպման ենթակառուցուածքներ: Հաւատացէ՛ք, որ նման ախտորոշումը նաեւ որակական փոփոխութիւն է բերելու, որովհետեւ մի բան է, երբ ձրի համերգին աշակերտներին պարտադրելով են բերում դահլիճ, մէկ այլ բան է, երբ գիւղում ապրող մարդը` տեսնելով պաստառը, սիրայօժար գնում է էժան տոմսն ու մասնակացում համերգին»,- նշած է նախարարը:

Ա. Ամիրեանի խօսքով` մշակոյթի հետ շփուիլը այսօր, կարծես, շքեղութիւն դարձած է մարզին մէջ ապրող մարդու համար` ի տարբերութիւն Երեւանի, ուր մշակութային կեանքը շատ բարձր մակարդակի վրայ է:

«Մենք պարզապէս մեր բաժնից պէտք է հասցնենք մեր համերկրացիներին»,-ըսած է նախարարը` վստահութիւն յայտնելով, որ «Մշակութային կանգառ» ծրագիրը լրջօրէն պիտի փոխէ պատկերը ու մշակութային միջավայրը:

Հադրութի շրջանի Ուխտաձոր համայնքին մէջ շուտով պիտի գործէ 130 տեղ ունեցող նորակառոյց ուսումնական հաստատութիւն։ Անիկա նաեւ պիտի ծառայէ մօտակայ Հարթաշեն գիւղի աշակերտներուն: Այս մասին կը հաղորդէ Artsakhpress.am-ը։

Ուխտաձորի միջնակարգ դպրոցի տնօրէն Արթուր Արզումանեան յայտնած է, որ նոր պայմանները նոր յոյս կը ներշնչեն կրթօճախի աշխատակազմին: «Ուխտաձորի դպրոցին մէջ այժմ կ’ուսանի 48 աշակերտ, որոնց 8-ը առաջին դասարանցի են: 10 երեխայ ալ կը յաճախէ նախադպրոցական խումբ:

Անցեալ ուսումնականին համեմատ` աշակերտներու թիւը 2-ով աճած է: Այս տարի պիտի ունենանք 3 շրջանաւարտ: Թէեւ այժմ աշակերտներուն թիւը քիչ է, սակայն ամէն ինչ կ’ընենք, որ ապահովենք աշակերտներու ուսումնառութեան բարձր մակարդակը: Նորակառոյց դպրոցը ունի ժամանակակից չափանիշներուն համապատասխան հնարաւորութիւններ` ուսումնամեթոտական աշխատանքները պէտք եղածին պէս իրականացնելու համար: Կը մնայ միայն, որ նոր դպրոցին մէջ նոր եռանդով ու ոգեւորութեամբ իրականացնենք մեր` կրթութեան մշակներուս առաքելութիւնը»,- ըսած է Ա. Արզումանեան եւ ընդգծած, որ օրերս ստացած են նաեւ 11 համակարգիչ:

Դպրոցական շէնքը ապահովուած պիտի ըլլայ նոր գոյքով եւ տարրալուծարանային սարքաւորումներով: Կրթօճախի բակին մէջ կառուցուած է կաթսայատուն, տնտեսական շինութիւն եւ սանհանգոյց: Տարածքը ամբողջութեամբ բարեկարգուած է: «Այս օրերուն կ’ընթանան նորակառոյց կրթօճախի ներքին յարդարման վերջին աշխատանքները:

Բացման արարողութիւնը պիտի կայանայ Փետրուար կամ Մարտ ամիսներուն»,- ըսած է տնօրէնը:

Անդրադառնալով առկայ խնդիրներուն` Ուխտաձորի միջնակարգ դպրոցի տնօրէնը նշած է, որ դպրոցը ունի ուսողութեան, տեղեկատուութեան եւ աշխարհագրութեան ուսուցիչներու կարիք:

Փետրուար 21-ին Հայաստանի  եւ Սփիւռքի մէջ պիտի նշուի UNESCO-ի եւ Հայոց պետութեան կողմէ սահմանուած «Մայրենիի Օր» տօնը, որուն ծիրէն ներս՝ ՀՀ Սփիւռքի նախարարութիւնը կը յայտարարէ «ԻՄ ՔԱՂՑՐ ԼԵԶՈՒ» թեմայով շարադրութիւններու մրցոյթ. լաւագոյն շարադրութիւնները պիտի խրախուսուին Սփիւռքի նախարարութեան կողմէն:

Շարադրութիւնները կրնաք ուղարկել մինչեւ Փետրուար 15` հետեւեալ ելեկտրոնային հասցէով` allarmenian@mindiaspora.am

Անցեալ տարի ԼՂՀ մշակոյթի եւ երիտասարդութեան հարցերու նախարարութեան կողմէ իրականացուած է 400-է աւելի ձեռնարկ, որոնցմէ 288-ը` մշակութային, 136-ը` երիտասարդական:

«Արցախփրէս»-ի թղթակիցի հաղորդմամբ` այս մասին այսօր կայացած մամլոյ ասուլիսի ժամանակ ըսած է ԼՂՀ մշակոյթի եւ երիտասարդութեան հարցերու նախարար Նարինէ Աղաբալեան: Նախարարն ամփոփած է անցած տարուան ընթացքին ԼՂՀ մշակոյթի եւ երիտասարդութեան հարցերու նախարարութեան գործունէութեան արդիւնքները, ապա պատասխանած լրագրողներու հարցերուն:

Ն. Աղաբալեան տեղեկացուցած է, որ նախարարութեան նախաձեռնութեամբ Յունուար 26-ին պիտի կազմակերպուի երիտասարդական քայլարշաւ դէպի Շուշիի շրջանի Քարին տակ գիւղ` նուիրուած գիւղի հերոսամարտի 25-րդ տարեդարձին: Արշաւի մասնակիցները Շուշիի Ղազանչեցոց Սուրբ Ամենափրկիչ եկեղեցւոյ մէջ մոմավառութիւն պիտի կազմակերպեն, յետոյ ալ այնտեղէն քայլերթով պիտի շարժին դէպի Քարին տակ գիւղ` յարգանքի տուրք մատուցելու հերոսամարտին զոհուած ազատամարտիկներու յիշատակին: Այնուհետեւ տեղի կ’ունենայ յուշ-ցերեկոյթ:

«Ծրագրի նպատակն է` նպաստել երիտասարդների համախմբմանը, հայրենաճանաչողութեան բարձրացմանը: Անկախութեան սերնդին ներկայացնելով ազգային-ազատագրական պայքարի հերոսական դրուագներն ու էջերը` երիտասարդութեան մէջ կը սերմանենք ռազմահայրենասիրական դաստիարակութիւն. այս ամէնն էլ կը դառնայ հայրենասիրութեան ու ազգային դաստիարակութեան լաւագոյն ուղեցոյց,- ըսած է ԼՂՀ մշակոյթի եւ երիտասարդութեան հարցերու նախարար Նարինէ Աղաբալեան եւ աւելցուցած,- այն երիտասարդներն էլ, ովքեր ցանկանում են, կարող են միանալ մեր քայլարշաւին»:

 

«Աւրորա» մարդասիրական նախաձեռնութիւնը կը յայտարարէ գեղարուեստական մրցոյթ` 7-14 տարեկան երեխաներու եւ պատանիներու համար:

Մրցոյթին պէտք է ներկայացնել գեղանկարներ, քանդակներ, փայտագործութեան եւ սերամիքական աշխատանքներ, պաթիք (մեղրամոմապատ եւ ներկուած կտաւ), թուային գծանկարչական պատկերներ:

Աշխատանքները պէտք է արտայայտեն մարդկային կեանքի արժեւորման, խիզախութեան, նուիրուածութեան, բարին գործելու եւ լուսաւոր ապագայի մասին գաղափարները:

Գեղարուեստական աշխատանքները պէտք է կատարուած ըլլան 2016-ի Յունուար 1-էն ետք:

Աշխատանքները ներկայացնելու վերջնական ժամկէտը 2017 թուականի Մարտ 31-ն է:

Մրցոյթին մասնակցելու համար անհրաժեշտ է լուսանկարել աշխատանքը եւ ուղարկել art@auroraprize.com ելեկտրոնային հասցէով: Նամակին մէջ պարտադիր է նշել մասնակիցին անունը, մականունը, տարիքը, բնակավայրը, հեռախօսահամարը, գեղարուեստական դպրոցի անունը եւ ուսուցիչին անուն-մականունը:

Մրցոյթի արդիւնքները պիտի ամփոփուին 2017 թուականի Ապրիլին: Լաւագոյն երեք աշխատանքներուն հեղինակները «Աւրորա» մարդասիրական նախաձեռնութեան կողմէ պիտի ստանան պարգեւներ, իսկ լաւագոյն հինգը բացառիկ հնարաւորութիւն պիտի ունենայ մասնակցելու «Աւրորա» մրցանակի շնորհման արարողութեան 2017-ի Մայիս 28-ին, Երեւանի մէջ:

2017-ի Ապրիլ 24-էն մինչեւ Մայիս 28-ը Երեւանի մէջ պիտի կազմակերպուի ցուցահանդէս, ուր պիտի ներկայացուին մրցոյթի լաւագոյն աշխատանքները, պիտի կազմակերպուին վարպետութեան դասեր:

Հարցերու պարագային մասնակիցները կրնան գրել art@auroraprize.com հասցէին կամ հեռաձայնել սոյն թիւին. 098808917

Յունուար 21-ին, ժամը 14:00-ին, Յովհաննէս Շարամբէյեանի անուան ժողովրդական ստեղծագործութեան կեդրոնին մէջ պիտի բացուի Արագած Ախոյեանի` «Վերադարձ…» խորագիրը կրող գեղանկարչական աշխատանքներու ցուցահանդէսը: Այս մասին կը հաղորդէ ՀՀ մշակոյթի նախարարութեան տեղեկատուութեան վարչութիւնը։

Ցուցահանդէսը պիտի գործէ մինչեւ Յունուար 31-ը ներառեալ:

Երբ կու գայ ներշնչանքը, քաղաքական գործիչը կը վերցնէ վրձինը… Եւ ահա գոյնն ու գիծը կը դառնան պատկեր ու մեզի կը փոխանցեն արուեստագէտի զգայական աշխարհին գոյները:

«Վերադարձը…» ստեղծագործողի առաջին անհատական ցուցահանդէսն է, ուր ներկայացուած իւրաքանչիւր կտաւ հայրենի բնաշխարհի նկատմամբ տածած անսահման սիրոյ ու հիացմունքի արտայայտութիւնն է:

Արագած Ախոյեան ծնած է 1962 թուականին Աշտարակի շրջանի Ձորափ գիւղին մէջ: 1985 թուականին աւարտած է Երեւանի Փ. Թերլեմեզեանի անուան գեղարուեստի ուսումնարանը: 1985-1987 աշխատած է «Հայֆիլմ» շարժանկարի արուեստանոցին մէջ` իբրեւ խմբագիր: Յետագայ տարիներուն զբաղած է շինարարական գործունէութեամբ: 2012 թուականին ընտրուած է Ազգային ժողովի պատգամաւոր, այնուհետեւ` Ազգային ժողովի եւրոպական ընդելուզման հարցերու մշտական յանձնաժողովի անդամ:

 

Յունուարի 17-ին, ժամը 17:00-ին, Յ. Թումանեանի անուան պետական տիկնիկային թատրոնին մէջ բացուեցաւ «Սէր» խորագիրը կրող լուսանկարչական ցուցահանդէսը, որ կ’իրականացնէ «Սկարպ» հասարակական կազմակերպութիւնը` ՀՀ մշակոյթի նախարարութեան աջակցութեամբ:

Հաշմանդամութիւն ունեցող երեխաներու եւ անոնց ընտանիքի անդամներու ջերմ փոխյարաբերութիւններն ու սէրը ներկայացնող լուսանկարչական ցուցահանդէսին (լուսանկարիչ` Վիգէն Մնոյեան) ներկայացուած է ընտանիքներու առօրեան, երեխայի հանդէպ սէրն ու վերաբերմունքը:

Սլովաքիոյ մէջ իրականացուող ամէնամեայ լուսանկարչական մրցոյթի սեւ-ճերմակ լուսանկարներու ազատ թեմայով բաժինի ոսկէ մետալակիր դարձած է Լիպոր Շփիմրը` Հայաստանի ու Արցախի մէջ կատարած լուսանկարներուն համար:

Մրցանակը ստանալէն ետք՝ «Օրեր» ամսագիրին եւ www.orer.eu -ին տուած հարցազրոյցին ընթացքին Լիպոր ըսած է, որ այս մրցանակին համար խորապէս շնորհակալ է ողջ հայ ժողովուրդին ու մարդոց, որոնք յատկապէս Արցախի մէջ աջակցած են իրեն լուսանկարելու այն, ինչ ներկայացուած է մրցոյթին: Լուսանկարիչը նաեւ յայտնած է, որ ցանկութիւն ունի իր ոսկէ մետալը փոխանցել Արցախ:

Յիշեցնենք, որ Լիպոր Շփիմրը նաեւ հեղինակ է Հայաստանի ու Արցախի մասին փաստագրագրական երկու ֆիլմի:

Ամանորի եւ Սուրբ Ծննդեան տօներուն՝ համայնքային թանգարանները ունեցած են շուրջ 300 այցելուներ, որոնց գերակշիռ մասը եղած են զբօսաշրջիկներ Ռուսիայէն, Չինաստանէն, ինչպէս նաեւ ԵՄ եւ ԱՊՀ երկիրներէ:

Երեւանի քաղաքապետարանի տեղեկատուութեան եւ հասարակայնութեան հետ կապերու վարչութեան փոխանցած տեղեկութիւններով՝ «Նոր Տարին Երեւանում ­2017» ձեռնարկներու ծրագիրի ծիրէն ներս, այս տարի, առաջին անգամ, Երեւանի քաղաքապետարանի ենթակայութեան թանգարաններէն Երեւան քաղաքի պատմութեան, «Էրեբունի» պատմահնագիտական եւ Ժամանակակից արուեստի թանգարանները Յունուար 2-5 բաց եղած են մայրաքաղաք այցելած հիւրերու եւ տօնը Երեւանի մէջ նշող համաքաղաքացիներու համար:

Աշխատակազմի զբօսաշրջութեան բաժինէն յայտնած են, որ նշուած օրերուն նշուած ժամանակահատուածին՝ համայնքային թանգարանները հիւրընկալած են նաեւ սահմանամերձ գիւղերու դպրոցականներ:

Ստեփանակերտի պատկերասրահը անցեալ տարի ունեցած է շուրջ 2000 այցելու: Այս մասին, ըստ Artsakhpress.am-ի, ըսած է պատկերասրահի տնօրէն Էլենա Դադայեան եւ նշած, որ այցելուները՝ տեղացիներու կողքին, նաեւ զբօսաշրջիկներ են:

«Տարուան ընթացքին կազմակերպած ենք 20-էն աւել ցուցահանդէս: Պատկերասրահը ունի նաեւ իր սեփական ֆոնտը, որ համալրուած է տեղական եւ օտար գեղանկարիչներու եւ քանդակագործներու 400 աշխատանքներով»,- ըսած է Դադայեան:

Պատկերասրահի տնօրէնին խօսքով, Դեկտեմբեր 29-ին, Ամանորի եւ Սուրբ Ծննդեան տօներուն առիթով՝ բացուած է տօնական ցուցահանդէս, որ պիտի գործէ մինչեւ Փետրուարի վերջը:

Ցուցահանդէսին, մասնաւորապէս ներկայացուած են Հայաստանի Հանրապետութեան յայտնի նկարիչներու եւ քանդակագործներու աշխատանքներ:

Նշենք, որ Ստեփանակերտ քաղաքի պատկերասրահը հիմնադրուած է 1982 թուականին: Երկար ընդմիջումէ ետք՝ 2001 թուականի Յուլիս 12-ին, պատկերասրահը վերաբացուած է եւ ժամանակաւորապէս տեղակայուած Ստեփանակերտի քաղաքապետարանի առաջին յարկի դահլիճին մէջ: 2013 թուականի Հոկտեմբեր 12-ին՝ տրուած են շէնքային նոր պայմաններ: