• London

  • Beirut

  • Moscow

  • Los Angeles

  • Paris

  • Sydney

  • Toronto

09. 06. 2023

Թալիշ. Արցախի «Հիւսիսային Դարպաս»ները Կը Վերականգնուին

07.04.2017   07:46

Արցախի Թալիշ գիւղը, որ ամենաշատը տուժած է 2 Ապրիլ, 2016-ին Ազրպէյճանի ծաւալած յարձակումէն, կը վերականգնուի ու կը բնակեցուի: Գիւղի վերականգնման գլխաւոր ծրագիրը հաստատուած է ու աստիճանաբար կ’իրականացուի: Գիւղին մուտքի մօտ հիւրերը կը դիմաւորէ աղբիւրը` հայկական գիւղերու հնամենի խորհրդանիշը: Այդ աղբիւրը վերջերս կառուցուած է եւ կը ծրագրուի, որ ապագային դառնայ վայր, ուր երեկոյեան պիտի հաւաքուին գիւղացիները: Գլխաւոր ճանապարհէն քիչ մը հեռու կը գտնուի գիւղապետարանը:  Անոր մօտ կը կառուցուի հանդիսաւոր արարողութիւններու սրահը:

5

Արցախի Հանրապետութեան կառավարութեան լիազօր ներկայացուցիչ Լեւոն Ապրեսեանի խօսքով` Թալիշ գիւղին մէջ գլխաւոր ծրագիրի համապատասխան, կը ծրագրուի ժամանակակից բնակարաններու կառուցումը մօտ 120 ընտանիքներու համար` ապաստաններու առկայութեամբ: Ըստ պահանջարկի աճի` բնակարաններուն քանակը կրնայ շատնալ: Տուներուն կառուցումը կը նախատեսուի սկսիլ շուտով:

«Թալիշի բնակչութիւնը ստիպուած եղած է շատ բաներու մէջէն անցնիլ, գոյք կորցնել: Անոնք պէտք է պետութեան հոգատարութիւնը զգան», – նշած է Ապրեսեան:

Գիւղի տուները ելեկտրականութիւն ունին, ճանապարհի շինարարութիւնը ընթացքի մէջ է: Կը լուծուի տուներու ջրամատակարարման հարցը:

«Մարդիկ չեն լքած տուները: Ճիշդ է, մեծաւ մասամբ կանայք ու երեխաները մշտական գիւղին մէջ չեն ապրիր, սակայն պարբերաբար կու գան, կը հետեւին տնամերձ հողամասերուն», – ըսած է Լեւոն Ապրեսեան: Նախապէս գիւղացիները կը զբաղէին անասնաբուծութեամբ, կը պահէին ոչխարներ ու խոշոր եղջերաւոր անասուններ, ցորեն կը ցանէին:

6

Սակայն այստեղ, ինչպէս սահմանամերձ գիւղերու մեծ մասին մէջ, հակառակորդի պարբերաբար գնդակոծութիւններուն պատճառով՝ հողի մշակման խնդիր կայ: «Այս պատճառով մօտաւորապէս  1.5 հազար հեքթար ոռոգելի հողատարածքէն, գիւղացիները կրնան օգտագործել մէկ երրորդը», – նշած է ան:

Մինչ ապրիլեան իրադարձութիւնները՝ գիւղին մէջ մօտ 140 ընտանիք կը բնակէր:

«Թալիշը մեր «հիւսիսային դարպասն» է, եւ մենք կը պատրաստուինք լիարժէքօրէն վերականգնել զայն: Մտադիր ենք աւելի շատ բնակիչներ ներգրաւել: Ծրագիրներուն մէջ կայ նաեւ գործարանի կառուցում, գիւղատնտեսական տարբեր ոլորտներու զարգացում»,- նշած է Արցախի Հանրապետութեան կառավարութեան ներկայացուցիչը:

Share Button

Leave a Reply

Your email address will not be published. Required fields are marked *

News

Media Partner