Հայաստան-Սփյուռք 5-րդ համաժողովի շրջանակներում մեկնարկեց Լրագրողների համահայկական 7-րդ համաժողով

ՀՀ սփյուռքի նախարարության նախաձեռնած Հայաստան-Սփյուռք 5-րդ համաժողովի չորս թեմատիկ նիստերը սկսեցին իրենց աշխատանքները՝ «Հայոց ցեղասպանության միջազգային ճանաչման, դատապարտման և հետևանքների վերացման գործընթացը», «Սիրիահայ համայնքի հիմնախնդիրները», «Հայաստան-Սփյուռք գործակցության ներկա հիմնախնդիրներն ու հեռանկարները» և «Լրագրողների համահայկական 7-րդ համաժողով»:

Լրագրողների համաժողովի քննարկման հիմնական ուղղություններն են. «Հայոց Ցեղասպանության ճանաչման և պահանջատիրության գործընթացի լուսաբանումը մամուլում». «Հայոց լեզվի իմացության և պահպանության հիմնախնդիրները», «Քարոզչություն, հակաքարազչություն, տեղեկատվական անվտանգության հիմնախնդիրներ» և «Հայրենիք-Սփյուռք գործակցության զարգացման միտումները և հեռանկարները»:

Լրագրողների համահայկական 7-րդ համաժողովը բացեց Լրագրողների համահայկական համաժողովբները համակարգող մարմնի նախագահ, Լիբանանի «Ազդակ» օրաթերթի գլխավոր խմբագիր Շահան Գանտահարյանը:

Ողջույնի խոսքով հանդես եկավ Հայաստանի ժուռնալիստների միության նախագահ Աստղիկ Գևորգյանը: Տիկին Գևորգյանը բարձր գնահատեց նախորդ համաժողովների և ՀՀ սփյուռքի նախարարության կազմակերպչական աշխատանքները: Ողջունելով ներկաներին՝ նա կարևորեց Հայրենիք-Սփյուռք գործակցության և այս առիթով կազմակերպված Հայաստան-Սփյուռք համաժողովը և մաղթեց արգասաբեր աշխատանք:

Այնուհետև զեկույցներով հանդես եկան Վալենսիայի «Արարատ» հայկական միության նախագահ Արարատ Ղուկասյանը, Կանադայի «Հորիզոն» շաբաթաթերթի գլխավոր խմբագիր Վահագն Կարագաշյանը, Իրանի «Լույս» ամսագրի գլխավոր խմբագիր Էդիկ Բաղդասարյանը և այլոք:

Արարատ Ղուկասյանը իր խոսքում ասաց, որ Վալեսիայի խորհրդարան են դիմել պահանջով և խնդրանքով, որպեսզի Հայոց Ցեղասպանությունը այնտեղ արդարացի լուծում ունենա, և հասել են դրական արդյունքի:

Վահագն Կարագաշյանը ներկաներին փոխանցեց Բուլղարիայի մի խումբ լրագրողների ողջույնի խոսքը: Էդիկ Բաղդասարյանը փորձեց ներկայացնել իրենց կատարված աշխատանքները: Նա ասաց, որ չնայած Իրանում իրենց արգելել են որպես լրատվամիջոց հանդես գալ, 1995 թվականից սկսել են իրենց ակտիվ աշխատանքները, կայքում զետեղված են ցեղասպանությանը նվիրված շուրջ 1500 նյութ, հրատարակվել են տարբեր գրքեր:

Հայագետ Հակոբ Չոլաքյանը կարևորեց լրագրողների՝ Հայոց Ցեղասպանության լուսաբանման հարցում համախմբված աշխատելը և հնարավորինս շատ տեղեկատվական նյութերի տարածումը ամբողջ աշխարհով:

Համաժողովի մասնակից լրագրողները փոխանակեցին իրենց փորձը, որոշեցին առավել սերտորեն համագործակցել Հայոց Ցեղասպանության 100-րդ տարելիցի հետ կապված միջոցառումների  լուսաբանման աշխատանքներ կատարելու ուղղությամբ:

Սեպտեմբերի 20-ին կշարունակվեն Լրագրողների համահայկական 7-րդ համաժողովի աշխատանքները:

www.hayernaysor.am