*ԼԻԲԱՆԱՆ* Թորոս Սիրանոսեանի կենսագրութեան եւ արուեստի աշխարհին մէջ անոր ունեցած յիսնամեայ աշխատանքին մասին «Օրագրութիւններ յուշերու մէջ» գիրքին հրատարակութեան առիթով եւ հովանաւորութեամբ Լիբանանի (խմբ.) զբօսաշրջութեան նախարար Միշել Ֆարաոնի, երէկ` Չորեքշաբթի, 16 Յուլիսի երեկոյեան ժամը 8:30-ին, «Քազինօ տիւ Լիպանի» մէջ տեղի ունեցաւ մտերմիկ ձեռնարկ մը, որուն ընթացքին Թ. Սիրանոսեան մակագրեց իր գիրքը: Այս մասին կը հաղորդէ Լիբանանի «Ազդակ» օրաթերթը:
Ձեռնարկին ներկայ էին ուժանիւթի եւ ջուրի հարցերու նախարար Արթիւր Նազարեան, Մեծի Տանն Կիլիկիոյ Արամ Ա. կաթողիկոսի ներկայացուցիչ Փառէն Ծ. վրդ. Վարդանեան, երեսփոխաններ, նախկին նախարարներ, ինչպէս նաեւ լիբանանցի արուեստագէտներ եւ Թ. Սիրանոսեանի մտերիմ անձնաւորութիւններ:
Ձեռնարկին ընթացքին Թորոս Սիրանոսեան ողջունեց ներկաները եւ բոլոր անոնք, որոնք իր կեանքին եւ ասպարէզին մէջ զօրակցած են իրեն: Ան շնորհակալութիւն յայտնեց «Օրագրութիւններ յուշերու մէջ» գիրքի հեղինակ Էլիաս Հատտատի:
Լիբանանցի բանաստեղծ Միշել Ժեհա ներկայացուց Թորոս Սիրանոսեանը` ընդգծելով օտար արուեստագէտները Լիբանանին ծանօթացնելու, երկրին արուեստի մարզը բարգաւաճեցնելու եւ Լիբանանի անունը բարձր պահելու մէջ անոր ունեցած մեծ վաստակը:
Այս առիթով, Պուրճ Համուտի առեւտրականներու միութեան նախագահ Փոլ Այանեան գնահատեց Թ. Սիրանոսեանի աշխատանքները եւ յուշանուէր մը յանձնեց անոր:
Ձեռնարկին աւարտին տեղի ունեցաւ երգահանդէս մը, որուն ընթացքին ելոյթ ունեցան լիբանանցի հանրածանօթ երգիչներ: