Category: News & Articles

 Դպրոցահասակ երեխաների շրջանում ագրեսիվ դրսևորումների, բռնության դեպքերի, ֆիզիկական կռիվներին մասնակցության թվաքանակով հայաստանյան ցուցանիշները միջազգային համեմատությամբ բարձր են: «Արմենպրես»-ի հաղորդմամբ` «ԱՅԳ» հոգեբանական ծառայությունների կենտրոնը անհրաժեշտություն է համարում Հայաստանում դպրոցական ագրեսիայի դրսևորման, բռնարարքների թվի նվազեցմանն ուղղված ծրագիր մշակել: «Դպրոցական ագրեսիան, բռնությունը անդրադառնում է երեխաների, դեռահասների հոգեկան առողջության վրա՝ ի հայտ բերելով բազմաթիվ հոգեբանական խնդիրներ, որոնք ժամանակին չբացահայտվելով և չհաղթահարվելով, չափահաս տարիքում կարող են առավել լուրջ խնդիրների պատճառ դառնալ։ Ուստի, դպրոցներում ագրեսիայի կանխարգելման միջոցառումների կազմակերպումը, մանկավարժների և հոգեբանների համատեղ աշխատանքը, բռնության դեպքերի ամբողջական և համակողմանի վերլուծությունը մեծ կարևորություն ունեցող հիմնահարց է»,-նշում են կենտրոնից, հավելելով, որ այս ոլորտում հոգեբանական ծառայությունների կենտրոնի գործունեության 12 տարիների ընթացքում հսկայական փորձ է հավաքվել՝ նմանատիպ հայտերով երեխաների և դեռահասների հետ հոգեբանական խորհրդատվության, նրանց ծնողների հետ զրույցների, մանկավարժների հետ վերապատրաստման ծրագրերի, դպրոցներում տարբեր միջոցառումների և ակցիաների արդյունքում։

Մեկ այլ կարևոր խնդիր, որ բարձրացնում է հոգեբանական կենտրոնը, դա դպրոցականների մասնագիտական կողմնորոշումն է, քանի որ միայն մասնագիտության ճիշտ և գիտակցված ընտրության արդյունքում է հնարավոր մասնագիտական զգալի նվաճումներ ձեռք բերել, ինչպես նաև աշխատավայրում ունենալ լիարժեքության, բավարարվածության և ներդաշնակության զգացում: «Կատարել մասնագիտական ճիշտ ընտրություն՝ նշանակում է ընտրել այնպիսի մասնագիտություն, որն առավելագույնս համապատասխանում է սեփական ընդունակություններին, հետաքրքրություններին և անձնային առանձնահատկություններին: Ի հավելումն այդ ամենին՝ պետք է հաշվի առնել տվյալ մասնագիտության պահանջարկն ու առաջխաղացման, ինքնակատարելագործման հնարավորությունները: Ցավոք, դեռահասները չունեն բավարար փորձ և գիտելիքներ տարբեր մասնագիտությունների մասին, որպեսզի կարողանան անսխալ որոշում կայացնեն»,-տեղեկացնում են հոգեբանական կենտրոնից՝  հավելելով, որ այս տարիների ընթացքում կենտրոնի մասնագիտական կողմնորոշման ծառայությանը դիմած դեռահասների մեծ թիվը վկայում է, որ կարիք կա դպրոցների հետ համատեղ իրականացնելու մասնագիտական կողմնորոշմանը նպաստող տարբեր ընդգրկուն ծրագրեր։

 Հայտնի ջութակահար Նիկոլայ Մադոյանը «Գինեսի» ռեկորդակիր է դարձել 2017 թվականի փետրվարի 11-12-ը Երևանի Կոմիտասի անվան Կամերային երաժշտության տանը 33 ժամ, 2 րոպե, 41 վայրկյան անընդմեջ նվագով: Նա ժամը մեկ հինգ րոպե դադարի հնարավորություն է ունեցել: Մադոյանը ռեկորդը սահմանել է հանուն հայրենիքի և այն նվիրում է Արցախյան քառօրյա պատերազմի անմահ հերոսներին:

Այս մասին հոկտեմբերի 18-ին լրագրողների  հետ հանդիպմանը խոսեցին ջութակահարը և «Դյուցազնագրքի» հեղինակ, Դյուցազունների ասոցիացիայի նախագահ Վարդան Թովմասյանը:

«Ռեկորդը գրանցելու համար ընտրել եմ 59 հանրահայտ և բավականին բարդ ստեղծագործություններ: Ներառել եմ նաև չորս հայկական գործեր` Կոմիտասի «Ծիրանի ծառ»-ը, «Քելեր, ցոլեր»-ը, «Կռունկ»-ը և Էդվարդ Բաղդասարյանի «Նոկտյուրն»-ը»»,-«Արմենպրես»-ի հաղորդմամբ` նշեց ջութակահարը:

Նա ընդգծեց, որ ութ ժամում 59 ստեղծագործությունները կրկնվել են ութ անգամ, սակայն ինքը դրանցից յուրաքանչյուրը յուրովի է մատուցել, նոր մեկնաբանությամբ:

Նիկոլայ Մադոյանի խոսքով` այդ փորձն իրեն հիանալի հնարավորություն է տվել ստուգել իր տեխնիկական հնարավորությունները: «Ես կարողացա գտնել մեթոդներ ու միջոցներ, որոնք ինձ թույլ տվեցին ժամեր շարունակ նվագելով հանդերձ բարելավել ծանրաբեռնված մկաններիս վիճակը ու շարունակել նվագը»,-շեշտեց ջութակահարը:

Անդրադառնալով «Գինեսի» ռեկորդակիր լինելու ընձեռած լայն հնարավորություններին` նա ասաց, որ այդ հանգամանքը յուրաքանչյուր արտիստի առաջ մեծ դռներ է բացում: «Եթե համերգային ծրագրի համար նախատեսված պաստառի վրա նշվում է, որ տվյալ երաժիշտը «Գինեսի» ռեկորդակիր է, նրա նկատմամբ հետաքրքրությունը զգալիորեն մեծանում է»,-եզրափակեց Մադոյանը:

Վարդան Թովմասյանի խոսքով` Նիկոլայ Մադոյանը ևս մեկ ռեկորդ է սահմանել, որը ներկայացվել է «Գինեսի» ռեկորդների գրասենյակ, սակայն դրա պատասխանը դեռ չի ստացվել: «Նա Նիկոլայ Ռիմսկի-Կորսակովի «Բոռի թռիչքը» ստեղծագործությունը սովորական ջութակով նվագել է 46 վայրկյանում, իսկ անգլիացի մի երաժիշտ էլեկտրական ջութակով նույն գործն ավելի երկար է նվագել»,-ասաց Թովմասյանը և հավելեց, որ Հայաստանում Նիկոլայ Մադոյանն առաջին ռեկորդակիրն է մշակութային ոլորտում:

Նիկոլայ Մադոյանը ծնվել է 1973 թվականի հունիսի 1-ին Երևանում: Սովորել է Երևանի թիվ 12 երաժշտական դպրոցի Էմմա Գեսելևայի (Նուրազյանի) ջութակի դասարանում, այնուհետև` Երևանի Պ. Ի. Չայկովսկու անվան երաժշտական դպրոցում, Հրաչյա Բոգդանյանի ջութակի դասարանում: 1986թ. տեղափոխվել է Նովոսիբիրսկ և ուսումը շարունակել տեղի Գլինկայի անվան կոնսերվատորիայում՝ Զախար Բրոնի դասարանում: Կրթվել է նաև Լյուբեկի Երաժշտական բարձրագույն դպրոցում, ավարտել է Երևանի Կոմիտասի անվան պետական կոնսերվատորիայի ասպիրանտուրան՝ Արամ Շամշյանի ղեկավարությամբ և որոշ ժամանակ դասավանդել կոնսերվատորիայում:

Նա Գևորգ Կլենկամպֆի անվան ջութակահարների միջազգային մրցույթի հաղթող է: 1988-ին Մոնրեալում և Մյունխենում հանդես է եկել բարեգործական համերգներով և հասույթը ուղղել Սպիտակի ավերիչ երկրաշարժից տուժած հաշմանդամ երեխաների բուժմանը: Ելույթներ է ունեցել աշխարհի բազում սիմֆոնիկ նվագախմբերի հետ և այնպիսի հայտնի դիրիժորների ղեկավարությամբ, ինչպիսիք են Կ. Մազուրը, Ռ. Հիքոքսը, Կ. Աբբադոն, Ա. Կացը, Դ. Կիտաենկոն, Վ. Գերգիևը, Լ. Հագերը, Մ. Բամբերտը, Պ. Դուֆալոն, Ն.Ալեքսեևը և այլք: Թողարկել է շուրջ 25 ձայնասկավառակ: 2004-ին արժանացել է Հայաստանի վաստակավոր արտիստի կոչման:  

ՀՀ գյուղատնտեսության նախարարությունը ՄԱԿ-ի պարենի եւ գյուղատնտեսության կազմակերպության (ՊԳԿ) հետ ձկնաբուծարան է հիմնել, որում ներդրվելու է ջրի օգտագործման կիսափակ շղթայի տեխնոլոգիան: «Արմենպրես»–ի հաղորդմամբ, լրագրողների հետ հանդիպմանն այս մասին ասաց ՀՀ գյուղատնտեսության   նախարար   Իգնատի  Առաքելյանը:

Նրա խոսքով`այն շուտով կփորձարկվի, ինչի արդյունքում հնարավոր կլինի ոլորտի համար հիմնավորել այդ տեխնոլոգիաների ներդրման արդյունավետությունը. «Դա կարեւոր խնդիր է Արարատյան դաշտավայրում, եւ եթե այդ պիլոտային ծրագիրն ապացուցի, որ կիսափակ շղթան արդյունավետ է, մենք աստիճանաբար կզարգացնենք այդ ուղղությունը, ինչով կտնտեսենք նաեւ ստորգետնյա ջրերի օգտագործումը՝ պահպանելով ձկնաբուծությունը Հայաստանում»,-ասաց նախարարը:

 Սահմանամերձ շրջաններին աջակցության ծրագրով մի շարք գյուղեր օգնություն են ստանում սփյուռքահայ բարերարներից:  Նախարարությունը նպաստում է լուծելու առաջնահերթ խնդիրներ:

«Արմենպրես»–ի հաղորդմամբ՝ հոկտեմբերի 18-ին լրագրողների հետ հանդիպմանն այս մասին ասաց ՀՀ սփյուռքի նախարարության համահայկական ծրագրերի վարչության պետ Գագիկ Գյանջումյանը:

«Այս տարվանից նախարարությունն իրականացնում է մի նոր ծրագիր: Մենք սփյուռքում գտնում ենք բարերարների, կազմակերպությունների, որոնք աջակցություն են ցուցաբերում, լուծում Հայաստանի սահմանամերձ գյուղերի առաջնահերթ խնդիրները: Ընտրվել են աջակցության կարիք ունեցող մոտ 48 գյուղ: Մենք նախօրոք ուսումնասիրում ենք այդ գյուղերի խնդիրները, ներկայացնում դրանք սփյուռքի մեր գործընկերներին»,-ասաց Գյանջումյանը:

Գյուղերն ընտրվում են այնպես, որ ոչ մի կարիքավոր գյուղ չվրիպի ուշադրությունից: Լինում են կենցաղային, մշակութային, քաղաքաշինական, բարեկարգման, ոռոգման ցանցի և շատ այլ խնդիրներ: Եղել է նաև ջրագծերի անցկացման օգնություն:

Խնդիրները ներկայացնելուց հետո նախարարությունը ստացել է բավական լուրջ արձագանքներ: Եվ առաջիկա տարիներին դրանց իրականացման դեպքում մեծ ներդրում կունենանք: «Վերջերս արգենտինահայ մի երիտասարդ միջոցներ էր գտել և երաժշտական գործիքներ բերել սահմանամերձ շրջանների երաժշտական կրթօջախների համար»,-նշեց  համահայկական ծրագրերի վարչության պետը:

Ծրագրի շրջանակում այս տարի հիմնովին վերանորոգվել է Այգեհովիտ գյուղի  մանկապարտեզը և բժշկական հաստատությունը, որից օգտվում են մի քանի գյուղեր: Վերանորոգմանն աջակցել է շվեյցարահայ բարերար:

 

Հայաստանի Հանրապետության գյուղատնտեսության նախարարությունն ու Պարենի եւ գյուղատնտեսության կազմակերպությունը (ՊԳԿ) համատեղ ծրագրեր են նախանշել` գյուղատնտեսության ոլորտները զարգացնելու ուղղությամբ:

 «Արմենպրես»–ի հաղորդմամբ, գյուղատնտեսության նախարարությունում լրագրողների հետ հանդիպմանն այս մասին ասաց Պարենի եւ գյուղատնտեսության կազմակերպության գլխավոր   տնօրենի օգնական, Եվրոպայի  եւ Կենտրոնական Ասիայի տարածաշրջանային ներկայացուցիչ Վլադիմիր Ռախմանինը:

Մեջ բերելով` Պարենի համաշխարհային օրվա «Փոխենք միգրացիայի ապագան: Ներդրումներ կատարենք պարենի անվտանգության եւ գյուղի զարգացման ոլորտներում» կարգախոսը՝  նա նշեց, որ միգրացիան պատմականորեն կատարում է դրական դեր տնտեսության մեջ, քանի որ սեզոնային աշխատանքները նպաստում են տնտեսության զարգացմանը: «Մեզ համար շատ կարեւոր է, եւ մենք պետք է հասկանանք, որ առանց այն մարդկանց, ովքեր աշխատում են գյուղատնտեսության ոլորտում, մեզ դժվար կլինի ապահովել գյուղատնտեսական արտադրանքի ծավալը, որն անհրաժեշտ է»,-ասաց Ռախմանինը: Դրա համար, ըստ բանախոսի, ՊԳԿ-ն առաջարկում է խթանել ներդրումները գյուղատնտեսության ոլորտում, որպեսզի աշխատատեղեր ստեղծվեն, եւ ավելանան ֆերմերների եկամուտները, որպեսզի մարդիկ ստիպված չլինեն լքել իրենց բնակության վայրերը: «Միգրացիան պետք է լինի ընտրություն, այլ ոչ անհրաժեշտություն»,-հավելեց բանախոսը:

Ամեն տարի հոկտեմբերի 16-ը նշվում է որպես Պարենի համաշխարհային օր, որը հիմնվել է 1979 թվականին, ՄԱԿ-ի Պարենի եւ գյուղատնտեսության կազմակերպության համաժողովի ժամանակ: Օրվա գլխավոր նպատակն աշխարհում  գոյություն ունեցող պարենային խնդրի շուրջ բնակչության տեղեկացվածության մակարդակի բարձրացումն է:

 Մեծի ՏաննԿիլիկիո կաթողիկոսությունն իր շարունակական զորակցությունն է հայտնում Եվրոպայի Հայ դատի հանձնախմբին: «Արմենպրես»-ի հաղորդմամբ՝ Եվրոպահայության չորրորդ համագումարի պաշտոնական բացմանն այս մասին ասաց Մեծի ՏաննԿիլիկիո կաթողիկոս Արամ Ա -ն: 
«Մենք այստեղ հավաքվել ենք ևս մեկ անգամ որպես նույն ընտանիքի պատկանող անձինք: Պայմանների բերումով տարբեր տեղերում ենք ապրում, հարցերին տարբեր հայեցակետերով մոտենում, սակայն մեր կյանքի ճամփին մեկ նպատակ կա, որովհետև մեր հայրենիքը նույնն է, մեր պահանջատիրությունը նույնն է: Տարբեր մոտեցումներով և շեշտադրումներով խոսում ենք և պետք է խոսենք՝ մեր առջև ունենալով մեկ սրբազան նպատակ, որն ինձ համար ազգային պահանջատիրությունն է: Այն եկեղեցու և հատկապես Մեծի Տանն Կիլիկիո կաթողիկոսության համար սովորական երևույթ չէ, սովորական դատ չէ, այն գոյության իրականություն է դարձել: Այսօր առավել, քան երբևէ անկախ Հայաստանն ինքն է  իրավատերը, պահանջատերը մեր ժողովրդի արդար իրավունքների, և  հարյուրամյակի հռչակագիրը, որը Հայաստանի նախագահը կարդաց Ծիծեռնակաբերդում,  համայն աշխարհի դիմաց, եկավ փաստելու, որ  Հայաստանն ինքն իրավատեր է»,-ասաց Վեհափառը:  

Նրա խոսքով՝ ազգային պահանջատիրության հիմքը նաև Արցախի ժողովրդի ինքնիշխանության, անկախության իրավունքի պաշտպանությունն ու ամրապնդումն է:

«Հայաստանը,  Արցախը, Հայ դատի գրասենյակները,  մենք բոլորս զանազան կերպով  աշխատանք ենք տանում և պետք է տանենք: Ես նկատում եմ Հայաստանի և Սփյուռքի ամբողջական զորակցությունը Արցախի նկատմամբ: Մեր ժողովրդի իրավունքն է Արցախի անկախությունը, ամենից առաջ դա մեր ժողովրդի պատմական իրավունքն է, քանի որ մեր ժողովուրդն այնտեղ է, Արցախում: Այն չգրավեց մեր ժողովուրդը, ուրիշները ուրիշին նվեր տվեցին: Մեր ժողովուրդն իր պատմական հողի վրա է»,-ասաց Արամ Ա Վեհափառը՝  ընդգծելով, թե կարևոր է նաև հարցի իրավական կողմը, քանի որ  ժողովրդի արդար իրավունքն է իր հողի վրա կազմակերպել իր անկախությունն ու  ինքնիշխանությունը:

«Եվ այս գիտակցությամբ մենք զորավիգ կանգնած ենք Արցախի անկախ պետությանը»,-ասաց նա:  

Վեհափառնն ընդգծեց, որ անհրաժեշտ է ազգային պահանջատիրությունը տարածել ամենուր և միասնական պայքար մղել ու այդ առումով նա առաջարկում է, բացի Եվրոպայից և Հյուսիսային Ամերիկայից, Հայ դատի գրասենյակներ ունենալ աշխարհի այլ հատվածներում:

«Հյուսիսային Ամերիկան և Եվրոպան կարևոր են, սակայն կարծում եմ՝ նաև կարևոր է իսլամական աշխարհը, քանի որ այնտեղ մենք չունենք այնպիսի ներկայացվածություն, որքան պետք է լինի»,- շեշտեց Վեհափառը:

Մեծ բարերար Լևոն Հայրապետյանի մահը մեծ կորուստ է համայն հայության համար: Այս մասին «Արմենպրես»–ի հետ զրույցում նշեց Արցախի Հանրապետության պետական նախարար Արայիկ Հարությունյանը:

«Խորին ցավով տեղեկացա հայ ազգի մեծ բարերար Լևոն Հայրապետյանի մահվան մասին: Անխոս, սա մեծ կորուստ է համայն հայության համար: Անգնահատելի է Լևոն Հայրապետյանի նվիրումն ու ավանդը Արցախի զարգացման և պաշտպանության ապահովման գործում: Նրա անունը վաղուցվանից ոսկե տառերով է գրվել հայոց պատմության մեջ և բոլորիս սրտերում: Համոզված եմ, որ հայ ժողովրդի մոտ երկար տարիներ վառ կմնա նրա պայծառ հիշատակը, որի խոսուն վկաները կլինեն նրա կողմից կատարված բազում գործերը հայրենիքում»,-ասաց Արայիկ Հարությունյանը:

Հոկտեմբերի 18-ին՝ լուսադեմին, երկարատեւ հիվանդությունից հետո կյանքից հեռացել է ռուսաստանաբնակ հայազգի գործարար, բարերար Լեւոն Հայրապետյանը: Նա տառապում էր ծանր հիվանդությամբ:

Լևոն Հայրապետյանն ակտիվ մասնակցություն է ունեցել ԼՂՀ ստեղծման գործում և համարվում է դրա գլխավոր  հովանավորներից մեկը։ Համարվում է ամենախոշոր ներդրողը Լեռնային Ղարաբաղի ժամանակակիցպատմության մեջ։  Նրա ծրագրերն իրագործվել են Ստեփանակերտում, Մարտակերտի շրջանի Վանք գյուղում։Գործարարի միջոցներով 2000-2002 թվականներին վերակառուցվել է հայկական հռչակավոր Գանձասարիվանական համալիրը (13-րդ դար ),  որը ներկայիս օրերում Ղարաբաղի ամենաբարեկարգված սրբավայրերիցմեկն է համարվում։ Զգալի միջոցներ են ներդրվել  Վանք գյուղի վանական համալիրի շրջակայքում տեղակայվածենթակառուցվածքների զարգացման գործում։ 2008 թ.  հոկտեմբերի 16-ին, Լեռնային ՂարաբաղիՀանրապետության մայրաքաղաք Ստեփանակերտին մոտ՝  հինավուրց Շուշիում  և պատմական Գանձասարումբարերարը կազմակերպել է նորապսակների համատեղ պսակադրություն։ Այդ  արարողությունը, 700 երիտասարդների մասնակցությամբ, իր տեսակով առաջինն էր ոչ միայն Արցախում, այլև  ողջ Հայաստանում։ Մեծ հարսանիքի օրը 200 զույգ պսակադրվել է Գանձասարի վանքում։ Մի քանի ժամ անց ևս 500  զույգպսակադրվել է Շուշիի Ղազանչեցոց եկեղեցում։

Նա ձերբակալվել էր Մոսկվայում՝ խարդախության կասկածանքով, սակայն չէր ընդունում իրեն առաջադրվածմեղադրանքը:

 ՀՀ տնտեսական զարգացման և ներդրումների նախարարը տնտեսական զարգացման ոլորտում կառավարության որդեգրած քաղաքականությունն արդարացված է համարում: «Արմենպրես»-ի փոխանցմամբ՝ այս մասին հայտարարեց նախարարը՝ հենվելով ընթացիկ տարվա ութ ամիսների տնտեսական ցուցանիշների վրա: «Մեկ տարի առաջ հայտարարած տեսլականը ևս իրականացվել է և արդարացված է: Մեր հիմնական նպատակադրումն էր, որ հետագա զարգացումը տեսնում ենք արտահանելի տնտեսության ձևավորման մեջ: Առաջին ութ ամիսներին արձանագրված արդյունքներով՝ մենք տեսնում ենք դա»,-ասաց նախարարը:

Մասնավորապես, նա նկատեց, որ ապրանքների արտահանման աճը 2017-ի ութ ամիսներին նախորդ տարվա նույն ժամանակահատվածի համեմատ կազմել է 21.7 տոկոս, ապրանքերի ու ծառայությունների արտահանման ընդհանուր աճը գերազանցել է 20 տոկոսը: «Սա թույլ է տալիս մեզ ենթադրել, որ այս տարվա արդյունքներով ՀՆԱ-ի մեջ ապրանքների ու ծառայությունների արտահանման տեսակարար կշիռը կկարողանանք հասցնել 37-38 տոկոսի: Սա էլ իր հերթին հիմք է տալիս մտածելու, որ առաջիկայում կարողանանք ապահովել այն ցուցանիշը, որ կառավարության ծրագրում է ամրագրված՝ ապրանքների և ծառայությունների արտահանման կշիռը ՀՆԱ-ում հասցնել 40-45 տոկոսի»,-ավելացրեց Սուրեն Կարայանը:

Նախարարի խոսքով՝ տնտեսական ակտիվության 5.5 տոկոսանոց ցուցանիշը պայմանավորված է արդյունաբերության, առևտրի և ծառայությունների ճյուղերում երկնիշ աճով: «Հատկանշական է, որ արդյունաբերական արտադրանքի արտադրության ծավալներն աճել են 12.4 տոկոսով, որն էլ հիմնական շարժիչ ուժն է եղել տնտեսական ակտիվության աճի համար: Մշակող արդյունաբերության արտադրանքի ծավալների 16.4-տոկոսանոց աճն էլ ապահովել է ընդհանուր ադյունաբերական արտադրանքի արտադրության ծավալների աճը»,-հավելեց նախարարը:

Խոսելով արտահանման խրախուսմանն ուղղված աշխատանքների մասին՝ Սուրեն Կարայանը նշեց, որ քայլեր են ձեռնարկել ԵԱՏՄ երկրներում հայկական արտադրանքի լայն ներկայացվածության համար: «Աշխատանքներ ենք իրականացրել ԵԱՏՄ շուկայում հայկական արտադրանքի մուտքի դյուրացման ուղղությամբ՝ փորձելով վերացնել առաջացող հնարավոր խոչընդոտները»,-ասաց նա: Նրա տեղեկացմամբ՝ ԵԱՏՄ երկրներ հայկական արտադրանքի արտահանումն աճել է 33.4 տոկոսով, ԵՄ երկրներ՝ 32.6 տոկոսով:

 ՀՀ կառավարության եւ ՄԱԿ-ի պարենի եւ գյուղատնտեսության կազմակերպության (ՊԳԿ) միջեւ համաձայնագիրը, որը  շուտով կստորագրվի, թույլ կտա դյուրացնելերկուստեք աշխատանքներն ու ավելի լայնամասշտաբ  ծրագրեր իրականացնել ՊԳԿ-ի միջոցով:

«Արմենպրես»–ի հաղորդմամբ, լրագրողների հետ հանդիպմանը ՀՀ գյուղատնտեսության նախարար Իգնատի  Առաքելյանն ասաց, որ համագործակցության ուղղություններն արդեն նախանշված են: «Դրանք վերաբերում են անասնաբուծությանը, անասնաբուժությանը, բուսասանիտարիային, սննդի անվտանգությանը, կայուն պարենային ապահովության ծրագրերին»,-ասաց նա՝ հավելելով, որ այսօր կազմակերպության հետ բավական լուրջ ծրագրեր են իրականացվում հայկական գենետիկական ռեսուրսները պահպանելու ուղղությամբ: «Հիմա տնկարան ենք հիմնում ֆիլոքսերադիմացկուն հայկական խաղողի տեսակ ստանալու համար, ինչը թույլ կտա պահպանել տեսակն ապագայում»,-նշեց նախարարը:

ՊԳԿ գլխավոր տնօրենի օգնական, Եվրոպայի եւ Կենտրոնական Ասիայի տարածաշրջանային  ներկայացուցիչ Վլադիմիր Ռախմանինն իր խոսքում նշեց, որ  համաձայնագիրը թույլ կտա ավելի ամրապնդել եւ ընդլայնել համագործակցությունը: «Ես շատ շնորհակալ եմ գյուղատնտեսության նախարարությանը արդյունավետ համագործակցության համար: Մենք գյուղատնտեսության նախարարության հետ  մշակում ենք համատեղ ծրագրեր եւ մինչ 2020 թվականը ուրվագծել ենք համագործակցության կոնկրետ ուղղություններ»,-ասաց Ռախմանինը:

Հայաստանը 1993 թվականից անդամակցում է Պարենի եւ գյուղատնտեսության կազմակերպությանը: 2004 թվականից կազմակերպությունն ունի իր մշտական ներկայացուցչությունը Հայաստանում: