• London

  • Beirut

  • Moscow

  • Los Angeles

  • Paris

  • Sydney

  • Toronto

Նախագահներ Սարգսեան եւ Սահակեան Ներկայ Գտնուեցան Ս. Զատկուան Տօնին Առթիւ Մատուցուած Հայրապետական Ս. Պատարագին

19.04.2017   18:41

Հայաստանի նախագահ Սերժ Սարգսեան եւ տիկին Ռիթա Սարգսեան, Արցախի նախագահ Բակօ Սահակեան, Մայր Աթոռ Սուրբ Էջմիածինի մէջ, Ապրիլ 17-ին ներկայ գտնուեցան Յիսուս Քրիստոսի հրաշափառ Յարութեան` Ս. Զատկուան տօնին առթիւ մատուցուած Հայրապետական Ս. Պատարագին:

Գարեգին Բ. Ամենայն Հայոց կաթողիկոս Մայր Աթոռէն իր պատգամը յղեց մասնաւորապէս ըսելով․ «Մեր կեանքը արժէք ու բովանդակութիւն կը ստանայ Քրիստոսի մահուան ու Յարութեան խորհուրդի լոյսին տակ: Ապրիլ Քրիստոսով եւ Քրիստոսի համար, ահա այս է փրկարար ուղին մեր կեանքի, հիմքը, պայմանն ու երաշխիքը թէ՛ որպէս անհատ, եւ թէ՛ որպէս հաւաքականութիւն մեր հոգեւոր աճի ու զօրացման, նաեւ` մեր հայրենիքի յառաջընթացին ու զարգացման, աշխարհասփիւռ մեր ժողովուրդի բարօրութեան ու լուսաւոր գալիքին:

«Այսօր բազմաթիւ խնդիրներու առջեւ կանգնած է մեր երկիրը, մեր սահմաններուն վրայ խաղաղութիւնը անկայուն է, տակաւին յաղթահարուած չեն աղքատութիւնն ու գործազրկութիւնը, հրամայական է արտագաղթի կանխումը եւ մեր ժողովուրդի զաւակներուն դարձը դէպի հայրենիք: Յանդիման այս մարտահրաւէրներուն մեր ժողովուրդը ունի վսեմ յատկանիշները հայրենանուիրումի, ազգասիրութեան, ընտանիքի նուիրականութեան, ծնողքի հանդէպ սիրոյ, ունի յանձնառութիւն զոհողութիւններու` յանուն իր սրբազան արժէքներուն. եւ մենք ի զօրու ենք անառիկ պահելու հայրենի սահմանները, բարօր ու բարգաւաճ դարձնելու մեր երկիրը, բացառելու ազգային մեր կեանքէն բոլոր տագնապներն ու ցնցումները:

Ամենայն Հայոց Կաթողիկոսը ժողովուրդին պատգամեց, որ մեր կեանքի ընթացքը, մեր կենսակերպը մեզ ոչ թէ պէտք է ջլատէ, պառակտէ, այլ միաւորէ եւ դարձնէ համախումբ` դիմագրաւելու համար մեր կեանքի մարտահրաւէրներն ու փորձութիւնները եւ լաւատեսութեամբ իրականութիւն դարձնելու ազգային մեր տեսիլքները։

Share Button

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Media Partner