• London

  • Beirut

  • Moscow

  • Los Angeles

  • Paris

  • Sydney

  • Toronto

Կէաւուր Թաղին Մէջ Կէաւուր Չէր Մնացած, Հիմա Թաղամասն Ալ Չմնաց

04.07.2016   08:07

Թարգմանեց՝ Մելինէ Անումեանը

Երբ 2015 թուականի Դեկտեմբեր 2-ին Տիարպեքիրի Սուր գաւառին մէջ յայտարարուած փողոց դուրս գալու արգելքը վերջերս մասամբ վերացուեցաւ, սկսան ի յայտ գալ Սուրի կրած վնասներուն չափերը:

Սուր գաւառին մէջ գտնուող Սուրբ Կիրակոս եկեղեցւոյ մէջ կատարուած ուսումնասիրութիւնները բացայայտեցին, որ վնասուած է եկեղեցւոյ ոչ այնքան դուրսի, այլ` ներսի կողմը, որ 6 ամիս ոչ ոք չէր կրնար տեսնել` բախումներու թատերաբեմին մէջ գտնուելուն պատճառով:

Տիարպեքիրի մէջ մարդու իրաւունքներու պաշտպանները եկեղեցին այցելելէ ետք յայտնած են, որ եկեղեցւոյ պատերը, տանիքը եւ զանգակատունը լուրջ վնասներ չեն կրած:

Սակայն, միւս կողմէ, անոնք արձանագրած են, որ եկեղեցւոյ բոլոր ապակիները կոտրուած են, անիկա օգտագործուած է որպէս ռազմակայան, նստարանները պատուհաններուն յենելով` պատնէշներ ստեղծած են, մէջը վառարան սարքած են, ուր այրած են որոշ նստարաններ, իսկ եկեղեցիին ներսը` աղբանոցի վերածած:

Մարդու իրաւունքներու պաշտպանները նշելով, թէ մեծ աւերածութեան ենթարկուած է յատկապէս Սուրբ Կիրակոսի այգիին մէջ գտնուող փոքր եկեղեցին, նաեւ յայտնած են. «Թալանուած է եկեղեցւոյ գրասենեակը, կողոպտուած` վաճառելու նպատակով այստեղ գտնուող գիրքերը, ինչպէս նաեւ` նուէրները: «Քահանայատուն» անուանուող ներքեւի յարկին վրայ բացուած է մեծ անցք մը, որմէ կապ հաստատուած է Սուրբ Կիրակոսի կողքը գտնուող քաղդէական եկեղեցւոյ հետ»:

Մարդու իրաւունքներու պաշտպանները նաեւ ընդգծած են, որ մեծ չափով աւերածութեան ենթարկուած է նաեւ այն փողոցը, ուր կը գտնուի Սուրբ Կիրակոս եկեղեցին:

Անոնք յայտնելով թաղամասի բոլոր խանութներու ու տուներու քանդուած ըլլալու մասին, նշած են, որ առաջ նեղլիկ եղած այդ փողոցը այժմ ամբողջովին դատարկ է եւ վերածուած է բաց տարածքի մը, նաեւ շեշտած են, թէ Սուրբ Կիրակոս եկեղեցիին եւ քաղդէական եկեղեցիին պատկանած շուրջ 25 խանութները եւս գետնին հաւասարեցուած են:

Մարդու իրաւունքներու պաշտպանները յայտարարած են. «Յատկապէս Մկրտիչ Մարկոսեանի փողոցը այլեւս հարթ տարածք է, որմէ նոյնիսկ Մարտինքափըն կ’երեւի: Կէաւուր թաղը այլեւս ամբողջովին դատարկ է եւ մեծ տարածք: Խճաքարերը հաւաքուած են, բայց Եօղուրթփազար փողոցին մէջ տուները դեռ կանգուն են: Կէաւուր թաղին մէջ կէաւուր չէր մնացած, հիմա թաղամասն ալ չմնաց»,- «Ակօս»-ին կը գրէ Նազան Օզճանը:

Akunq.net

Share Button

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Media Partner