• London

  • Beirut

  • Moscow

  • Los Angeles

  • Paris

  • Sydney

  • Toronto

30. 03. 2023

Սէրը Հիմքն Ու Էութիւնն Է Քրիստոնէական Հաւատքին Շեշտեց Ն.Ս.Օ.Տ.Տ. Արամ Ա. Կաթողիկոս

14.04.2017   11:09

ԱՆԹԻԼԻԱՍ – Հայ Եկեղեցւոյ ծիսակատարութեան ամէնէն հարուստ ու խորհրդաւոր օրերէն մէկն է Քրիստոսի տնօրինական կեանքի վերջին Հինգշաբթին՝ Աւագ Հինգշաբթին։ Այս օրը Ս. Պատարագի եւ Հաղորդութեան խորհուրդի հաստատման, Ոտնլուայի, Քրիստոսի մատնութեան, ձերբակալութեան ու խաչելութեան յիշատակումի օրն է։

Դարերէն մեզի եկող աւանդութեան համաձայն, Աւագ Հինգշաբթի՝ 13 Ապրիլ, 2017-ի առաւօտուն, Անթիլիասի Մայրավանքի Ս. Գրիգոր Լուսաւորիչ Մայր Տաճարին մէջ տեղի ունեցաւ Հաղորդութեան Սուրբ եւ Անմահ Պատարագ։

Նոյն օրը յետ միջօրէի ժամը 4:00-ին՝ նախագահութեամբ Ն.Ս.Օ.Տ.Տ. Արամ Ա. Վեհափառ Հայրապետին տեղի ունեցաւ Ոտնլուայի հոգեպարար արարողութիւնը, որ քրիստոնէական կեանքին մէջ խոնարհութեան ու հեզութեան մեծագոյն խորհուրդն ու օրինակը կը բովանդակէ իր մէջ:

Նորին Սրբութիւնը, Քրիստոսի օրինակով, ղենջակ կապած, 12 առաքեալները խորհրդանշող 12 դպրեվանեցիներու ոտքերը լուալէ ետք, իր հայրապետական պատգամին մէջ շեշտեց սիրոյ, համերաշխութեան, խաղաղութեան ու խոնարհութեան անհրաժեշտութիւնը: Վեհափառ Հայրապետը իր պատգամին մէջ ըսաւ. «Եթէ ուզենք քրիստոնէութիւնը մէկ բառի մէջ խտացնել կամ փորձել Աստուածաշունչը մէկ բառով արտայայտել, ուրիշ բան չի կրնար ըլլալ, եթէ ոչ ՍԷՐ բառը: Մեր հաւատքի բոլոր արտայայտութիւնները, Աստուածաշունչէն սկսեալ մինչեւ մեր եկեղեցւոյ ծէսն ու խորհուրդները, որպէս հիմք, նպատակ ունին ՍԷՐը»։ Նորին Սրբութիւնը իր խօսքը շարունակելով ընդգծեց Աստուծոյ մարդուն հանդէպ ունեցած անսահման սէրը, յայտնելով՝ թէ Աստուծոյ մարդուն հետ ունեցած յարաբերութիւնը սիրոյ վրայ հիմնուած է: Վեհափառ Հայրապետը իր պատգամը աւարտեց կոչ ուղղելով հաւատացեալ ժողովուրդին առաջնորդուելու Քրիստոսի սիրոյ օրինակով:

Երեկոյեան ժամը 7:00-ին հաւատացեալներու հոծ բազմութեան ներկայութեան տեղի ունեցաւ Քրիստոսի մատնութիւնը, չարչարանքները եւ խաչելութիւնը խորհրդանշող, որ հայ եկեղեցւոյ ամէնէն հոգեպարար եւ յուզիչ արարողութիւնն է՝ Խաւարման Գիշերը:

Արարողութեանց աւարտին, Նորին Սրբութեան «Պահպանիչ» աղօթքով ու Քրիստոսի կենարար Ս. Խաչի օրհնութեամբ, հաւատացեալներ Աւագ Հինգշաբթիի խորհուրդով վերանորոգուած, ուշ գիշերին մեկնեցան Անթիլիասի Մայրավանքէն։

 

Share Button

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

News

Media Partner