Գլխաւոր | | Երեւանի Քաղաքապետարանը Կը Շարունակէ Աջակցիլ Սուրիահայ Ընտանիքներուն

Երեւանի Քաղաքապետարանը Կը Շարունակէ Աջակցիլ Սուրիահայ Ընտանիքներուն

10.09.2015 19:41

Սուրիահայ ընտանիքներուն համակողմանի աջակցութիւն ցուցաբերելու նպատակով, Երեւանի քաղաքապետ Տարօն Մարգարեանի յանձնարարութեամբ՝ ինչպէս նախորդ տարի, այս տարի ալ կեանքի կոչուած են շարք մը ծրագիրներ: Այս մասին կը տեղեկացնէ Երեւանի քաղաքապետարանի տեղեկատուութեան եւ հասարակայնութեան հետ կապերու վարչութիւնը:

2015ի Յունուար–Օգոստոս ամիսներուն քաղաքապետարանին կողմէ ըստ վարչական շրջաններու, 1018 սուրիահայ ընտանիքներու տրամադրուած է բազմաբնոյթ աջակցութիւն: 92 ընտանիքներ ընդգրկուած են պետական ընկերային ծրագիրներու մէջ:

Նշուած ժամանակաշրջանին Երեւանի քաղաքապետարանի ենթակայութեան բժշկական հաստատութիւններ դիմած են 1498 սուրիահայեր, որոնց ցուցաբերուած է անվճար բժշկական օգնութիւն եւ սպասարկում:

Հիմնականօրէն արտահերթ հիմքով Երեւանի մանկապարտէզներ ընդունուած են նախադպրոցական տարիքի 103 երախաներ, քաղաքապետարանի ենթակայութեան թիւով 84 դպրոցներու մէջ կը յաճախեն 452 սուրիահայ աշակերտներ:

Երեւանի քաղաքապետ Տարօն Մարգարեանի յանձնարարութեամբ՝ նոր ուսումնական տարուան նախօրեակին երեւանաբնակ սուրիահայ 1-4 դասարաններու 167 աշակերտներ նուէր ստացած են դպրոցական պայուսակներ եւ գրենական պիտոյքներ:
Սուրիահայ երախաները մշտապէս մասնակցած են նաեւ մշակութային տարբեր ձեռնարկներու, անվճար այցելած են թանգարաններ եւ մշակութային այլ օճախներ: