Category: News & Articles

Կառավարության որոշմամբ Առողջապահության նախարարությունում իրականացվում են կառուցվածքային փոփոխություններ: Մասնավորապես, նախատեսվում է հաշվապահական հաշվառման և ֆինանսատնտեսագիտական բաժինները միավորել՝ ստեղծելով ֆինանսատնտեսագիտական վարչություն, արտաքին կապերի բաժինը վերակազմավորման ձևով վերակազմակերպել միջազգային հարաբերությունների վարչության: Ինչպես նաև ստեղծել քաղաքացիների բողոքներին և դիմումներին արագ արձագանքման բաժին: Այդ մասին կառավարության նիստում նշեց ՀՀ առողջապահության փոխնախարար Սերգեյ Խաչատրյանը: «Նախարարության պետական առողջապահական գործակալությունում լուծարվելու է բժշկական ծառայությունների գնման և տեղեկատվական բաժինը, տարածքային մարմինները: Ստեղծվելու են ֆինանսավորման ապահովման և էլեկտրոնային առողջապահական համակարգի գործունեության ապահովման ու հաշվետվությունների ամփոփման բաժիններ: Տնտեսագիտության և ֆինանսական հոսքերի կառավարման բաժինը վերանվանվելու է առողջապահական և ֆինանսական ցուցանիշների ծրագրավորման, հոսքերի կառավարման և վերլուծության բաժնի, փաստաթղթային հսկողության և պայմանագրային բաժինը՝ պայմանագրային գործընթացի կազմակերպման բաժնի»,- «Արմենպրես»–ի փոխանցմամբ, ասաց փոխնախարարը:

ՀՀ վարչապետ Կարեն Կարապետյանը նշեց, որ նախարարությունում կատարվելիք փոփոխությունների արդյունքում կտնտեսվի 86 մլն դրամ, կկրճատվի 35 հաստիք:

 Հայաստանի կառավարությունը համաձայնություն տվեց Ռուսաստանի Դաշնության հետ միջազգային ավտոմոբիլային հաղորդակցության մասին համաձայնագրի կնքման առաջարկությանը:

ՀՀ տրանսպորտի, կապի և տեղեկատվական տխնոլոգիաների նախարար Վահան Մարտիրոսյանը նշեց, որ ըստ համաձայնագրի, երկու երկրների միջև և իրենց տարածքներով տարանցմամբ, ինչպես նաև դեպի երրորդ երկիր և երրորդ երկրից բեռների միջպետական փոխադրումները կիրականացվեն առանց թույլտվությունների: Թույլտվություն կպահանջվի միայն Եվրասիական տնտեսական միության ոչ անդամ-պետությունների հետ երրորդ երկրի փոխադրումներ իրականացնելիս: «Միջպետական կանոնավոր և ոչ կանոնավոր ուղևորափոխադրումները կիրականացվեն թույլտվությունների առկայության դեպքում: Երկու երկրների լիազոր մարմինները համաձայնագրեր կփոխանակեն յուրաքանչյուր տարի: Բացառություն կլինեն միայն անսարք ավտոբուսներով փոխադրումները», – «Արմենպրես»–ի փոխանցմամբ, ասաց նախարարը:

Համաձայնագրով նախատեսվում է ծանրաքաշ, մեծ եզրաչափերով և վտանգավոր բեռներ փոխադրող ավտոտրանսպորտային միջոցներով երկու պետությունների միջև փոխադրումների կանոնակարգում: Այդ փոխադրումները իրականացնելու նպատակով լիազոր մարմինները կտրամադրեն հատուկ թույլտվություն: Համաձայնագիրը ներառում է փոխադրումների անվտանգության, ապահովագրության և վերահսկողության մեխանիզմներ: Միաժամանակ բեռների և ուղևորների փոխադրումներ իրականացնող փոխադրողները համաձայնագրի շրջանակում երկու պետությունների տարածքով փոխադրումներ իրականացնելիս փոխադարձաբար ազատվում են մյուս պետության տարածքում տրանսպորտային միջոցների սեփականության և դրանց օգտագործման հետ կապված տուրքերից, գանձումներից և մուծումներից` բացառությամբ այն դեպքերի, երբ տվյալ պետության օրենսդրությամբ այլ բան նախատեսված չէ:

Վանաձորի Մարշալ Բաղրամյանի անվան թիվ 26 հիմնական դպրոցը, որն ունի 30 աշակերտ և զբաղեցնում է շուրջ 5069 քմ տարածք, կփակվի և կմիացվի հարևանությամբ գտնվող թիվ 28 դպրոցին, որը կառուցվել է երկրաշարժից հետո։ Այդ մասին կառավարության նիստում նշեց Տարածքային կառավարման և զարգացման նախարար Դավիթ Լոքյանը:

«Դպրոցի պահպանությունն ու վերականգնումը բացարձակապես չի հիմնավորվում։ Բոլորին պետք է հասկանալի դառնա, որ այս թվակազմով և այս տարածքով դպրոց պահելը չի արդարացվում և կրթությունը նորմալ չէ այդ դպրոցում», – «Արմենպրես»-ի փոխանցմամբ, ասաց Լոքյանը։

Ի պատասխան վարչապետի հարցի՝ նախարարն ասաց, որ դպրոցների օպտիմալացման արդյունքում կտնտեսվի 19 միլիոն դրամ: Վարչապետը նաև հետաքրքրվեց, թե հարցը տեղում համաձայնեցվա՞ծ է։ «Բոլորը գիտեն, հարցը բավական երկար քննարկվել է», – ասաց Դավիթ Լոքյանը։

ՀՀ ոստիկանությունում վարչարարությունը պարզեցնելու նպատակով առաջարկվում է փոփոխություններ կատարել և տրանսպորտային միջոցների վերահաշվառման թույլտվությունը տրամադրել 10 օրվա ընթացքում՝ մեկ ամսվա փոխարեն: «Մասնավորապես՝ նախատեսվում է ՀՀ ոստիկանության «Ճանապարհային ոստիկանության» ծառայության կողմից տրամադրվող՝ տրանսպորտային միջոցի վերասարքավորման թույլտվություն տալու, ինչպես նաև առանց թույլտվության վերասարքավորված տրանսպորտային միջոցների վերահաշվառման թույլտվություն տալու մասին որոշումները դիմումը ստանալու օրվանից մեկամսյա ժամկետի փոխարեն տրամադրել տասնօրյա ժամկետում»,- «Արմենպրես»–ի փոխանցմամբ, նախագիծը ներկայացնելիս ասաց ՀՀ   ոստիկանապետ   Վլադիմիր  Գասպարյանը՝ ավելացնելով, որ ընտրվել է տասնօրյա ժամկետը, որովհետև այդ ընթացքում հնարավոր է տրանսպորտային միջոցների զննություն, կառուցվածքային փոփոխությունների զննություն անցկացնելու, հաճախ նույնիսկ փորձագետներին, ընկերություններին, գործարաններին հարցումներ ուղարկելու անհրաժեշտություն առաջանա:

«Նախագիծը մշակվել է սույն թվականի հունիսին` Ձեր կողմից տրված հանձնարարականի հիման վրա. նպատակ ունի պարզեցնել պետական մարմինների կողմից մատուցված ծառայությունները»,- դիմելով վարչապետ Կարեն Կարապետյանին՝ ասաց ոստիկանապետը:

Նախագիծն ընդունվեց, այն ուժի մեջ կմտնի պաշտոնական հրապարակումից մեկ օր անց:

 

ՀՀ կառավարությունը հավանություն տվեց ՀՀ քրեական օրենսգրքում լրացումներ կատարելու մասին նախագծին, որով առաջարկվում է ավելացնել նոր հոդված`քրեականացնելով բուժաշխատողի գործունեությունը խոչընդոտելը:

«ԱԺ պատգամավորներ Հրայր Թովմասյանի և Կարեն Ավագյանի ներկայացված նախագծի նախնական տարբերակում առաջարկվում է բուժաշխատողների օրինական մասնագիտական գործունեությունը խոչընդոտելու համար նախատեսել պատիժ տուգանքի ձևով՝ նվազագույն աշխատավարձի հարյուրապատիկից երկուհարյուրապատիկի չափով, իսկ բուժաշխատողի նկատմամբ բռնություն գործադրելու համար նախատեսել պատիժ ազատազրկում՝  3-7 տարի ժամկետով: Սահմանվել է նաև պատասխանատվություն բուժաշխատողների մասնագիտական գործունեությունը խոչընդոտելու համար, որը կատարվել է կյանքի կամ առողջության համար ոչ թե վտանգավոր բռնություն գործադրելով այլ  գործադրելու  սպառնալիքով: Այդ արարքի համար պատիժ նախատեսել` նվազագույն  աշխատավարձի երեքհարյուրապատիկից հինգհարյուրապատիկի չափով»,- «Արմենպրես»-ի փոխանցմամբ, ասաց ՀՀ արդարադատության նախարար Դավիթ Հարությունյանը:

Նրա խոսքով, նախագծի ընդունման արդյունքում կերաշխավորվի բուժաշխատողի օրինական շահերի պաշտպանությունը: Ըստ նրա, նախագծի նպատակը ոչ թե պատժիչ համակարգի խստացումն է, այլ բուժաշխատողների նկատմամբ ոտնձգությունների կանխումն ու կանխարգելումը:

 

Հայաստանի գիտության և տեխնոլոգիաների հիմնադրամը (FAST) Հայաստանում առաջմղման չորս հիմնական ուղղություն է առանձնացրել։ Նախորդ վեց ամիսներին կատարված հետազոտության արդյունքում դուրս է բերվել տվյալագիտության, կենսատեխնոլոգիաների, դրոնների կառավարման և առաջադեմ նյութերի (Advanced materials) ոլորտում նախագծերի իրականացման հնարավորությունը։ Առաջիկա հինգ տարում FAST-ը նախատեսում է 250 միլիոն դոլարի ներդրումային ծրագրեր ապահովել Հայաստանում։ Լրագրողների հետ զրույցում այս մասին  հայտարարեց FAST-ի գործադիր տնօրեն Արմեն Օրուջյանը։ «Հիմնադրամը գործում է այս տարվա ապրիլից, մենք ներկայում ռազմավարական պլանավորումների փուլում ենք։ Մեր նպատակն է ստեղծել գիտական հետազոտությունների խթանման համար բարենպաստ միջավայր Հայաստանում։ Մի քանի նախաձեռնություններ ունենք, որոնց մասին այսօր կհայտարարենք»,-«Արմենպրես»-ի հաղորդմամբ՝ ասաց Արմեն Օրուջյանը։

Անդրադառնալով «Մեքենայական ուսուցումը՝ գիտական հայտնագործությունների խթան» թեմայով միջազգային աշխատաժողովին ու ԱՄՆ Գիտության ազգային հիմնադրամի (NSF) հետ համագործակցությանը՝ Արմեն Օրուջյանը նկատեց, որ իրենց հիմնական նպատակը հայ և արտասահմանցի գիտնականների միջև կապերի հաստատումն է, որը նպաստի հետագայում համատեղ հետազոտությունների իրականացմանը։ «Ուրախ ենք, որ մեր երիտասարդ մասնագետները, ովքեր սովորում են մաթեմատիկական գիտություն, ֆիզիկա, համակարգչային տեխնոլոգիաներ, շփվում են առաջադեմ գիտնականների հետ, ու շատ լավ է տեսնել այսպիսի մեծ հետաքրքրություն»,-հավելեց մեր զրուցակիցը։

Կառավարությունը հաստատեց «Ն.Բ. Հակոբյանի անվան ընդհանուր հիգիենայի և մասնագիտական հիվանդությունների գիտահետազոտական ինստիտուտ» ՓԲԸ-ն «Ակադեմիկոս Ս. Ավդալբեկյանի անվան առողջապահության ազգային ինստիտուտ»-ին միացնելու որոշման նախագիծը: «Արմենպրես»-ի փոխանցմամբ, ՀՀ առողջապահության փոխնախարար Սերգեյ Խաչատրյանը նշեց, որ նշված փոփոխությունը բխում է առողջապահական համակարգում առկա ռեսուրսների առավել նպատակային օգտագործման ու օպտիմալացման անհրաժեշտությունից: «Նախատեսվում է 11 հաստիքի կրճատում և 9 միլիոն դրամի խնայողություն»,- ասաց փոխնախարարը:

Կառավարության նիստում ՀՀ վարչապետ Կարեն Կարապետյանը հանձնարարեց քայլեր ձեռնարկել նվազեցնելու Երևանում աշխատանքային օրերին առաջացող խցանումների դեպքերը: Վարչապետը հիշեցրեց, որ վերջին ժամանակահատվածում կառավարության կողմից նախաձեռնվել են օրենսդրական և գործնական բարեփոխումներ ճանապարհային կանոնների պահպանման ու նվազ նշանակության իրավախախտումների նախազգուշացման կիրառման ուղղությամբ:

«Ճանապարհային կանոնների խախտման դեպքերով տուգանքներին հավելվող տույժերը վերացվել են: Մշակված նոր Վարչական իրավախախտումների վերաբերյալ օրենսգրքի նախագծով նախատեսվել են նախազգուշացման ինստիտուտի կիրառման ճկուն մեխանիզմներ: Միաժամանակ, փաստ է, որ աշխատանքային օրերին Երևան քաղաքում առկա են խցանումներ, երթևեկության կազմակերպման խնդիրներ, որոնց պատճառները բազմազան են և պահանջում են լուծումներ: Մասնավորապես, խնդիրներ են առաջանում նաև ուղևորների նստելու կամ իջնելու դեպքերում օրենսգրքով սահմանված մեկ րոպե ժամանակահատվածի պահպանման մասով»,- «Արմենպրես»–ի փոխանցմամբ, ասաց վարչապետը:

Ելնելով վերոնշյալից՝ Կարեն Կարապետյանը Տրանսպորտի, կապի և տեղեկատվական տեխնոլոգիաների նախարարին, Քաղաքաշինության պետական կոմիտեի նախագահին, Ոստիկանության պետին հանձնարարեց և Երևանի քաղաքապետին առաջարկեց 2-ամսյա ժամկետում ուսումնասիրել Երևանում խցանումների նվազեցման հնարավորությունները՝ հաշվի առնելով որոշ հատվածներում ավտոկայանատեղերի սահմանափակման, ճանապարհային երթևեկության կազմակերպման և հսկողության խստացման, ժամանակակից տեխնոլոգիաների ներդրման, ինչպես նաև այլընտրանքային երթուղիների կառուցման հարցերը,  և կառավարության աշխատակազմ ներկայացնել առաջարկություններ:

Տրանսպորտի, կապի և տեղեկատվական տեխնոլոգիաների նախարարին և Ոստիկանության պետին հանձնարարվեց 1-ամսյա ժամկետում ուսումնասիրել ուղևորների նստելու կամ իջնելու նպատակով կանգառ կատարելու դեպքերում սահմանված մեկ րոպե ժամանակահատվածի գերազանցումների արձանագրման մոտեցումների վերանայման հնարավորությունը և կառավարության աշխատակազմ ներկայացնել առաջարկություններ:

 

Կառավարության նիստում վարչապետ Կարեն Կարապետյանն անդրադարձավ անտառների կառավարման և պահպանման արդյունավետության բարձրացմանն ու առկա խնդիրների լուծմանը՝ տեղեկացնելով, որ մոտ ժամանակներս շահագրգիռ մարմինների հետ ամբողջությամբ քննարկված և լրամշակված հայեցակարգը կներկայացվի Կառավարության աշխատակազմ:  

«Միաժամանակ իրականացված ուսումնասիրությունների արդյունքում պարզ է դարձել, որ մի կողմից՝ ապօրինի ծառահատումների համար սահմանված վարչական և քրեական պատասխանատվության միջոցները չեն նպաստում դրանց կանխարգելմանը, մյուս կողմից՝ վերջին տարիներին ավելի քան երեք անգամ նվազեցվել են բնափայտի մթերման օրինական ծավալները»,- «Արմենպրես»–ի փոխանցմամբ, ասաց վարչապետը:

Հաշվի առնելով վերոնշյալ խնդիրները և դրանց լուծման հրատապությունը՝ Կարեն Կարապետյանը Բնապահպանության, Գյուղատնտեսության, Տարածքային կառավարման և զարգացման նախարարներին հանձնարարեց շարունակել անտառամերձ համայնքների բնակիչներին թափուկի անվճար տրամադրման գործընթացը՝ առաջնայնությունը տալով սոցիալապես խոցելի խմբերին, միաժամանակ ապահովելով այդ գործընթացի թափանցիկությունը, 10-օրյա ժամկետում համատեղ քննարկել և կառավարության աշխատակազմ ներկայացնել բնափայտի օրինական մթերման վերանայված և օպտիմալ ծավալները՝  հիմնված բնական վերաճի և սահմանափակումների վրա:

Միաժամանակ, ըստ հանձնարարականի, 2-ամսյա ժամկետում վերոնշյալ գերատեսչությունները պետք է համատեղ մշակեն և կառավարության աշխատակազմ ներկայացնեն ապօրինի անտառահատումների վերաբերյալ վարչական և քրեական պատասխանատվության միջոցների հստակեցման և խստացման վերաբերյալ իրավական ակտի նախագծեր:

«Հաշվի առնելով շուկայի իրական ծավալները, գնահատելով ստվերը՝ մենք պետք է «Հայանտառ»-ում բարեփոխումներ կատարենք, տրամաբանության չափով լեգալացնենք անտառահատումները, ֆինանսական միջոցներ ուղղենք «Հայանտառ», որպեսզի վերջինը պատրաստ լինի գույքով և անհրաժեշտ գործիքներով՝ իրականացնելու մաքսիմալ կոշտ հսկողություն»,- ընդգծեց վարչապետը:  

 

Արցախի Հանրապետության պետական նախարար Արայիկ Հարությունյանը հոկտեմբերի 18-ին ԱՀ գյուղատնտեսության նախարար Ժիրայր Միրզոյանի և Գյուղի և գյուղատնտեսության աջակցության հիմնադրամի տնօրեն Աշոտ Բախշիյանի ուղեկցությամբ և Քաշաթաղի շրջանի համայնքների ղեկավարների, գյուղատնտեսության պատասխանատուների և խոշոր հողագործների մասնակցությամբ, Բերձորում հրավիրել է խորհրդակցություն՝ գյուղատնտեսական և շրջանի զարգացման հետ կապված մի շարք այլ թեմաների շուրջ:

Ինչպես «Արմենպրես»-ին տեղեկացրին Արցախի Հանրապետության կառավարության աշխատակազմի տեղեկատվության և հասարակայնության հետ կապերի բաժնից, խորհրդակցությանը զեկույցով հանդես է եկել շրջանի գյուղատնտեսության բաժնի պատասխանատուն: Վերջինս նշել է, որ, վարչակազմի ղեկավարի հանձնարարությամբ, ձևավորվել է շտաբ, որպեսզի կազմակերպված ձևով ժամանակին հասցնեն աշնանացանի բոլոր աշխատանքները:

Անդրադառնալով անցնող տարվա ցուցանիշներին՝ զեկուցողը շեշտադրել է, որ Քաշաթաղի շրջանը շարունակում է հանրապետությունում պահպանել գյուղատնտեսության համախառն բերքի արտադրության առումով առաջատարի դիրքը: Ցանված 20,207 հեկտարից հնձվել է 20,052 հեկտարը, որից ստացված համախառն բերքը կազմել է 55,817 տոննա:

Արայիկ Հարությունյանը բավարար է գնահատել ներկայացված արդյունքները և նշել, որ, հաշվի առնելով շրջանում առկա գյուղատնտեսական մեծ ներուժը, անելիքները դեռևս շատ են: «Քաշաթաղի շրջանում պետական միջոցներով շուտով երկու փորձնական ծրագիր կսկսենք: Առաջինը հարավային և հյուսիսային թևերում կաթի մթերման ժամանակակից կետերի բացումն է, որոնք լրացուցիչ կնպաստեն շրջանում անասնապահության զարգացմանը: Երկրորդը՝ հատկապես հյուսիսային թևում, որտեղ առկա է տարբեր տեսակի պտուղների իրացման խնդիրը, կտրամադրվեն չրերի պատրաստման սարքավորումներ: Այնուհետև պատրաստված ողջ ապրանքատեսականին պետական աջակցությամբ կգնվի»,- ասել է պետնախարարը և հավելել, որ նախատեսվում է նաև սառնարանային ժամանակակից տնտեսությունների ստեղծում, որտեղ բնակիչները հնարավորություն կունենան պահել իրենց բերքը և ձմեռային սեզոնին ավելի թանկ գնով շուկա հանել:

Հանդիպման ընթացքում Արայիկ Հարությունյանն անդրադարձել է նաև հայրենադարձության խնդրին: Նա նշել է, որ կառավարությունը նախատեսում է շրջանում ակտիվացնել հայրենադարձության ծրագիրը, և շրջվարչակազմի ղեկավարին հանձնարարել է գույքագրել շրջանի ամբողջ այն բնակֆոնդը, որը հնարավոր է վերակառուցել: Արայիկ Հարությունյանը նշել է նաև, որ հայրենադարձության խթանման համար շրջանի տարբեր համայնքներում ծրագրվում է հարյուրավոր նոր բնակարաններ կառուցել: Խորհրդակցության ընթացքում Արայիկ Հարությունյանը պատասխանել է նաև ներկաներին հուզող հարցերին: