• London

  • Beirut

  • Moscow

  • Los Angeles

  • Paris

  • Sydney

  • Toronto

Սամսունի Մէջ Հայ Վարպետներու Հեղինակած Եզակի 150-Ամեայ Երկաթեայ Դուռ Մը Պահպանուած է

13.02.2017   08:46

Թուրքիոյ Սամսուն քաղաքին մէջ շուրջ 50 տարի դարբնագործութեամբ զբաղող Իպրահիմ Գերմին իր պապէն ժառանգութիւն ստացած է 150-ամեայ  պատմութիւն ունեցող երկաթէ դուռ մը: Ermenihaber.am-ը՝ վկայակոչելով «Hürriyet» թերթի կայքը կը տեղեկացնէ, որ որպէս պատմամշակութային արժէք արձանագրուած այս դուռը պատրաստուած է հայ դարբիններու կողմէ, սակայն դրան վրայ հեղինակին մասին որեւէ գրութիւն չէ պահպանուած:

Այս պատմական երկաթեայ դրան վրայ քանդակուած է Մարիամ Աստուածածինի պատկերը: Այդ պատճառով ստեղծագործութիւնը գրաւած է նաեւ տեղի կաթոլիկ եկեղեցւոյ քահանային ուշադրութիւնը: Քահանան առաջարկած է իրեն վաճառել դուռը կամ Աստուածածինի քանդակը, սակայն Գերմին չէ համաձայնած: Դուռը ուզած են գնել նաեւ պատմական արժէքներով հետաքրքրուող  շատ մը այլ անձիք, սակայն դարբինը հրաժարած է զայն վաճառելէ:

«Այս դուռը հայերու ժամանակներէն մնացած է: Պապս զայն պահպանած է: Ասիկա պատրաստող դարբինը այնպիսի վարպետութիւն ըրած է, որ ես, որպէս արհեստաւոր, կը նախանձիմ: Բոլոր անկիւնները միլիմեթրի ճշդութեամբ նոյնն են: Հայ վարպետը շատ լաւ գործ ըրած է: Իսկ դրան վրայ եղած փականի նմանը ամբողջ Թուրքիոյ մէջ այլեւս չկայ: Այսպիսի դռները պատուիրուած են` սուլթաններու ու արքաներու հիւրընկալուած վայրերուն մէջ օգտագործելու համար»,- կը պատմէ թուրք արհետսաւորը:

Ան կը նշէ, որ 250 քիլօ կշռող այս դռներէն ընդամէնը երկու օրինակ գոյութիւն ունի, երկուքն ալ իր մօտ են: Ատոնցմէ իւրաքանչիւրը 2 մեթր 40սմ բարձրութիւն ունի: Դռներու համար տարբեր գնորդներ առաջարկած են մինչեւ 30.000 լիրա, սակայն ան անդրդուելի մնացած է:

65-ամեայ Իպրահիմ Գերմիի խօսքով` այս ստեղծագործութիւնը իրեն համար ամենաթանկ ընտանեկան ժառանգութիւնն է եւ ան չի պատրաստուիր զայն վաճառելու: Աւելին, դարբինը յորդորած է իր որդիներուն ու թոռներուն` նոյնպէս երբեք չվաճառել այս իւրայատուկ պատմական ստեղծագործութիւնը:

Share Button

Leave a Reply

Your email address will not be published. Required fields are marked *

Լրատվական գործընկեր