Հայաստան-Սփյուռք վեցերորդ համահայկական համաժողովը լինելու է քաղաքական, տնտեսական, ազգային և փորձի փոխանակման մեծ հարթակ: «Արմենպրես»–ի հաղորդմամբ` սեպտեմբերի 9-ին լրագրողների հետ հանդիպման ժամանակ այս մասին ասաց ՀՀ սփյուռքի նախարար ՀրանուշՀակոբյանը: Նրա խոսքով` Երևանում սեպտեմբերի 18-20-ը կայանալիք «Փոխադարձ վստահություն, միասնականություն և պատասխանատվություն» Հայաստան-Սփյուռք վեցերորդ համահայկական համաժողովը ի մի է բերելու և ամփոփելու է Հայաստան-Սփյուռք գործակցության ներկա արդյունքները և ապագային միտված անելիքները:
«Համաժողովին իրենց մասնակցությունն են հաստատել ավելի քան 1500 մարդ աշխարհի 70 երկրից: Հատկանշականն այն է, որ համաժողովին առաջին անգամ են մասնակցելու մոտ 20 հեռավոր երկրներից, ինչպիսիք են Չինաստանը, Սինգապուրը, Սուդանը, Եթովպիան, Թայլանդը և այլն»,- ասաց Հակոբյանը:
Նախարարը նշեց, որ համաժողովի ընթացքում տեղի կունենան 3 լիագումար նիստեր, ինչպես նաև 4 ուղղություններով նախատեսված 16 թեմատիկ նիստեր, որոնք վերաբերում են Հայաստանի տնտեսության զարգացմանը, տարածաշրջանային մարտահրավերներին և ազգային անվտանգության օրակարգին, արտաքին քաղաքականության օրակարգին և Հայոց ցեղասպանության հետևանքների վերացմանն ու հայապահպանության հիմնախնդիրներին:
«Առաջին լիագումար նիստում ելույթ կունենան Ամենայն Հայոց Կաթողիկոս Գարեգին Բ-ն, Հայաստանի Հանրապետության նախագահը, Արցախի Հանրապետության նախագահը, Մեծի Տանն Կիլիկիո Կաթողիկոս Արամ Ա-ն: Համաժողովի երկրորդ օրվա լիագումար նիստում հանդես կգա վարչապետ Կարեն Կարապետյանը, կքննարկվեն տնտեսական քաղաքականության հետ կապված հարցեր: Իսկ համաժողովի աշխատանքների ամփոփիչ նիստում ելույթ կունենա Ազգային Ժողովի նախագահ Արա Բաբլոյանը»,- ասաց Հակոբյանը:
Նախարարը նշեց, որ համաժողովի ընթացքում կներկայացվեն նախորդ՝ 5-րդ համահայկական համաժողովի առաջարկների արդյունքում ձևավորված ծրագրերի իրագործման ուղղությամբ կատարված աշխատանքները, ի մի կբերվեն բոլոր նոր առաջարկները, որոնք հետագայում կվերածվեն ծրագրերի և կյանքի կկոչվեն:
«Համաժողովում առաջին անգամ անցկացվելու են երկու կլոր-սեղան: Առաջին կլոր-սեղանին քննարկման կդրվեն աշխատանքային խմբի առաջարկները Համահայկական խորհրդի ձևավորման սկզբունքների վերաբերյալ: Երկրորդ կլոր-սեղան քննարկումը նվիրվելու է Հայաստանի Հանրապետության հռչակման և Մայիսյան հերոսամարտերի 100-ամյակի, ինչպես նաև Էրեբունի-Երևանի 2800-ամյակի տոնակատարությունների կազմակերպման և անցկացման նախնական ծրագրերին»,– ասաց Հակոբյանը:
Նախարարի խոսքով` համագումարի շրջանակում ձևավորվելու են տաղավարներ, որոնցում իրենց նվաճումները կներկայացնեն այնպիսի կազմակերպություններ, ինչպիսիք են «Թումո» նորարարական տեխնոլոգիաների կենտրոնը, «Այբ» նորարարական դպրոցը, «Քվանտ» վարժարանը:
«Կցուցադրվեն գինեգործության, կոնյակագործության, տեքստիլ արդյունաբերության ձեռքբերումները, բարձր տեխնոլոգիաների նորությունները: «Մեգերյան կարպետը» կներկայացնի հայ գորգագործության անցյալի նվաճումներն ու ներկա զարգացման ընթացքը: Առանձին տաղավարներով իր տնտեսական և մշակութային ձեռքբերումները կներկայացնի Արցախը: Կլինեն նաև «Ազգ-բանակ» գաղափարախոսությանը նվիրված ցուցադրումներ»,- նշեց Հակոբյանը:
Նախարարը տեղեկացրեց նաև, որ համաժողովի շրջանակում կկազմակերպվեն մի շարք մշակութային միջոցառումներ:
