Պարզաբանում Հայաստանի մամուլի համար և ոչ միայն. Լիբանանի «Հայ Երեսփոխաններ» և «Հայկական Երեսփոխանական Բլոկ»-ը տարբեր բովանդակությամբ բառ-հասկացություններ են

Լիբանանում տեղի ունեցած վերջին իրադարձությունների վերաբերյալ  Հայաստանյան մամուլում երեկ և այսօր հրապարակումներ են եղել:

Շնորհակալություն հայտնելով լիբանանահայությամբ մտահոգ մեր հայրենակիցներին ու մամուլի գործընկերներին, այս գրությամբ ուզում ենք հստակեցնել հետևյալը.

Լիբանանի «Հայ երեսփոխաններ» և Լիբանանի խորհրդարանի «Հայկական Երեսփոխանական բլոկ» հասկացությունները տարբեր բովանդակությամբ բառ-հասկացություններ են:

Լիբանանի 128 հոգանոց խորհրդարանում Հայ համայնքին տրված է 6 աթոռ, որից 3-ը այսօրվա խորհրդարանի կազմին մեջ պատկանում է ՀՅԴ-ի գլխավորած «Հայկական Բլոկ» ֆրակցիային: Մնացյալ երեքը անկախ կամ լիբանանյան տարբեր կողմերին պատկանող խորհրդարանական խմբակցությունների անդամներ են:

Հետևաբար «Լիբանանի հայ պատգամավորները աջակցություն են հայտնել Հասսան Տիապին» վերտառությամբ կամ բովանդակությամբ լուրը իրականությանը չի համապատասխանում և ավելին՝ ընթերցողին շփոթմունքի մեջ է գցում և սխալ ուղղորդում:

Իրականում վերոնշյալ «Հայկական Բլոկ» ֆրակցիան է, որ աջակցություն է հայտնել նշանակված վարչապետին, իսկ մյուս երեք Հայ երեսփոխանները` ոչ:

Այստեղ մեկ այլ նրբություն ևս կա, որն առնչվում է մեր ազգային-համայնքային անվտանգությանը և ապահովությանը:

Այս հարցով մենք կոչ ենք անում Հայաստանի մամուլին և առհասարակ լիբանանահայ համայնքի հետ առնչվող կողմերին ավելի ուշադիր և նրբանկատ լինել: Որքան էլ թվային կամ ներկայացուցչական իմաստով Հայ քաղաքական վերոնշյալ կողմը Լիբանանում մեծամասնություն լինի, այն չի ներկայացնում ամբողջ լիբանանահայության կարծիքը:

Հակառակ պարագայում, թվում է, թե ամբողջ լիբանանահայությունը հայկական տվյալ քաղաքական կողմին ընտրած, Լիբանանի ներքին քաղաքականության մեջ ուղղահայաց բևեռացված մեկ կողմի հետ է համագործակցում:

Այս երևույթը տեղական և շրջանային քաղաքական պղտոր իրավիճակի մեջ չափազանց վտանգավոր հետևանքներ կարող է ունենալ մեր համայնքի համար: Այս ուղղությամբ մեր այս շեշտադրումը շատ կարևոր է հաստատելու համար իրականությունը:

Ավարտելով ուզում ենք շեշտել, որ լիբանանահայ տարբեր կողմեր, չնայած ազգային թեմաների մեջ մեկ միասնական կեցվածք ունենալուն, լիբանանյան ներքին քաղաքականության մեջ ունեն տարբեր ընտրություններ:

 

ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹՅԱՆ

ԼԻԲԱՆԱՆԻ ՇՐՋԱՆԱՅԻՆ ՎԱՐՉՈՒԹՅՈՒՆ

Բեյրութ, 20 Դեկտեմբեր 2019 

 

Ատենապետ

Սեւակ Յակոբեան

Փոխ-Ատենապետ

Միքայէլ Վայէճեան

 

Ատենադպիր

Արմէն Վայէճեան

Փոխ -Ատենադպիր

Ճէքի Տէրվիշեան

Գանձապահ

Սեդրակ Քիւրէճեան

Խորհրդականներ

Արա Գոյունեան

Սամ Պասմաճեան

Գրիգոր Մկըրեան