• London

  • Beirut

  • Moscow

  • Los Angeles

  • Paris

  • Sydney

  • Toronto

ՀՀ Վարչապետ Կարէն Կարապետեանի Կոչը Սփիւռքահայութեան

28.02.2017   19:39

Սիրելի՛ հայեր, Սփիւռքի մեր հայրենակիցնե՛ր,

Պատիւ ունիմ կոչով դիմելու ձեզի եւ բոլոր անոնց, որոնք անտարբեր չեն Հայաստանի նկատմամբ, մասնակից ըլլալու հայրենիքի ապագայի կառուցման:

Հայաստանը եւ Սփիւռքը մէկ ամբողջի երկու մասն են` իրարու հետ կապուած պատմութեան մէկ շղթայով, մէկ ճակատագիրով, հայրենիքի ապագայի վերաբերեալ անհանգստութեամբ: Մենք պատասխանատուութիւն ունինք մէկս միւսի նկատմամբ, որ մեզ կը պարտաւորեցնէ միաւորել ուժերը, բազմապատկել հնարաւորութիւններն ու շտկել մեր կեցուածքը աշխարհի նիստուկացին մէջ: Մենք այլ տարբերակ չունինք, քան լաւ երկիր կառուցելու եւ հզօր ու արդար Հայրենիք ունենալու հրամայականը:

Ժամանակն է, որ ըսենք, թէ մենք կրնանք փոխել միայն մեր ուժով ու մեր խելքով:

Մեր անկախութեան ճանապարհին ունեցած ենք յաջողութիւններ, նաեւ սխալներ` առարկայական ու ենթակայական գործօններով պայմանաւորուած: Գիտակցած ենք բացթողումները, եւ հերթական սխալները թոյլ տալու իրաւունք այլեւս չունինք:

Մեր երկրի աշխարհաքաղաքական դիրքը եւ այսօրուան մարտահրաւէրները կը պարտաւորեցնեն մեզի ըլլալ խելացի եւ խելացի կերպով օգտագործել մեր մրցակցային առաւելութիւնները: Մեր հարստութիւնը այսօր կ’որոշուի ոչ թէ նաւթով ու կազով, այլ Հայաստանի, Սփիւռքի եւ Արցախի խելացի մարդկային ներուժով:

Մենք կ’երթանք փոփոխութիւններու եւ այդ հորիզոնին հասնելու համար ունինք մէկ յստակ բանաձեւ` հայրենասէր խումբ, կամք, խելացի կառավարում եւ ծրագիրներ, որոնք շարժիչ ուժ կը հանդիսանան միջավայրը որակապէս փոխելու համար:

Մենք կը հրաւիրենք Սփիւռքի մեր կառավարիչները, մշակութային գործիչները, կրթութեան եւ գիտութեան ոլորտի միջազգային ճանաչում ունեցող հայրենակիցները՝ մասնակից դառնալու երկրի մէջ ընթացող բարեփոխումներուն` առաջին հերթին կառավարման նոր մշակոյթ բերելու, Սփիւռքի մեր լաւագոյն մասնագէտներու գիտելիքներն ու ներուժը համահայկական նպատակներուն ծառայեցնելու համար:

Այս առումով Սփիւռքը մեզի համար առաւելութիւն է: Չօգտագործել Սփիւռքի ներուժը, կը նշանակէ ըլլալ եսակեդրոն ու ներփակուած: Չտրամադրել Սփիւռքի մէջ առկայ առաջադէմ միտքը մեր գործընկերներուն, երիտասարդներուն եւ ուսանողներուն կը նշանակէ ըլլալ անարդիւնաւէտ այսօրուան արագ փոփոխուող աշխարհին մէջ:

Սփիւռքի մշակոյթը պէտք է նկատելի ըլլայ մեր կեանքին մէջ․ իւրաքանչիւր շփում մեր հայրենակիցներու հետ վստահ եմ նոր լիցք եւ ոգեւորութիւն կը հաղորդէ մեզի, որու արժէքաւորումը, գուցէ, հաշուարկելի չէ, բայց արդիւնքը միանշանակ կարող է բերել աշխարհայեացքի փոփոխութեան, արժեհամակարգերու նկատմամբ հանդուրժողականութեան, կառավարման ու աշխատանքի արդիւնաւէտութեան բարձրացման: Սա արդէն կ’ըլլայ բոլորիս յաջողութիւնը:

Սիրելի ՛ հայրենակիցներ,

Վստահ եմ, որ ձեր անմիջական մասնակցութեամբ հնարաւորութիւն կ’ունենանք արագ արդիւնքներ արձանագրել առանցքային ոլորտներու մէջ եւ տարածաշրջանին մէջ ունենալ տնտեսական, առողջապահական, կրթական առաջատար համակարգեր:

Պահպանելով աւանդական արժէքները`միաժամանակ բաց եւ հանդուրժող ըլլալ զարգացող արտաքին աշխարհի հանդէպ: Ձեր միջոցով այլ ազգերու մշակոյթներու լաւագոյն հմտութիւնները փոխառնել ու նաեւ աւելի ճանաչելի դարձնել Հայաստանը աշխարհին:

Անկախ անկէ, թէ որ երկրի մէջ կ’ապրինք, ես ներքին համոզմունք ունիմ, որ բոլորիդ ուշքն ու միտքը Հայաստանն է, եւ բոլորիդ մօտ հպարտութեան ու արժանապատուութեան զգացողութիւնը պայմանաւորուած է նաեւ Հայաստանի բարեկեցութեամբ: Ուրեմն ամէն ինչ ընենք, որպէսզի մէկս միւսն ուժեղացնենք, միաւորուինք ու միասին կառուցենք երկրի ապագան, որպէսզի մեր երեխաները վստահ ըլլան, որ Հայաստանը ժամանակ անց պիտի չզիջի առաջադէմ այն երկրներուն, ուր հայերը յաճախ կ’երթան լաւ կեանքի ակնկալիքով:

Վստա ՛հ եղէք, ամենալաւ երկիրը հայերուն համար Հայաստանն է:

Մեր երկրի ապագայով մտահոգ, անհանգիստ ու պարզապէս սրտի կանչ ունեցող իւրաքանչիւր հայ մարդ ընելիք ունի այս ճանապարհին:

Անկախ ապրելու վայրէն, կուսակցական պատկանելութենէն եւ ընկերային դիրքէն` մենք բոլորս ունինք մէկ գաղափար, որուն շուրջ պէտք է միաւորուինք եւ համախմբուինք` ուժեղ, պատմական արժէքներն ու աւանդոյթները պահպանող, բայց եւ ժամանակակից, հպա՛րտ Հայաստան:

Կոչ կ’ընեմ` միասին ստեղծենք այնպիսի հայրենիք, որ աշխարհով մէկ հպարտութեամբ մեզ հայ կոչենք:

Սիրով կը սպասենք ձեզի:

 

Share Button

Leave a Reply

Your email address will not be published. Required fields are marked *

Լրատվական գործընկեր