• London

  • Beirut

  • Moscow

  • Los Angeles

  • Paris

  • Sydney

  • Toronto

Երեք Կորուստներ՝ «Պիթըլզ» Խումբը Յայտնաբերողը, Փորթուկալի Նախկին Նախագահը Եւ Քուպայի Ն.Գ. Նախարարը

23.02.2017   08:44

Պատրաստեց՝ ԶՕՀՐԱՊ ՏԷՕՔՄԷՃԵԱՆ

Անցնող շաբաթներուն աշխարհը կորսնցուց երեք անձեր, որոնք տարբեր ասպարէզներու մէջ դերակատարութիւն ունեցած էին եւ հռչակ շահած 20-րդ դարու ընթացքին։

30 Դեկտեմբեր 2016-ին, Լիվըրփուլի մէջ մահացաւ անգլիական շատ յայտնի երգի խումբերէն, 20-րդ դարու 60-ական թուականներէն սկսեալ բեմերու, ռատիոկայաններու եւ հեռատեսիլի պաստառներու վրայ գրեթէ ամէնօրեայ ներկայութիւն ունեցող «Պիթըլզ» խումբի գործակատար Ալէն Ուիլիըմզը, 86 տարեկանին, ինչպէս յայտնեցին Անգլիոյ հիւսիս-արեւմտեան շրջանին մէջ գտնուող Լիվըրփուլ քաղաքին մէջ Ճաքարանտա գինետան այժմու տէրերը, Ֆէյսպուքի (facebook) իրենց էջին միջոցով։

alan-williams-

Անոնք ընկերային հաղորդակցութեան միջոցներով գրեցին, թէ «Ճաքարանտայի առաջին սեփականատէր եւ «Պիթըլզ» խումբը յայտնաբերած Ալէն Ուիլիըմզը մահացաւ 86 տարեկանին»։ Ուիլիըմզը առաջինն էր, որ արձակեց «Պիթըլզ»-ը, անոր անդամներուն հնարաւորութիւն տալով Լիվըրփուլի այդ զբօսավայրը օգտագործելու։

Ուիլիըմզ խումբին անդամները առաջնորդած էր մանաւանդ գերմանական Համպուրկ քաղաքը, 1960 թուականին, ուր Ուիլիըմզի հովանաւորութեամբ իրենց արուեստին առաջին լուրջ յանձնառութիւն մը ստորագրեցին եւ ունեցան աւելի քան 280 ելոյթ։

Գործակատարին եւ այդ ժամանակ խումբը կազմող Ճոն Լինընին, Փոլ ՄքՔարթիին, Ճորճ Հարիսընին, Սթիուըրթ Սաթքլիֆին եւ Փիթ Պեսթին միջեւ գործի անջատումը տեղի ունեցաւ 1961 թուականին։ Ապա խումբին անդամները պայմանագրութիւն մը կնքեցին Պրայըն Այփըշթայնին հետ։

Մեկնաբանելով Ուիլիըմզի մահը, «Պիթըլզ» խումբի պատմութեան մասնագէտ Մարք Լուիսըն Թուիթըրի (Twitter) ընդմէջէն գրեց, որ եթէ չըլլար Ուիլիըմզը, անգլիական այդ խումբը պիտի չերթար Համպուրկ, որ հռչակուելու դռները բացաւ խումբին առջեւ։

 

Փորթուկալի Նախկին Նախագահ

Մարիօ Սուարէզ

mario soares

Շաբաթ, 7 Յունուար 2017-ին, Փորթուկալի մայրաքաղաք Լիզպոնի Կարմիր Խաչի հիւանդանոցին անունով բանբեր Խոսէ Պարաթա յայտնեց մահը Փորթուկալի նախկին նախագահ, ընկերվարական Մարիօ Ալպերթօ Սուարէզին (90 տարեկան), որ կը նկատուի Փորթուկալի մէջ ժողովրդավարութեան հայրը։

Սուարէզը Կարմիր Խաչի հիւանդանոց փոխադրած էին անցեալ Դեկտեմբերի 13-ին, առողջապահական վիճակի վատթարցման պատճառով եւ կեդրոնացուած հոգատարութեան բաժանմունքը տեղաւորած էին։

Անցողակի բարելաւումէ մը ետք, երկրի նախկին նախագահին վիճակը վերստին անկում արձանագրեց 24 Դեկտեմբերին, առանց այդ անկումին պատճառները բացայայտուելու։ Սուարէզի հարազատներուն համաձայն, ան երբեք չապաքինեցաւ։ Ան ուղեղային բորբոքումի ենթարկուած էր 2013-ի Յունուարին։ Անոր առողջական վիճակը աւելի վատթարացաւ կնոջ մահէն ետք, 2015-ի Յուլիսին։

Սուարէզ, որ կը նկատուի 1974 թուականին ամրապնդուած փորթուկալեան ժողովրդավարութեան հայրը, իր երկրին մէջ քաղաքական տեսարանի առաջին շարքին վրայ մնաց շուրջ 40 տարի։ Ան հիմնադիրն էր Փորթուկալի Ընկերվարական կուսակցութեան։ Եղած էր արտաքին գործոց նախարար եւ երկու անգամ ստանձնած էր վարչապետի պաշտօնը։ Մարիօ Սուարէզ Փորթուկալի 17-րդ նախագահի պաշտօնը վարած էր 1986-ի եւ 1996-ի միջեւ, ինչպէս նաեւ եղած էր եւրոպական երեսփոխան։

 

Քուպայի Ներքին Գործոց Նախարարը

Garlos_Fernandez_Gondin-

Շաբաթ, 7 Յունուար 2017-ին իր մահկանացուն կնքեց նաեւ Քուպայի յեղափոխութեան դէմքերէն մէկը, երկրի ներքին գործոց նախարար Քարլոս Ֆերնանտէզ Կոնտինը, ինչպէս յայտնեց Քուպայի նախարարաց խորհուրդը, որ պարզեց, թէ նախարարը (78 տարեկան) անբուժելի հիւանդութեան մը հետեւանքով մահացաւ մայրաքաղաք Հաւանայի մէջ։

Կոնտին, որ նաեւ զօրավար մըն էր Քուպայի բանակին մէջ, ներքին գործոց նախարարի պաշտօնը ստանձնած էր 2015 թուականի Հոկտեմբերին, յաջորդելով յեղափոխութեան այլ դէմքի մը՝ Ապելարտօ Քոլոմիին, որ երկրի նախագահ Ռաուլ Քասթրոյէն խնդրած էր զինք հանգստեան կոչել։

Սանթիակօ տօ Քուպայի մէջ ծնած Կոնտին մասնակցած էր երկրի բռնակալ, նախկին նախագահ Ֆուլկենսիօ Պաթիսթայի իշխանութեան դէմ պայքարին 1958 թուականի Ապրիլին, միանալէն առաջ յեղափոխականներուն, ղեկավարութեամբ Ռաուլ Քասթրոյի, որ յեղափոխութեան ղեկավար Ֆիտէլ Քասթրոյի եղբայրն է։

Խոզերու Ծոցին  մէջ ցամաքահանումի գործողութեան ընթացքին, որ չարաչար ձախողութեան ճակատագիր մը ունեցաւ, Կոնտին կռուեցաւ նախայարձակ ուժերուն դէմ։ Ան ղեկավարներէն մէկն էր Անկոլայի մէջ քուպայական ուժերուն, անցեալ դարու ութսունական եւ ինիսունական թուականներուն։

Քարլոս Ֆերնանտէզ Կոնտին անդամ էր Քուպայի Համայնավար կուսակցութեան կեդրոնական կոմիտէին, ինչպէս նաեւ երեսփոխան էր երկրի ազգային ժողովին (խորհրդարան) մէջ։ Քուպայական տեղեկատուական միջոցներով սփռուած հաղորդագրութեամբ մը նախարարաց խորհուրդը յայտնեց, թէ «զօրավար Քարլոս Ֆերնանտէզ Կոնտինին վարքագիծը օրինակ մըն էր կուսակցութեան, ժողովուրդին եւ յեղափոխութեան հաւատարմութեան»։

 

 

Share Button

Leave a Reply

Your email address will not be published. Required fields are marked *

Լրատվական գործընկեր