• London

  • Beirut

  • Moscow

  • Los Angeles

  • Paris

  • Sydney

  • Toronto

Աղջնակի Գաղափարը Իրականութիւն Դարձաւ…«Հայկաշխարհ» Հարցազրոյց Առաջին Մանակապատանեկան Արեւմտահայերէն «Հայկաշխարհ» Armlands.Com Կայքի Խմբագիր Նայիրի Մկրտիչեանի Հետ

23.02.2017   08:20

*ՏԱԹԵՒ ԴԱՒԹԵԱՆ*
«Զարթօնք»ի աշխատակից

Փետրուար 21-ին, ՀՀ Սփիւռքի նախարարութեան կազմակերպութեամբ տեղի ունեցաւ  Armlands.com «Հայկաշխարհ» մանկապատանեկան արեւմտահայերէն կայքի ստեղծման շնորհահանդէսը։

Շնորհահանդէսին ներկայ էր նախարար Հրանոյշ Յակոբեան: Նեկայ էին նաեւ  լեզուաբաններ, դասախօսներ, բանասէրներ եւ աշակերտներ՝ տարբեր դպրոցներէ:

Նախարարը ողջունեց ներկաները, ներկայացուց այն աղջնակը, որուն տաղանդաւոր միտքին իբրեւ արդիւնք՝ ծնած էր կայքին գաղափարը: Մանկապատանեկան կայքին գաղափարը կը պատկանի 9 տարեկան Արեգիին: Շնորհահանդէսին Արեգին եւ իր ընկերները կատարեցին «Արեւի մարդիկ» մանկական երգը:

Կայքի խմբագիրը Նայիրի Մկրտիչեանն է՝ Արեգիի մայրը: Նայիրի Մկրտիչեանը ծնած  է Սուրիա եւ 2001 թուականին՝ աւարտելով Պէյրութի Համազգայինի Հայագիտական Բարձրագոյն Հիմնարկի «Լեզու եւ գրականութիւն» բաժինը տեղափոխուած է Հայաստան, իսկ 2003 թուականին աւարտած է Երեւանի Պետական Համալսարանի բանասիրական բաժանմունքի «Կրթութեան կառավարում» բաժինը:
Եղած է նաեւ ԱՄՆ-ի «Հայրենիք» եւ Գանատայի «Հորիզոն» շաբաթաթերթերու թղթակիցը Հայաստանի մէջ: Մէկն է 2012 թուականին Հայաստանի մէջ գործող առաջին արեւմտահայերէն կայքի հիմնադիրներէն:

«Հակաշխարհ» կայքը առաջինն է իր տեսակին մէջ։ Անիկա ստեղծուած է yerakouyn.com առաջին արեւմտահայերէն կայքին նախաձեռնութեամբ:

Կայքին նպատակն է 4-8 եւ 9-14 տարեկան տարիքային խումբերու երեխաներուն համար ստեղծել իրենց հետքրքրող նիւթերու համադրուած դաշտ:

Կայքը համալրելու համար՝ խմբագրութիւնը պիտի համագործակցի մանկական տարբեր թերթերու եւ կայքերու հետ, որոնցմէ մէկն է «Զարթօնք»-ի «Արեւիկ» մանկապատանեկան յաւելուածը:

Կայքին ստեղծման կ՝աջակցին ՀՀ Սփիւռքի նախարարութիւնը եւ «Գ. Կիւլպէնկեան» հիմնադրամը։

 

Յիշեցնենք, որ Կայքը իր ամբողջական տեսքով հանրութեան պիտի ներկայանայ Սեպտեմբեր 21–ին՝ «Եռագոյն» լրատուական կայքի հինգերորդ տարեդարձին օրը։

Այս առիթով «Զարթօնք» հարցազրոյց մը ունեցաւ առաջին մանակապատանեկան արեւմտահայերէն «Հայկաշխարհ» Armlands.com կայքի խմբագիր Նայիրի Մկրտիչեանի հետ:

13645279_1087591867995822_1661102525625714835_n

-Նայիրի, ես գիտեմ, որ կայքի ստեղծման մտայղացումը կը պատկանի 9 տարեկան Արեգիին: Կ’ըսէք  մեր ընթերցողներուն`ո՞վ է Արեգին եւ ինչպէ՞ս մտայղացած է այդ գաղափարը:

Արեգին աղջիկս է` հայրենադարձի զաւակ: Մօտ երկու տարի առաջ, երբ մենք տարուած էինք «Եռագոյն» առաջին արեւմտահայերէն լրատուական կայքով` ան ինծի հարց տուաւ, որ եթէ մենք ամէն ինչ կը կարդանք նոյն տեղէն, ինչո՞ւ ատոր կողքին չկայ երեխաներուն համար նախատեսուած արեւմտահայերէն կայք, որ երեխան մտնէ եւ կարդայ ինչ որ իրեն անհրաժեշտ է եւ հետաքրքրական: Ահա այս միտքն ալ լոյս տուաւ ինծի: Արեգին անընդհատ կը յիշեցնէր ինծի, թէ ե՞րբ պիտի ստեղծուի կայքը: Եւ ահա, որոշ ժամանակ անց, հասունցաւ այդ պահը. մենք սկսանք աշխատիլ կայքի ստեղծման վրայ: Անիկա պիտի ըլլայ իր տեսակին մէջ առաջին համապարփակ կայքը՝ առաւել եւս արեւմտահայերէնով:

-Ի՞նչ պատմութիւն ունի կայքին անուանումը:

Կայքը կը կոչուի «Հայկաշխարհ»՝ նկատի ունենալով Հայկ Նահապետը, այսինքն՝ Հայկի զաւակներու աշխարհ: Եւ նաեւ այն պատճառով, որ Հայկ նահապետի դստեր անունը Արեգի էր: Զայն չկոչեցինք Արեգի, քանի որ չեմ սիրեր անձնաւորել  որեւէ բան: Եթէ նկատած էք, շատ մեծ հնչեղութիւն չենք տուած, որ կայքի մտայղացումը Արեգիինն է: Մեր ցանկութիւնն է, որ կայքը ըլլայ համահայկական  եւ ունենայ անուն մը, որ կը հետաքրքրէ բոլոր երեխաները, չանձնաւորուի միայն Արեգիի վրայ: Բայց Արեգիի հետ կապուած կայ թաքուն բան մը, եթէ ուշադիր ըլլաք՝ կայքի լոկոն նման էարեւու, իսկ արեւն ու արեգին հոմանիշներ են:

-Ի՞նչ տարիքային խումբերու համար նախատեսուած է կայքը:

Կայքը բաժնած ենք տարիքային երկու խումբի `փոքրիկներու անկիւն 4-8 տարեկան եւ մանկապատանեկան՝ 9-16 տարեկան: 4-8 տարեկան երեխաներու համար պիտի ըլլան աւելի շատ տեսանիւթեր, ուսուցողական նիւթեր, մանկական երգեր, ելեկտրոնային խաղեր, ֆիլմեր եւ խամաճիկներ (cartoons): Խամաճիկներու հետ կապուած՝ մենք ունինք խնդիր. արեւմտահայերէնով խամաճիկներ չկան եւ մենք ստիպուած ենք, առայժմ, զանոնք դնել արեւելահայերէնով եւ անգլերէնով, բայց ուսուցողական նիւթերն ու հեքիաթները պիտի ըլլան արեւմտահայերէնով: Իսկ 9-16 տարեկան պատանիներու համար նախատեսուած բաժինին մէջ, պիտի ըլլան ուսուցողական նիւթեր, շտեմարանի բաժին, ուր պիտի ըլլան տեղեկութիւններ գիտութենէն, պատմութենէն, աշխարհագրութենէն եւ այլն: Ասոնք, յատկապէս պիտի կրեն շտեմարանային բնոյթ:

Կայքին մէջ պիտի ըլլայ նաեւ «Մենք» էջը՝ երեք բաժինով, «Մեր ստեղծագործութիւնները», «Մեր տեսանիւթերը», «Մեր նամակները»: «Մեր տեսանիւթերը» բաժինը, կարծեմ, ամենահատաքրքրականը պիտի ըլլայ, որ պիտի կապէ ողջ աշխարհի հայ երեխաները: Ցանկացած երեխայ կրնայ իր քաղաքի տեսարժան վայրերը կամ դպրոցին մէջ որեւէ ձեռնարկ նկարել տեսանիւթի ձեւով` դառնայ փոքրիկ լրագրող եւ ուղարկէ մեզի`մենք ալ տեղադրենք կայքին մէջ: Յոյս ունինք, որ ասիկա պիտի դառնայ աշխոյժ ցանց եւ պիտի համախմբէ բոլոր երեխաները: Բացի նշուած բաժիններէն պիտի ներառենք նաեւ բաժին, ուր պիտի տեղադրենք մեր փոքրիկ ընթերցողներուն ստեղծագործութիւնները, նկարչական աշխատանքները:

-Ի՞նչ մանկապատանեկան թերթերու կամ կայքերու հետ պիտի համագործակցիք:

Առաջին թերթը «Զարթօնք»-ի «Արեւիկ» յաւելուածն է, խօսած ենք նաեւ Գանատայի յաւելուած մանկական թերթի խմբագրութեան հետ, որոնք սիրով պիտի տրամադրեն նիւթեր: Պիտի համագործակցինք նաեւ «Մոծակ» եւ «Փոքրիկ» հայաստանեան կայքերու հետ, նաեւ «Լալան ու Արան» Համազգայինի ծրագիրին հետ: Մինչ այժմ ոչ մէկ բացասական պատասխան ունինք: Ասիկա ունի իր առաւելութիւնը` բոլոր թերթերը կը համախմբուին մէկ տեղ: Կայքը պիտի ունենայ քանի մը նպատակ, բացի արեւմտահայերէնը զարգացնելէն՝ ասիկա նաեւ վայր է, ուր հայերէն իմացող երեխան կրնայ զարգացնել անգլերէնի գիտելիքները, կամ անգլերէն իմացող երեխան հայերէնի իր գիտելիքները: Պիտի զօրանայ նաեւ արեւմտահայերէն եւ արեւելահայերէն լեզուակիրներու շփումը: Նիւթերը տեղադրելու ժամանակ անպայման պիտի նշուի սկզբնաղբիւրը:

-Իսկ ֆիլմերն ու խամաճիկները թարքմանելու ծրագիրներ կա՞ն:

Ատիկա մեր մեծ խնդիրն է, որովհետեւ արեւմտահայերէնով ֆիլմեր ու խամաճիկներ գրեթէ չկան եւ մենք մեր «զերօ» նիւթականով՝ առայժմ չենք պատկերացներ, որ ատիկա կրնանք ընել: Միայն ֆիլմերը եւ խամաճիկները պիտի ըլլան անգլերէն եւ արեւելահայերէն, բայց լսատեսողական հեքիաթները պիտի վերածուին արեւմտահայերէնի: Կայքը իր ամբողջական տեսքով հանրութեան պիտի ներկայանայ Սեպտեմբեր 21–ին՝ «Եռագոյն» լրատուական կայքի հինգերորդ տարեդարձին առիթով, որովհետեւ նախաձեռնութիւնը կը պատկանի «Եռագոյն»-ին: Այս ամիսներու ընթացքին, մենք պէտք է լեցնենք կայքը, որպէսզի երբ ներկայացնենք հանրութեան՝ անիկա ըլլայ բաւական հարուստ եւ գրաւիչ: Կարեւոր է  նաեւ համագործակցութիւնը Սփիւռքի նախարաութեան հետ: Կ՝ուզեմ շնորհակալութիւն յայտնել նախարարութեան եւ «Գալուստ Կիւլպէնկեան» հիմնադրամին, որոնք մեր ամենամեծ աջակիցներն են: Յոյս ունինք, հանրութեան սեփականութիւնը դառնալէն  ետք, ընթերցողներուն թիւը մեծ ըլլայ եւ մենք ունենանք նիւթական աջակցութիւն եւս:

IMG_2510-21-02-17-03-57

 

 

Share Button

Leave a Reply

Your email address will not be published. Required fields are marked *

Լրատվական գործընկեր