• London

  • Beirut

  • Moscow

  • Los Angeles

  • Paris

  • Sydney

  • Toronto

ՀՀ Սփիւռքի Նախարար Հրանոյշ Յակոբեանի Շնորհաւորական Ուղերձը Մայրենիի Տօնին Առթիւ

22.02.2017   19:31

Քանի որ 20-­րդ դարու կէսերուն մայրենի լեզուի իրաւունքներու դէմ տարբեր երկիրներու մէջ շարք մը ոտնձգութիւններ եղան, 1999-ին ԵՈՒՆԵՍՔՕ-­ն Փետրուար 21-­ը հռչակեց Մայրենի լեզուի միջազգային օր` ի նպաստ լեզուներու իրաւունքներու ճանաչման եւ գործածութեան աջակցման:

Այսօր աշխարհի մէջ լեզուներու ապագան անորոշ վիճակի մէջ է, քանի որ միջազգային քանի մը լեզուներ աստիճանաբար կը ստիպեն մարդոց հրաժարելու սեփական մայրենի լեզուէն:

 Ըստ ԵՈԻՆԵՍՔՕ-­ի գնահատականի` աշխարհի վեց հազար լեզու կորուստի մատնուելու եզրին է:

 Ըստ Հայաստանի Հանրապետութեան սահմանադրութեան, ՀՀ պետական լեզուն հայերէնն է:

Մայրենի լեզուի օրուան առիթով երէկ Երեւանի եւ ՀՀ տարբեր մարզերու մէջ ձեռնարկներ կազմակերպուեցան: Բազմաթիւ գրողներ, լեզուաբաններ եւ այլ մտաւորականներ այցելեցին Օշական եւ ծաղիկներ զետեղեցին Մեսրոպ Մաշտոցի շիրիմին:

Այս առիթով, ստորեւ կը հրատարակենք ՀՀ Սփիւռքի նախարար Հրանոյշ Յակոբեանի ուղերձը նուիրուած Մայրենիի Տօնին.

«Խմբ.»

Աշխարհասփիւռ իմ սիրելի՛ հայրենակիցներ,

Այսօր աշխարհի շատ ժողովուրդներ կը տօնեն «ԵՈՒՆԵՍՔՕ»-ի կողմէ հաստատուած Մայրենի օրը: Հայաստանի մէջ այն պետական տօն է, տօն, որ կ’ամփոփէ մեր ինքնութեան ու լինելիութեան մեծագոյն խորհուրդը, եւ ես սիրով եւ հպարտութեամբ կը շնորհաւորեմ բոլորս այս սրբազնագոյն տօնին առթիւ:

Մայրենին հայ ժողովուրդի յաւերժութեան խօսուն վկան է, անոր առջեւ ծագած բոլոր մարտահրաւէրներու անպարտելի յաղթաթուղթը, քանզի լեզուն զէնքի ուժ ու զօրութիւն ունի: Լեզուն այն երջանկութեան բանալիներէն մէկն է, որմով շատ դռներ կը բանանք, ինչպէս Պարոյր Սեւակ ըսած է. «…Երջանիկ է նա, ով քեզ կարող է կոչել Մայրենի, երանելի է, ով քեզանով է խօսում ու դատում»:

Յիրաւի, մեր մայրենին բանալի է դէպի դարերու խորքը, դէպի հայ գրչութեան ու դպրութեան մատեաններն ու հազարամեակներէն եկող տաճարներու առեղծուածն ու պատմութեան քառուղիները: Մենք այդ հարստութեան տէրն ենք, Արարչագործի մեծ պարգեւին արժանացած հնամենի ժողովուրդ, որ բիւր թշնամեաց դէմ կռիւներ  տուած` յանուն հաւատի, յանուն Մայրենիի եւ մատեաններ փրկած է աւերածութիւններէն ու հրոյ ճարակէն:

Սիրելի՛ հայրենակիցներ,

Դարերու խորքէն կու գայ եւ կ’երթայ դէպի դարերը մեր լեզուն: Եւ բանաւոր եւ գրաւոր մշակոյթի բոլոր կոթողներուն մէջ հայերէնը կատարեալ է: Մեր Մայրենին պարզ ու անմիջական է Գողթան երգերու ու վիպերգութեան մէջ, շքեղ ու կանոնաւոր` Խորենացիի ու Նարեկացիի ձեռագիր մատեաններուն մէջ, ճկուն ու բազմաշերտ` Շիրակացիի ու Հերացիի գործերուն, յուզական ու սիրառատ` Քուչակի ու Սայեաթ-Նովայի քերթուածներուն,  հզօր ու առնական` Վարուժանի ու Չարենցի երկերուն մէջ… Եւ օտարը  Աստուծոյ հետ խօսելու միակ լեզուն համարած է հայերէնը… Իր բոլոր դրսեւորումներով հայոց լեզուն մշակութային մեծագոյն արժէք է, հազարամեակներու ընթացքին սերունդներու լեզուական արարումի արդիւնք ու գանձարան:

Այսօր, առաւել քան երբեք, անհրաժեշտ է համայն հայութեան ողջ ներուժն ուղղորդել Մայրենիի պահպանման ու տարածման, քանի որ համաշխարհայնացուող աշխարհին մէջ լեզուն է ազգային ինքնութեան պահպանման գրաւականն ու աշխարհով մէկ սփռուած հայութեան ազգային պատկանելութեան վկայութիւնը, մեր միասնականութեան գլխաւոր կռուանը:

Դիմելով Ձեզ` աշխարհասփիւռ իմ հայ երիտասարդներ, հարազատօրէն կոչ կ’ընեմ.

Թանկագիններս, սորվեցէ՛ք մեր ոսկեղինիկ լեզուն, խօսեցէ՛ք հայերէն, սիրեցէ՛ք ու պաշտեցէ՛ք Մայրենին` իբրեւ սրբութիւն սրբոց, իբրեւ մեր ազգային ինքնութեան եւ լինելիութեան վկայական:Եկէ՛ք ազգովի պահենք ու պահպանենք մեր լեզուն` մեր Հայրենիքը:

Կրկին կը շնորհաւորեմ բոլորս այս ոգեղէն տօնին առթիւ: Փառաբանենք ու պահպանենք մեր Մայրենին` մեր ինքնութեան վահանը, մեր գոյութեան առհաւատչեան:

Մենք կանք, քանի դեռ կը խօսինք հայերէն…

Յարգանքով`

ՀՀ Սփիւռքի նախարար

Հրանոյշ Յակոբեան

Share Button

Leave a Reply

Your email address will not be published. Required fields are marked *

Լրատվական գործընկեր