Կիւմրիի Մէջ Կատարուեցաւ Աւետիսեան Ընտանիքի 6 Անդամներուն Վերջին Հրաժեշտի Արարողութիւնը

Համազգային սուգի մթնոլորտի մէջ, երէկ Կիւմրիի  Սուրբ Նշան եկեղեցւոյ  մէջ կատարուեցաւ Աւետիսեան ընտանիքի վեց  անդամներուն  յուղարկաւորութեան եւ թաղման արարողութիւնը:  Լրատուական աղբիւրներ   նշեցին, թէ 1988 թուականի աւերիչ երկրաշարժէն ետք, Կիւմրիի մէջ կատարուած այս սպանդը  կը համարուի  մեծագոյն աղէտ:

Հոգեհանգստեան արարողութեան ընթացքին    յաւուր պատշաճի  պատգամ մը փոխանցեց Շիրակի մարզի  առաջնորդ՝ Տ. Միքայէլ Արք. Աջապահեան: Սրբազանը յայտնեց, որ «Կիւմրին չէ վախցած ոչ  պարսիկէն, ոչ թուրքէն եւ ոչ ալ ռուսէն»: Շիրակի առաջնորդը նաեւ ըսաւ, որ կիւմրեցին  պատասխան կը սպասէ տեղի ունեցած սպանդին մասին  եւ իր ըսելով  Կիւմրին նման եղեռն մը չէր ակնկալեր իր  ռուս եղբօրմէն: 

Միւս կողմէ լրատուական աղբիւրներ հաղորդեցին, որ Կիւմրիի  քաղաքապետ Սամուէլ Պալասանեան, որ    պաշտօնական այցով կը գտնուէր արտերկիր,  կէս ձգելով  իր այցելութիւնը  վերադարձած է Հայաստան՝ մասնակցելու արարողութիւններուն: Նշենք, որ Պալասանեան կը գտնուէր  Լոս Անճելոս:

Հայաստանի գլխաւոր դատախազ Գէորգ Կոստանեան   այցելած է նախագահ Սերժ Սարգսեանին եւ խորհրդակցութիւններ ունեցած Կիւմրիի մէջ տեղի ունեցած   ծանր յանցագործութեան  մասին: Կոստանեան  հանդիպումէն ետք խօած է  լրագրողներուն  եւ ըսած, որ ռուս մեղադրեալ  Վալէրի Բրիմիաքով քրէական պատասխանատութեան պիտի ենթարկուի Հայաստանի մէջ: Կոստանեան աւելցուցած է, որ Հայաստան  այս հարցի առումով ոչ մէկ զիջում պիտի կատարէ յայտնած է նաեւ , թէ այս խնդրին մօտէն հետեւելու համար ան պիտի մեկնի Կիւմրի:

Նոյն ուղղութեամբ կը յայտնուի, որ Գիւմրիի մէջ   տեղի ունեցող  երթերը պիտի շարունակուին: Այս մասին լրատուական աղբիւրները նաեւ յայտնած են, թէ   Կիւմրիի քաղաքացիները   ռուս զինծառայողին կողմէ սպաննուած Աւետիսեաններու ընտանիքի  6 անդամներու յուղարկաւորութիւնէն անմիջապէս ետք՝ պիտի ուղղուին ռուսական  զօրակայանին մօտ եւ բողոքի  հաւաք կայացնեն: Յիշեցնենք, թէ անոնք  կը պահանջեն, որ ռուս մեղադրեալ Վալէրի Բէրմիաքով դատուի Հայաստանի մէջ եւ համաձայն Հայաստանի Հանրապետութեան օրէնսգիրքին:

Նոյն ծիրեն ներս երէկ յետմիջօրէին Երեւանի Ռուսիոյ դեսպանատան դիմաց բողոքի հաւաք  մը տեղի ունեցաւ: Բողոքին մասնակից քաղաքացիները պահանջեցին, որ  Կիւմրիի սպանդին մէջ  գլխաւոր ռուս մեղադրեալ Վալէրի Բէրմիաքով դատուի եւ իր պատիժը կրէ Հայաստանի մէջ: Դեսպանատան առջեւ ոստիկանութիւնը  վահաններով զինուած   պաշտպանած է   շէնքը իսկ քաղաքացիները քարեր նետած են հիւպատոսարանի շէնքին ուղղութեամբ: Լրատուական տարբեր աղբիւրներ յայտնեցին, որ  ոստիկանութիւնը բերման ենթարկած է տասնեակ  ցուցարարներ: Յիշեցնենք,  որ ցուցարարները շուրջ երեք ժամ   բանակցած են  Հայաստանի գլխաւոր դատախազ  Գէորգ  Կոստանեանին հետ պահանջելով  Ռուս  մեղադրեալին Հայաստանի մէջ դատուիլը եւ քրէական պատիժի ենթարկուիլը: