• London

  • Beirut

  • Moscow

  • Los Angeles

  • Paris

  • Sydney

  • Toronto

ԱՇԽԱՏԱՆՔԱՅԻՆ ԱՌՈՂՋ ՄԹՆՈԼՈՐՏԻ ՄԷՋ ՍԿՍԱՒ ԱՐԵՒՄՏԱՀԱՅԵՐԷՆԻՆ ՆՈՒԻՐՈՒԱԾ ՈՒԻՔԻ ՃԱՄԲԱՐԸ

05.08.2015   12:37

Երկուշաբթի, 3 Օգոստոս 2015-ին, երեկոյեան ժամը 8։00-ին, Զմմառի Հայր Շէլհուպ կեդրոնին մէջ տեղի ունեցաւ Ուիքի ճամբարի բացման հանդիսութիւնը, կազմակերպութեամբ Ուքիմետիա Հայաստան հասարակական կազմակերպութեան եւ հովանաւորութեամբ Գալուստ Կիւլպէնկեան հիմնադրամին։ Ճամբարին իրենց մասնակցութիւնը կը բերեն լիբանանահայ 10 վարժարաններէն 43 աշակերտներ, որոնց ընկերակցեցան Հայաստանէն Ուիքի խմբագրող աշակերտներ։

Հաւաքին բարի գալուստի խօսքը արտասանեց Ուիքիմետիա Հայաստանի Լիբանանի համակարգող Րաֆֆի Տէմիրճեան, որ ներկայացուց ճամբարի օրէնքները եւ յայտագիրը։ Տէմիրճեան շնորհակալութիւն յայտնեց մասնակից աշակերտներու ծնողներուն, ուսուցիչներուն եւ տնօրէններուն, որոնք վստահութեամբ եւ գործակցութեամբ մասնակից դարձան նշեալ նախաձեռնութեան յաջոութեան։

Ուիքիմետիա Հայաստանի նախագահ Սուսաննա Մկրտչեան ըսաւ, որ ուիքի ճամբարը ազատ մթնոլորտի մէջ մտային զարգացումներու նպաստող միջավայր է։ Ան աւելցուց, որ Ուիքիփետիան լեզուները կենդանի պահելու լաւագոյն եւ արդիական միջոցն է, եւ այս առնչութեամբ Արեւմտահայերէն Ուիքիփետիան նշեալ նպատակին էապէս կը ծառայէ։ Մկրտչեան յայտնեց, որ իւրաքանչիւր աշակերտ, ուսուցիչ, խմբագիր իր փոքր թէ մեծ մասնակցութեամբ կրնայ քար մը աւելցնելով նպաստել հաւաքական աշխատանքին։

Ապա Լիզպոնէն Սքայփ-ի ճամբով իր սրտի խօսքը փոխանցեց Գալուստ Կիւլպէնկեան հիմնարկի հայկական բաժանմունքի տնօրէն Ռազմիկ Փանոսեան, որ մեծապէս գնահատեց Արեւմտահայերէնի անդրանիկ ճամբարին կազմակերպումը։ Փանոսեան շնորհակալութիւն յայտնեց Սուսաննա Մկրտչեանին, Րաֆֆի Տէմիրճեանին եւ բոլոր անոնց որոնք մասնակից դարձան այս նախաձեռնութեան յաջողութեան։ Փանոսեան յոյս յայտնեց, որ Ուիքի ճամբարը կը ծառայէ իր նպատակին ու աշակերտները ընկերային առողջ մթնոլորտի մէջ կը դառնան Ուիքի խմբագիրներ։

Իր կարգին, Գալուստ Կիւլպէնեան հիմնադրամի Արեւմտահայերէնի տարածման ծրագիրներու աւագ վարիչ Անի Կարմիրեան շեշտեց, թէ աշակերտները պէտք չէ վախնան սխալներէն, այլ՝ պէտք է ինքնավստահութեամբ աշխատին, որպէսզի կատարելագործեն իրենց թեքնիքական եւ լեզուական կարողականութիւնները։ Կարմիրեան մաղթեց, որ այս ճամբարը սկիզբ կը հանդիսանայ Արեւմտահայերէն Ուիքիփետիայի զարգացման նոր իրագործումներուն։

Ապա տեղի ունեցաւ Ուիքի ճամբարին մասնակցող աշակերտներու ծանօթացումը։

Յայտնենք, որ Ուիքի ճամբարը իր աւարտին կը հասնի 12 Օգոստոս 2015-ին։ Ճամբարին մասնակիցները պիտի սորվին գործածել Ուիքիփետիան, խմբագրել արեւմտահայերէնով եւ անցընել հաճելի ու ուրախ պահեր։

Share Button

Leave a Reply

Your email address will not be published. Required fields are marked *

Լրատվական գործընկեր