• London

  • Beirut

  • Moscow

  • Los Angeles

  • Paris

  • Sydney

  • Toronto

Հնարաւոր է` Վերականգնուի Վանի Հայկական Սուրբ Թովմաս Վանքը

08.06.2019   09:42

Վանի Գեւաշ գաւառին ենթակայ Ալթընսաչ գիւղի մօտ գտնուող 11-րդ դարուն կառուցուած Սուրբ Թովմաս հայկական վանքը շարունակ կ՛ենթարկուի գանձագողերու պատճառած աւերին: Այդ մասին, ըստ Akunq.net-ի, կը հաղորդեն թրքական լրատուամիջոցները:

Աղբիւրին համաձայն` Գեւաշի գաւառապետ Մուրաթ Սեզերը նշած է, թէ գանձ որոնողներու «անխղճութեան» հետեւանքով վանքը մեծ վնաս կերած է եւ ենթակայ է վերականգման:

Մուրաթ Սեզերը շեշտած է, որ զբօսաշրջութիւնը զարգացնելու նպատակով եկեղեցին հարկ է ըստ արժանուոյն ներկայացնել, եւ որ գաւառապետարանը վանքի վերականգման համար դիմած է Թուրքիոյ մշակոյթի եւ զբօսաշրջութեան նախարարութեան:

Ան նաեւ յայտնած է, որ սոյն եկեղեցին մինչ օրս բաւարար չափով ուշադրութեան չէ արժանացած պետութեան կողմէ եւ աւերուած վիճակի մէջ է` պահպանման տակ գտնուած չըլլալուն պատճառով:

Գեւաշի գաւառապետը նաեւ նշած է, որ տեղական իշխանութիւններու ցանկութիւնը ու խնդրանքն է, որ վանքը հնարաւորին չափով արագ վերանորոգուի, որպէսզի օտարերկրեայ զբօսաշրջիկները եւս կարենան հիանալ անով:

Յիշեցնենք, որ Արեւմտեան Հայաստանի աւերուած վանքերն ու եկեղեցիները Թուրքիոյ կողմէ խիստ հազուադէպ կը վերանորոգուին հիմնականօրէն տուեալ շրջաններու մէջ եւս զբօսաշրջութիւնը զարգացնելու նպատակով:

Share Button

Leave a Reply

Your email address will not be published. Required fields are marked *

Լրատուութեան գործընկեր