• London

  • Beirut

  • Moscow

  • Los Angeles

  • Paris

  • Sydney

  • Toronto

Տիգրանակերտ Սուրբ Կիրակոս Եկեղեցիին Իրավիճակը Այսօր

11.09.2017   05:41

   Միացեալ Նահանգներու մէջ հրատարակուող armenianweekly.com առցանց թերթը հրապարակած է Տիգրանակերտի (Տիարպաքըր) Սուրբ Կիրակոս եկեղեցւոյ այժմու սրտաճմլիկ իրավիճակը պարզող լուսանկարներ, որոնք գաղտնաբար առնուած են Յուլիս ամսուն։ Անոնցմէ կը պարզուի, որ Միջին Արեւելքի ամէնէն մեծ եկեղեցիի համբաւը վայելող Սուրբ Կիրակոս անմասն չէ մնացած շրջանի իրադարձութիւններէն:
     Ինչպէս ծանօթ է, Սուրբ Կիրակոս եւս յայտնուած էր թրքական բանակին եւ քրտական ուժերու միջեւ վերջին տարիներուն տեղի ունեցած բուռն բախումներու կիզակէտին: Պարբերաբար մտահոգիչ լուրեր կը հասնէին եկեղեցւոյ ճակատագրին մասին, բարեբախտաբար, յաճախ՝ անհիմն: Աղօթավայրը թրքական իշխանութիւններու կողմէ սահմանուած արգիլեալ գօտիին մէջ գտնուելով՝ կարելի չէր ըլլար ստոյգ գաղափար մը ունենալ անոր վիճակին մասին: Միայն, վերջին անգամ, քանի մը ամիս առաջ յայտնուած էին կարգ մը լուսանկարներ, ուր կը տեսնուէին թրքական բանակի յատուկ ջոկատայիններ եկեղեցւոյ մէջ։
     «Armenian Weekly»-ի հրապարակած լուսանկարներէն կը պարզուի, որ այնուամենայնիւ վնասը շատ մեծ չէ եղած, բաղդատմամբ նոյն տարածքին մէջ գտնուող այլ սրբավայրերու, մանաւանդ եթէ նկատի ունենանք, որ եկեղեցւոյ թաղամասը գրեթէ ամբողջութեամբ հիմնայատակ եղած է. անցեալի նեղլիկ փողոցներէն ներկայիս մնացած են ընդարձակ դաշտեր միայն։ Հետեւաբար, կարելի է մխիթարուիլ, որ եկեղեցին նուազագոյն վնասով «փրկուած է»։
     Սուրբ Կիրակոս երկար տարիներ աւերակ մնալէ ետք՝ թաղական խորհուրդին, նախկին տիգրանակերտցիներու եւ Տիարպաքըրի քաղաքապետարանի ջանքերով, մեծ գումարներու ներդրումով վերանորոգուած եւ 22 Հոկտեմբեր 2011-ին, հանդիսաւոր կերպով վերաբացուած էր։
     Այս վերաբացումը կարեւոր եւ յուզիչ անակնկալի մըն ալ տուն տուաւ՝ ծպտեալ Հայերու յայտնութեան. անոնք սկսան թօթափել իրենց պարտադրուած՝ տասնամեակներու քօղը եւ համախմբուիլ եկեղեցւոյ շուրջ:

Share Button

Մեկնաբանել

Լրատուութեան գործընկեր