• London

  • Beirut

  • Moscow

  • Los Angeles

  • Paris

  • Sydney

  • Toronto

Մուշի Հայերու Միութիւնը Նախագահ Պիտի Ընտրէ

28.09.2014   02:05

Թուրքիոյ սահմաններէն ներս գտնուող Մուշ քաղաքին մէջ վերջերս հիմնուած հայերու միութիւնը կը պատրաստուի յառաջիկայ շաբաթ ընտրելու միութեան նախագահը:

Ըստ «Ակօս» թերթին՝ Մուշի մէջ հիմնուած «Տարօն-Մուշ հայերու փոխօգնութեան, ընկերային եւ զբօսաշրջութեան միութիւնը արդէն ընտրած է 7 հոգինոց ղեկավար մարմին մը եւ պաշտօնապէս արձանագրուելու համար դիմում ներկայացուցած է պատկան մարմիններուն:

Միութեան ղեկավար մարմինի անդամ, Մուշի բնակիչ Արմէն Գալուստեան «Ակօս»ին յայտնած է, թէ դժուար եղած է Մուշի մէջ հայերու միութիւն հիմնելը, սակայն հիմնումէն ետք բազմաթիւ դրական արձագանգներ հնչած են:

Ան նշած է, թէ իրենց միութեան առաջին գործը եղած է Մուշի հայերուն պատկանող մշակութային կառոյցներու պահպանման համար աշխատանքներու ձեռնարկելը: «Միութիւնը կը փափաքի, որ Մուշի հայկական եկեղեցին իրեն յանձնուի, որպէսզի կարենանք վերանորոգել զայն: Այդ նպատակով, կը բանակցինք քաղաքապետարանին հետ: Բացի ատկէ, կրցած ենք պաշտօնապէս արձանագրել հայկական գերեզմաննոցը՝ պահպանութեան տակ առնելու համար զայն», շեշտած է Արմէն Գալուստեան, յիշեցնելով, որ միութեան համար նոր շէնք կառուցելու եւ հայերէն դասընթացքներ կազմակերպելու ծրագիրներ եւս կը մշակուին:

Սեպտեմբեր 11-ին, Մուշի մէջ տեղի ունեցած էր հայերու միութեան բացման արարողութիւնը, որուն մասնակցած էին նաեւ Սփիւռքէն ժամանած հայեր եւ Թուրքիոյ Հանրապետական ժողովրդային կուսակցութենէն շարք մը անդամներ:

Share Button

Leave a Reply

Your email address will not be published. Required fields are marked *

Լրատուութեան գործընկեր