• London

  • Beirut

  • Moscow

  • Los Angeles

  • Paris

  • Sydney

  • Toronto

Թալիշի Մէջ Շինարարներու Հետ Նաեւ Կամաւորներ Կ’աշխատին

11.08.2017   15:08

*ՆՈՐԱՅՐ ՅՈՎՍԷՓԵԱՆ*
«Զարթօնք»ի աշխատակից

Թալիշի մէջ վերականգնողական աշխատանքները կը շարունակուին, ըստ ժամանակացոյցի: Այս պահուն, սակայն, հիմնական ըսելիքը շինարարներունն է: Հիմնական շինհրապարակն ալ գիւղի կեդրոնական մասը կը գտնուի։ Այստեղ պիտի ըլլան Թալիշի հանդիսութիւններու սրահը, համայնքային կեդրոնը, մանկապարտէզն ու դպրոցը: Մինչեւ տարեվերջ Թալիշի մէջ պիտի ըլլայ կարմիր ժապաւէն կտրելու քանի մը առիթ: «Հանդիսութիւններու տունն ու համայնքային կեդրոնի շէնքը պիտի աւարտենք Դեկտեմբերին: Մանկապարտէզն ու դպրոցը պիտի աւարտենք յաջորդ տարի»,- կը մանրամասնէ շինարարական աշխատանքները իրականացնող «Եւրոստրօ» ընկերութեան աշխատանքային ղեկավար Արամ Աղաբեկեանը:

Հասարակական նշանակութեան շէնք-շինութիւններու շինարարութեան հետ՝ ամրան կէսերուն սկսած են նաեւ առանձնատուներու վերակառուցման աշխատանքները: Միանգամայն քանի մը խումբեր կ’աշխատին: Առաջին փուլով կը վերակառուցուի 17 առանձնատուն: Եւս 12-ի վերականգնումը պիտի ըլլայ երկրորդ փուլով: Նոր առանձնատուները ապահովուած պիտի ըլլան ժամանակակից բոլոր յարմարութիւններով: «Ասիկա հրետակոծուած տուն եղած է: Տանիքը կը փոխենք: Աւելցուցած ենք սանհանգոյց, բաղնիք, խոհանոց»,- կը մանրամասնէ առանձնատուներէն քանի մը հատին շինարարութիւնը իրականացնող «ԱԻՄ» ընկերութեան տնօրէն Մարտիկ Իսրայէլեանը:

Նոր շինութիւնները աւելցնելու հետ` Թալիշը կը ձերբազատուի հին աւերակներէն, շատերը դեռ 90-ականներէն ժառանգութիւն մնացած: Բարեկարգման աշխատանքները երիտասարդներուն վստահած են: Հայաստանի Ֆութպոլի հաւաքականի ֆան ակումբի՝ «Առաջին հայկական ճակատ» հասարակական կազմակերպութեան ու Ազգային գուարդիայի համատեղ նախաձեռնութեամբ, մօտ երկու տասնեակ երիտասարդներ՝ 14-63 տարեկան, ժամանեցին Թալիշ: «Առաջին փուլով կը քանդենք 90-ականներէն մնացած աւերակը: Ապա կ’առանձնացնենք այն շինանիւթը, որ կարելի է օգտագործել` նոր շէնքերու համար»,- կը պատմէ «Առաջին հայկական ճակատ» ՀԿ նախագահ Սերգէյ Ջանջոյեանը:

Երեւանէն ժամանած խումբին կամաւորներ միացած են նաեւ Արցախէն: «Շահումեանի շրջանի Նոր Վերինշէն գիւղէն եմ: Հայրս դիմատետրի վրայ տեսաւ, որ յայտարարութիւն կայ` Թալիշի մէջ կամաւորական շինջոկատ հաւաքագրելու մասին: Ինծի, եղբօրս ու մեր գիւղէն 4-5 երիտասարդի խորհուրդ տուաւ մասնակցելու: Եւ մենք այստեղ եկանք»,- աշխատանքը կարճ ժամանակով ընդմիջելով՝ կը զրոյցէ Սուետլան Մնացականեանը:

Թալիշ ժամանած շինջոկատը նախընտրած է վրաններու մէջ տեղաւորուիլ: Կ’ապրին մեծ ընտանիքի պէս: Անոնք, որոնք շինհրապարակի վրայ չեն, ճաշարանին մէջ կը հերթապահեն:

Այս ձեռնարկը շարունակական պիտի ըլլայ: Նախաձեռնողները կը նախատեսեն Օգոստոս ամսուան ընթացքին 10-ական օրով կամաւորներու եւս երկու հերթափոխ բերել Թալիշ:

Ստեփանակերտ

 

Share Button

Մեկնաբանել