• London

  • Beirut

  • Moscow

  • Los Angeles

  • Paris

  • Sydney

  • Toronto

«Զարթօնք» Հայրենիքի Մէջ -43- «Հայրենադարձի Աչքերով». Տեղի Ունեցաւ Սարիկ Սեւադայի Անդրանիկ Գրքի Շնորհանդէսը

08.02.2020   09:34

Երեւանում  փետրուարի 2-ին տեղի ունեցաւ լրագրող Սարիկ Սեւադայի «Հայրենադարձի Աչքերով» գրքի շնորհանդէսը: 30 հարցազրոյց, 30 վերադարձի պատմութիւն է ներկայացրել հեղինակը: Նպատակը մէկն էՙ խրախուսել հայրենադարձութիւնը: Մասնաւոր օրինակներով միւսներին եւս հայրենադարձութեան կոչ անել: Դահլիճը լեփ-լեցուն էր: Խօսել ցանկացողների թիւըՙ մեծ: Նման ձեւաչափի մէջ սա առաջին աշխատութիւնն է: Գիրքը նուիրուած է ոչ այնքան Հայաստանում արդէն բնակուող հայրենադարձներին, որքան հայրենիքից հեռու այդ ցանկութիւնը թաքուն փայփայողներին:

Հեղինակի խօսքովՙ 30 հայրենադարձի մասին յաջողուած պատմութիւնները բաւարար են, որպէսզի հիմք հանդիսանան հայրենադարձների թուի շատացմանը: Սեւադան նախատեսում է 2020 թուականին եւս շարունակել յօդուածների շարքը եւ մօտ 50 հայրենադարձի պատմութիւն ներկայացնել: Պատմութիւնները ոգեւորող են: Նման յօդուածաշարի գիրքի ձեւով թողարկման նախադէպ դեռեւս չէր եղել: Ներկաները ոգեւորուած էին: Դահլիճում էին նաեւ գրքի հերոսներըՙ հայրենադարձները: Նրանք հայրենիքում բաւական լուրջ գործունութիւն են ծաւալումՙ տարբեր ոլորտներում: Յաջողակ գործարարներ են, հասարակական գործիչներ, տեղեկատուական արհեստագիտութեան մասնագէտներ, մարզիչներ եւ այլն: Սեւադայի գրքի ազդեցութիւնը կարող է  հայրենադարձութիւնը նոր զարթօնք ապահովել:

Դահլիճում ներկայ սփիւռքահայերը եւ հայրենադարձները եւս կարծիքներ յայտնեցին գիրքի առանձնակի կարեւորութեան մասին: Ներկայացնելով սեփական փորձառութիւնները, հայրենիքում տարբեր տարիներին հաստատուած հայրենադարձները հող են ստեղծում նորերի համար:

Լիբանանի «Զարթօնք» օրաթերթի գլխաւոր խմբագիր Սեւակ Յակոբեանի խօսքովՙ այս գիրքը հոյակապ նախաձեռնութիւն է, որի կարիքը Սփիւռքն ու Հայաստանը միաժամանակ ունին:

«Անձնական փորձառութիւնները ուրիշներին պատմելը կարող է խթան հանդիսանալ, որպէսզի քաջալերուեն ու ինչ-որ մտահոգութիւններ, բարդոյթներ, եթէ կան, մի կողմ դնեն» ,- նշեց Սեւակ Յակոբեանը: Ըստ նրաՙ շատ լաւ կը լինի, եթէ գիրքը արեւմտահայերէն եւս հրատարակուի, որպէսզի սփիւռքահայ կարդացողին եւս հասկանալի լինի:

Օրաթերթի գլխաւոր խմբագիրն իր ելոյթում ցաւով նշեց, որ հայրենիքը հայրենադարձութիւնը քաջալերելու հարցում այլեւս ռազմավարութիւն չունի, իսկ եղածները անհատական նախաձեռնութիւններ են:

«Վերջին 50 տարում Միջին Արեւելքն անընդհատ դատարկւում է: Իսկ արտագաղթող դասակարգը լաւագոյներն են: Թէ՛ տարիքային, թէ՛ ուսումնական, թէ՛ ֆինանսական առումով: Վերջերս Եգիպտոսը, Իրանը, Իրաքը, Սիրիան դատարկուեցին, հիմա էլ Լիբանանը: Չորս ամիս է Լիբանանը տակնուվրայ է: Հայաստանի կողմից ես ոչ մի լուրջ նախաձեռնութիւն չեմ տեսել: Որեւէ մէկը չի հարցրելՙ ի՞նչ է պատահել, ի՞նչ է կատարւում: «Հայաստան» համահայկական հիմնադրամի կողմից գումար փոխանցուեց, որուն համար շնորհակալ ենք, սակայն մենք նաեւ կարօտ ենք մեր պետութեան բարոյական հովանաւորութեան: Ասածս այն է, որ յստակ ռազմավարութիւն է հարկաւոր: Վստահ եմՙ այս գիրքը շատ լաւն է, բայց մեզ տեսլական ու ռազմավարութիւն է հարկաւոր»,- իր խօսքում ընդգծեց Սեւակ Յակոբեանը:

Ներկաներն իրենց ելոյթներում միաձայն հաստատեցին այն հանգամանքը, որ այս գիրքը մեծ կարեւորութիւն ունի Սփիւռքի մեր հայրենակիցների համար: Հարցազրոյցների հերոսներից մի քանիսն իրենց խօսքում շնորհակալութիւն յայտնեցին հեղինակին, յիշեցին հարցազրոյցի անցկացման հետաքրքիր դրուագներ եւ կոչ արեցին բոլոր սփիւռքահայերին վերադառնալ հայրենիք:

Լսելով ներկաների ջերմ ու դրական կարծիքները, Սեւադան իր ելոյթը սկսեց նախ շնորհակալութիւն յայտնելով Սահակեան-Բաղրամեան հիմնադրամինՙ ի դէմս Պրուքլինի հայ համայնքի ղեկավար Տիգրան Սահակեանի, գրքի տպագրութիւնը հովանաւորելու համար:

«Շատ հաճելի է, երբ հայրենադարձութեան թեմայով ֆինանսաւորումը ստանում ես Սփիւռքից: Գիրքս ստեղծելու գաղափարն առաջացաւ այն ժամանակ, երբ որպէս լրագրող աշխատում էի ՀՀ Սփիւռքի նախարարութիւնում: Ընթացքում հասկացայ, որ կարելի է մէկտեղել բոլոր հարցազրոյցները: Ընթացքում հասկացայ, որ շատ յաջողուած պատմութիւններ են եւ թիրախաւորումը լինելու էր Սփյուռքում, որպէսզի Սփիւռքի երիտասարդները վճռական լինեն հայրենադարձման գործում: Յաջորդ շնորհակալութիւնս ուզում եմ յայտնել գրքի խմբագիր Կարինէ Աւագեանին, ում ուղղորդող յորդորների շնորհիւ է այս գիրքը ծնուել: Ուզում եմ շնորհակալութիւն յայտնել բոլոր հայրենադարձներին, ովքեր միս ու արիւն տուեցին իմ այս նախաձեռնութեանը: Եթէ չլինէիք դուք, չէր լինի իմ այս նախագիծը: Շնորհակալութիւն եմ ուզում յայտնել Էտիթ Փրինդ հրատարակչութեանը»,- շնորհակալական խօսքով ներկաներին դիմեց գրքի հեղինակը:

Միջոցառման աւարտին Սարիկ Սեւադան գրքի 30 հայրենադարձներին, որոնք ներկայ էին արարողութեանը, յատուկ մակագրութեամբ գիրքը նուիրեց, ապա բոլոր ցանկացողներին սիրով յանձնեց 30 հայրենադարձի մասին պատմող չափազանց կարեւոր աշխատութիւնը:

ՔՐԻՍԹԻՆԱ ԱՂԱԼԱՐԵԱՆ

«Զարթօնք»ի Երեւանի Աշխատակից

 

Share Button

Leave a Reply

Your email address will not be published. Required fields are marked *

Լրատուութեան գործընկեր