• London

  • Beirut

  • Moscow

  • Los Angeles

  • Paris

  • Sydney

  • Toronto

Քաղաքական Ակնարկ. Փաշինեանի Վարած Քաղաքականութիւնը Յաջորդ Յեղափոխութեան Համար Պարարտ Հող Է

21.11.2019   11:00

Հանրային խորհուրդի նախկին նախագահ Վազգէն Մանուկեանի հիմնած Վերնատուն հասարակական-քաղաքական ակումբը օրեր առաջ համաժողովի միջոցով յայտարարեց աշխոյժ գործունէութեան մասին: Ակումբի անդամները հիմնականին մէջ նախկին իշխանութիւններու ներկայացուցիչներ են, ներկայ իշխանութենէն դժգոհ քաղաքական եւ հասարակական գործիչներ:

Ազգային անվտանգութեան պետական վարչութեան նախկին պետ Դաւիթ Շահնազարեան, նախկին ՀՀկ-ական Արփինէ Յովհաննիսեան, ՀՀԿ խորհուրդի անդամ Արտակ Զաքարեանը, ՀՅԴի պատասխանատու անդամներ՝ Արմէն Ռուստամեան, Սպարտակ Սեյրանեան, Աղուան Վարդանեան, Հայաստանի երկրորդ նախագահ Ռոպերթ Քոչարեանի շրջապատի ներկայացուցիչներ, որոնց մէջ՝ անոր գրասենեակի ղեկավար Վիքթոր Սողոմոնեան, Ժառանգութիւն կուսակցութեան նախկին անդամ Ռուբէն Յակոբեան, ԱԱԾ պետի նախկին տեղակալ Գուրգէն Եղիազարեան, Արամ Յարութիւնեան, ՀՀ առաջին ՄԻՊ Լարիսա Ալաւերտեան, նախկին ԲՀԿ-ականներ Էլինար Վարդանեան, Վահէ Յովհաննիսեան, Արցախի նախկին ՄԻՊ Ռուբէն Մելիքեան, ՀՀԿ-ական նախկին պատգամաւորներ Խոսրով Յարութիւնեան, Կարեն Պեքարեան եւ այլք:

Վերոյիշեալներուն կը միաւորէ Նիկոլ Փաշինեանի իշխանութեան վարած քաղաքականութենէն դժգոհ ըլլալը եւ երկրին արտաքին ու ներքին տագնապալի իրավիճակը:

Ենթադրելի է, որ Վերնատունը յաջորդ ընտրութիւններու համար պատրաստուող քաղաքական ուժ կամ դաշինք է:

Այստեղ հիմնական դերակատարումը նախկին նախագահ Ռոպերթ Քոչարեանինն է:

Ուսումնասիրելով վերը յիշուած  գործիչներու տարիներու ընթացքին  տարած քաղաքական, հասարակական գործունէութիւնը, դժուար չէ հասկանալ, որ Վերնատան ետեւը հիմնականին մէջ կանգնած է ՀՀ երկրորդ նախագահը:

Բազմաթիւ վարկածներ կարելի է քննարկել ու վերլուծել: Նոր յեղափոխութիւն: Ընդդիմութեան ստեղծում: Արտաքին աշխարհին ուղղուած ակնարկներ եւ այլն:

Մէկ բան յստակ է: Այս պահուն Վերնատունը չունի այն ուժն ու կարողութիւնը Փաշինեանի իշխանութեան դէմ որեւէ լուրջ քայլ կատարելու համար:

Մեծ հաշուով, Քոչարեանին հիմա անհրաժեշտ է Ռուսիոյ ցոյց տալ, որ Հայաստանի մէջ ընդդիմադիր ուժ կայ: Ինքը՝ այստեղ համակիրներ ու հիմք ունի: Միայն Ռուսիոյ աջակցութեան պարագային այս խմբաւորումին համար, իշխանութիւնը վերցնելու հաւանականութիւնը կը մեծնայ:

Միւս կողմէն Փաշինեանի նորաստեղծ իշխանութիւնը տակաւին թոյլ է եւ երերուն:  Ուժեղ հարուածի մը պարագային կրնայ ճաքեր տալ: Վարչապետի խումբին մէջ կան բազմաթիւ  մարդիկ, որոնք առաջին իսկ վտանգի պարագային կը լքեն նաւը: Կը տեղափոխուին քոչարեանական կամ այլ ճամբար: Ժամանակի ընթացքին չի բացառուիր ԲՀԿ-ի միանալը այս ակումբին:

Այս ամէնուն մէջ հետաքրքրական  է երրորդ նախագահ՝ Սերժ Սարգսեանի դերակատարումը: Վերնատան համաժողովին մէջ, ըստ էութեան, կարկառուն Հանրապետական դէմքեր չկային: Ներկաներն ալ Հանրապետականի ոչ Սարգսեանական թեւէն էին:

Չմոռանանք Արցախը: Յառաջիկային, հոն նախագահական ընտրութիւններ են: Բացառուած չէ Արցախի գործիչներէն եւս շատերը միանան Վերնատան: Մէկ բան յստակ է. այս ուժը հզօրանալու պարագային կրնայ լուրջ վտանգ ներկայացնել Փաշինեանի համար:

Այն ոչ անպայմանօրէն լուրջ քաղաքականութիւնը, որ կը տանի Փաշինեանը, յաջորդ յեղափոխութեան մը համար պարարտ հող կրնայ հանդիսանալ:

Մարդիկ կը սպասեն փոփոխութիւններու: Յեղափոխական խոստումները տակաւին օդին մէջ կախուած կը մնան:

Հասարակութիւնը ձերբակալութիւններով կամ նման լուրերով կերակրելու ժամանակը  անցած է: Արդիւնք չկայ: Առարկայական ձերբակալութիւններ, պատիժներ չկան: Կայ միայն անձնական վրէժխնդրութիւն: Ընկերային ցանցերով կամ պետական վիճակագրական կոմիտէի նկարած թիւերով հասարակութեան ուրախացնելը, շատոնց արդէն անլուրջ երեւոյթի վերածուած է:

Վերջիվերջոյ, «Մերժիր Սերժին» արտայայտութիւնը հասունացել էր ճիշդ այդ նոյն ճահճացած ու հասարակութենէն կտրուած իրավիճակի պատճառով:

Նոյնանման քաղաքականութեան շարունակութիւնը աւելի կ՛արագացնէ «Նիկոլի մերժումը»:

Իշխանութիւնը պէտք է սթափի ու դուրս գայ յեղափոխական թմբիրէն, եթէ անշուշտ կ՛ուզէ պահել քաղցր իշխանութիւնը:

Ինչպէս ըսած է Չարլզ Բըրսի Սնոնՙ իրենց ձեռքին մէջ իշխանութիւնը պահող մարդիկ մինչեւ վերջին վայրկեան չեն հաւատար, որ կրնան զայն կորսնցնել: Այդպէս եղաւ ՀՀԿ-ի պարագային:  Այդպէս կրնայ ըլլալ Փաշինեանի պարագային եւս, ինչպէս նաեւ ոեւէ իշխանութեան, որ կը  կտրուի հասարակութենէն  ու իրականութենէն:

ՔՐԻՍԹԻՆԱ ԱՂԱԼԱՐԵԱՆ

Share Button

Leave a Reply

Your email address will not be published. Required fields are marked *

Լրատուութեան գործընկեր