• London

  • Beirut

  • Moscow

  • Los Angeles

  • Paris

  • Sydney

  • Toronto

Տոքթ. Անդրանիկ Տէմիրճեանի Յիշատակին

19.07.2019   09:23

Անհաւատալի, անսպասելի էր մահուանդ լուրը բոլորին համար ։ Ոչ ոք հաւատաց, թիւրիմացութիւն կարծուեցաւ մանաւանդ որ կը յաջորդէր  հօրդ կորուստին հազիւ տասը օրուայ տարբերութեամբ ։

Տակաւին բոլորս կը յիշենք ցաւակցութիւններու ընթացքին երբ վիշտդ զսպելով աշխոյժ  ձեւով կը պատմէիր հօրդ Սարգիս Տէմիրճեանի վաստակին մասին իբրեւ ֆութպոլի իրաւարար , որ կինէսի մրցանիշներու մէջ յիշատակուած էր որպէս միջազգային իրաւարարներու ֆետերասիօնին ամէնէն շատ մրցումի մասնակցած անդամ։

Տոքթ Անդրանիկ Տէմիրճեան ծնած էր Պէյրութ 1961 ին։ Հասակ առնելով Յովակիմեան Մանուկեան երկրորդական վարժարանի կրթական օճախին մէջ ան տպաւորած էր իր ընկերասիրութեամբ, ժրաջան աշխատանքով եւ լաւագոյնի ձգտումով, մշտական ձեւով ապահովելով պատուոյ ցանկի առաջատար ուսանողի դիրքը։

Ան բարձրագոյն ուսումը շարունակեց Երեւանի բժշկական համալսարանին  մէջ զոր աւարտեց 1986 ին, որմէ  ետք մասնագիտացաւ որպէս ընդհանուր վիրաբոյժ 1990 ին։ Սէր ու յարգանք կը վայելէր բժշկական անձնակազմի եւ ուսուցիչներու հետ որոնց հետ իր կապը միշտ եղած էր ամուր եւ յարատեւ։Ան կանուխէն տպաւորած էը վիրաբուժութեան հանդէպ իր հետաքրքրութեամբ եւ ընդունակութեամբ։  Տակաւին հինգերորդ տարուայ ուսանող ան արդէն ձեռնհասօրէն գործողութիւն կը կատարէր։

Վերադառնալով Պէյրութ ան գործեց տարբեր հիւանդանոցներու մէջ ձգտելով կատարել իր առաւելագոյնը եւ տալ իր լաւագոյնը հիւանդներու բուժման եւ կազդուրման համար որուն համար սիրուած եւ յարգուած էր բոլորին կողմէ ։

Ան գործեց ՀԲԸՄ ի մէջ հետագային դառնալով վեթերան անդամ ։Ան մաս կազմեց Պախչէի հայրենակացական միութեան ստանձնելով փոխ ատենապետութիւնը ։

 Լիբանանահայ Բժշկական Միութեան մէջ տպաւորած էր իր զուարթախոհութեամբ որմով կը շպարէր իր տեսակէտները։ Ան առաջին մասնակիցներէն էր ATN հայկական հեռուստակայանին կողմէ կազմակերպուած բժշկական յայտագրին։ Ամէնէն յատկանշական էր Բժշկական Սենտիքայի վերջին ընտրութիւնները, երբ վարչութիւնը անպատեհ զգացած էր իր հետ կապուիլը որովհետեւ թուականը կը զուգադիպէր իր նորօք հանգուցեալ հօր ցաւակցութիւննրու երկրորդ օրուան։ Որքան մեծ եղաւ մեր զարմանքը եւ համարումը երբ ան մասնակցեցաւ ընտրութեան զօրակցելու համար Միութեան թեկնածուին ։

Տոքթ. Անդրանիկ Տէմիրճեան իր մէջ կը մարմնաւորէր հոգատար բժիշկի, ընտանիքի համար նուիրուող հօր կերպարը ։

Սիրելի Անդրանիկ քու ժպիտովդ եւ խելացի խօսքերով շահած էիր բոլորի յարգանքը, քու ժրաջան աշխատանքով բարձր պահած էիր հայ բժիշկի բարձր կոչումը։

Ափսոս , շատ շուտ կորսնցուցինք քեզ ։

Մեր սրտազգաց ցաւակցութիւնները կողակիցիդ Տիանային   եւ զաւակներուդ՝ Յովհաննէսին եւ Դալարին ։

Բարով երթաս, յիշատակդ անմար կը մնայ քու սիրելիներուդ մօտ, քու ժպիտդ՛ անմոռանալի։ Հողը թեթեւ գայ վրադ  սիրելի Տոքթոր Անդրանիկ Տէմիրճեան ։

ԼԻԲԱՆԱՆԱՀԱՅ ԲԺՇԿԱԿԱՆ ՄԻՈՒԹԻՒՆ

 

Share Button

Leave a Reply

Your email address will not be published. Required fields are marked *

Լրատուութեան գործընկեր