• London

  • Beirut

  • Moscow

  • Los Angeles

  • Paris

  • Sydney

  • Toronto

ՅԻՇԱՏԱԿԻ ՂՕՂԱՆՋՆԵՐ. Կարապետ Հայթայեանի շիջման քառասունքին առիթով

19.07.2019   01:39

ՆՈՐ ՕՐ, ԼՈՍ ԱՆՃԵԼԸՍ.-

       Տիեզերական անյեղլի ճշմարտութիւններ կան. բնութեան մէջ գոյութիւն ունեցող ամէն շնչաւոր արարած դատապարտուած է հասնելու իր վախճանին կամ մահուան:

Սոյն գրութեան ենթախորագիրին մէջ «շիջում» բառով փոխարինեցինք «վախճան ու մահ» բառերը, քանի որ հանգուցեալը իր ապրած կեանքին օրինակով՝ հաւատացեալ հայ քրիստոնեայ մըն էր, որ ո՛չ միայն խորապէս կը հաւատար սուրբգրային սկզբունքային հաւատոյ հանգանակին, այլեւ՝ ունկնդիր իր Խիղճի Ձայնին, կ՚ըլլար Պատգամաբեր մը աստուածային Խօսքին, ու ԿԸ ՎԿԱՅԷՐ Երկնաւորին ներկայութիւնը քրիստոնէական իր անշեղ հաւատքով ու գործով:

   Այո, իր ձայնագրուած ընթերցումները Գրիգոր Նարեկացիի «Մատեան ողբերգութեան» անմահանուն հատորէն, որուն ձայներիզները մեծ տարածում գտան հայկական տուներէ ներս ու սրբազան ներշնչումներով ոգեւորեցին հայ ժողովուրդին զաւակները:

   Հոգեւոր արժէքներու հետամուտ ըլլալը առիթ ընծայեց իրեն, որ իր երիտասարդութեան շրջանէն քառորդ դար ամբողջ՝ Լիբանան գտնուած տարիներուն, ինքզինք նուիրեց իր բնակավայր Նորաշէն թաղին Հայկական Բարեգործական Ընդհանուր Միութեան կազմակերպչական ինքնահաստատումին ու բարգաւաճման ազնիւ առաքելութեան՝ իբրեւ երկարամեայ ատենապետը տեղական վարչութեան: Նոյն այս տարիներուն, Կարապետ Հայթայեան՝ իբրեւ վերակացու կը պաշտօնավարէր Լեւոն Կ. Նազարեան հաստատութեան կարուձեւի արտադրամասէն ներս, մօտիկ գործակցութեամբ ՀԲԸՄ-ՀԵԸ-ի ղեկավար դէմքերէն Կարպիս, Նուպար եւ Նազար Նազարեան եղբայրներու:

     Դարձեալ, իր ազգային գործունէութեան մաս կը կազմէ նաեւ Լոս Անճելըսի Չորք Մարզպանի Հայրենակցական Միութեան համահիմնադիր Վարչութեան անդամ ըլլալու հանգամանքը:   

 Քառասունքի հոգեհանգստեան այս օրերուն, Լիբանանի հեռաւոր այս ափերէն սրտի խոր կսկիծով կը յայտնենք մեր ցաւակցութիւնը հանգուցեալին այրիին՝ քրոջս  Էլիզ Սեփեթճեան-Հայթայեանին, դստեր՝ Մարոյին, զոյգ  որդիներուն՝ Փանոսին ու Վազգէնին ու անոնց ընտանիքներուն, հանգուցեալին քրոջ՝ Հայկանուշ Հայթայեան-Սեփեթճեան ընտանիքին։

     Յաւերժ լոյս ու խաղաղութիւն՝ տարագիր հայու անոր հոգիին եւ երկնային մխիթարութիւն վշտակիր ընտանիքի անդամներուն ու բոլոր հարազատներուն:

   Յարգանք իր անմեռ յիշատակին:    

 

ԱՐԱՄ ՍԵՓԵԹՃԵԱՆ

 

Պէյրութ

Share Button

Leave a Reply

Your email address will not be published. Required fields are marked *

Լրատուութեան գործընկեր