• London

  • Beirut

  • Moscow

  • Los Angeles

  • Paris

  • Sydney

  • Toronto

Ամերիկեան Բարքեր (լուսանկարներ)

11.07.2019   00:26

ԳԷՈՐԳ ՔԷՕՇԿԷՐԵԱՆ

«Զարթօնք»ի Երէց Աշխատակից

Լքուած Նորածինը . . .

Նորածին մը անտէր, անօգնական լքելը` նորութիւն մը չէ ամերիկայի տարածքին։ Ինչո՞ւ, որովհետեւ սեռային յարաբերութիւնը ընդհանրացած երեւոյթ մըն է, յատկապէս՝ պատանիներու միջեւ։

Մանկամարդուհի մը երբ ակամայ կը յղիանայ, չուզէր՝ կրօնական համոզումի հետեւանքով եւ կամ նիւթական միջոցը չունենալուն համար, վիժեցնել իր սաղմը։ Ուրեմն` երբ մանուկը ծնի, կ՛ուզէ զայն լքել եւ իր կեանքը անկաշկանդ շարունակել . . .

Հակառակ որ պետութիւնը յաճախ կը յիշեցնէ պատանիներուն՝ որ եթէ երեխան չեն ուզէր, կրնան առանց հարցաքննութեան նորածինը թողուլ  հիւանդանոցի մը  եւ կամ ալ ոտիկանատան մը մուտքին եւ հեռանալ անաղմուկ։ Այդպիսով՝ այդ նորածինը կը որդեգրուի սիրայօժար ընտանիքի մը կողմէ եւ կ՛ունենայ ապահով եւ հանգիստ կեանք մը։

Բայց անյայտ պատճառներով՝ յաճախ հակառակը կը պատահի։ Այսինքն՝ տհաս մայրը նորածինը կը թողու ուր որ յարմար է իրեն համար եւ կ՛անցնի կ՛երթայ, առանց ետեւը նայելու ու առանց թոյզն իսկ մտահոգուելու երեխային ապագայով։ Սա՝ յաչս պետութեան, քրէական յանցանք է ու վերջ։

Ահա ճիշդ այդ պատահեցաւ վերջերս՝ Ճորճիա նահանգի Գամինկ քաղաքի մօտերը։ Ֆրիմըն ընտանիքի անդամները ճամբորդութենէ մը տուն վերադարձին, երբ կը պատրաստուէին տուն մտնել՝ տարօրինակ ձայն մը կը լսեն իրենց տան ետեւի մացառներուն մէջէն։ Հետաքրքրուելով երբ կը մօտենան՝ կը գտնեն նորածին մը (տես նկարը),  փաթթուած կերպարուեստէ (plastic) տոպրակի մը մէջ։

Անմիջապէս նորածինը կը փոխադրեն մօտակայ հիւանդանոց մը, ուր զայն կը կոչեն “Baby India”, չենք գիտէր ինչու։ Անշուշտ Ֆրիմըն ընտանիքը՝ ըստ ընկալեալ սովորութեան,  լուր կու տայ նաեւ ոստիկանութեան՝ որոնք կ՛ըսկսին հետաքրքրուիլ թէ ո՞վ է նորածինին մայրը, որպէսզի հասկնան երեխան լքելուն պատճառն ու ի հարկին՝ սկսին դատավարութեան!

Կրնա՞ք երեւակայել որ մայր մը՝ իր նորածինը թողու մացառներուն մէջ եւ հեռանայ, կարծես աղբի կոյտ մը ըլլար այդ . . .

Անկախութեան Տօնակատարութիւն եւ . . .

Յուլիս 4-ը Միացեալ Նահանգներու անկախութեան տօնն է։ Այս տարի մայրաքաղաք Ուաշինկթընի մէջ՝ առաջին անգամ ըլլալով, բացառիկ շքեղ տօնակատարութեամբ մը նշուեցաւ անկախութեան տօնը։

Այդ առթիւ՝ Նախագահ Թրամբ հայրենասիրական ճառ մը խօսեցաւ, վեր առնելով բանակայիններու զոհողութիւնը՝ ապահովելու երկրի խաղաղութիւնը, ինչպէս նաեւ  գիտնականներու եւ արուեստագէտներու ներդումը՝ երկրի յարատեւ բարգաւաճման մէջ։ Տեղի ունեցաւ նաեւ զինուորական տողանցք եւ ռազմական օդանաւերու ցուցադրութիւն։

Սովորութիւն դարձած է որ երկրի անկախութեան տօնակատարութեան հետ առընթեր տեղի ունենայ նաեւ Hot Dog (տես նկարը) ուտելու մրցոյթ մը՝ կազմակերպուած Նիւ Եորքի Նէյթհընս նշանաւոր ճաշարանին կողմէ։

Խիստ հետաքրքրական է գիտնալ որ վերոյիշեալ մրցոյթը սկսած է 1916-ին եւ կը շարունակուի մինչեւ օրս, ի բացառեալ երկու ընդհատումներէ՝ 1941-ին, Երկրորդ Համաշխարհային Պատերազմին պատճառաւ եւ 1971-ին, ամերիկայի քաղաքական անկայունութեան պատճառաւ։

Այս տարուան էրիկ մարդոց առաջնութեան մրցանակը շահեցաւ Ճօուի Չէսթնաթ (տես նկարը), որ տասը վայրկեանի մէջ կերաւ 71 Hot Dog։ Անցեալ տարի՝ ան «կլլած» էր 74 Hot Dog եւ այս տարի կ՛ուզէր ուտել 75, որպէսզի անցեալ տարուան մրցանիշը անցած ըլլար . . .

Հետաքրքրական է գիտնալ որ Չօուի Չէսթնաթ՝ չորրորդ տարին ըլլալով առաջնութեան մրցանակը կը խլէ, վերոյիշեալ տարօրինակ մրցոյթին։ Իսկ այս տարուան կիներու մրցանակը շահեցաւ Միքի Սուտօ անունով մանկամարդուհի մը, որ տասը վայրկեանի մէջ կերաւ 31 Hot Dog:

Ըստ ինծի՝ տասը վայրկեանի մէջ 31 կամ 71 Hot Dog-ը ուտել չէ, այլ լափել է՝ բառին բուն իմաստով եւ ի՞նչ հաճոյք կայ անոր մէջ, չեմ հասկնար։ Միտքս եկաւ հայկական ասացուածքը՝ որ կ՛ըսէ, «Եթէ դուն Շարայի որկորը ունիս՝ մենք Շիրակայ ամբարները չունինք։»

Սակայն ըստ երեւոյթի, Նիւ Եորքի Nathan’s ճաշարանը Շիրակայ ամբարները ունի եւ վերոյիշեալ մրցանակները շահողներն ալ Շարայի որկորները ունին . . .

 

Share Button

Leave a Reply

Your email address will not be published. Required fields are marked *

Լրատուութեան գործընկեր